1 Timotheus 2 - North Frisian New Testament (Clemens)

Dit 2. Kapitel.

¹ Nü formåne ik, dat voar allen Dingen jest Bödiger, Gebet, Foarbedden en Danksien foar alle Mensken ske;

² Foar di Könninger, en foar alle Obrigheiden, en omdat wü en ruig en stel Lewent för mai ön al Gottseligheid en Iärbarheid.

³ For sok es gud, en håget Gott, üs Seligmåker, wel.

⁴ Hi wel, dat alle Mensken holpen ud, en tö di Känels van di Wårheid kom.

⁵ For diär es jen Gott en jen Meddeler twesken Gott en di Mensken, nämelk di Mensk Jesus Kristus.

⁶ Diär sik sallew foar alle heniwen hed tö Loaslising, omdat dit tö sin Tid forkindjigt ud.

⁷ Diärtö sen ik stelt tö en Pröst en Apostel (ik si di Warheid ön Kristus, en lög ek) en Liärer bi di Heiden, ön di Glow en ön di Wårheid.

⁸ Sa wel ik, dat di Maner bed ön ark Steid, en hellig Hunden âphew, sönder Wredheid en Twiwel.

⁹ Alliksa di Wüffen, dat ja ön iärbår Kloader, me Skåm en Tügt sik sire, ek me Tapper, of Gold, of Perlen, of kostbar Kloading.

¹⁰ Mar üs-t sik skekket foar di Wüffen, welk Gottseligheid bewise dör gud Werken.

¹¹ En Wüf lir ön di Stelligheid, me al Önderdånigheid.

¹² Ik let et ek tö, dat en Wüf lirt, uk ek, dat jü Herr aur di Man es, mar ik wel, dat jü sik stel halt.

¹³ For Adam es jest måket, diärüp Eva.

¹⁴ En Adam wad ek forfört, mar di Wüf wåd forfört, en hed bütten di Wei handelt.

¹⁵ Mar jü skel selig ud dör Biärner gebären, wan jü ön di Glow blewt, en ön di Lewde, en ön di Helligheid, samt di Tügt.