1 Timotheus 1 - North Frisian New Testament (Clemens)

Dit 1. Kapitel.

¹ Paulus, en Apostel van Jesus Kristus, eter di Befel van Gott, üs Seligmåker, en di Herr Jesus Kristus, diär üs Höp es.

² Timotheus, min egt Seen ön di Glōw, Gnåd en Barmhartigheid, Fred van Gott, üs Vader, en üs Herr Jesus Kristus.

³ Alliküs ik di böden hå, dat dü ön Efesus bliw skudt, üs ik na Macedonien reiset, sa formåne ik di jit, Sommen tö befelin, dat ja nin främed Lirdom voardrai skuld.

⁴ Uk skel ja ek agt üp di Fabeln en di Stam-Forteknis, welk nin Jend hå, en Stridfragen tö Wei bring, moar üs tö Aprogting ön di Glow.

⁵ For dit Hauptgebot es di Lewde ön en rin Hart, en me en gud Geweten, en ön en âprogtig Glow.

⁶ Sommen sen diärvan ofweken, en hå sik omwǟnt tö loas Kekeli.

⁷ Ja wel Meister aur di Skreft wis, en forstun ek, wat ja si, nog wat ja fastsät.

⁸ Mar wü wēt, dat di Wet gud es, wan er hokken di Wet rogt brükt.

⁹ En wan hi wēt, dat di Wet ek foar di Rogtfârdig iwen es, mar foar di Ünrogtfârdigen en Wederspenstigen, di Gottloasen en Senders, di Ünhelligen en Üngeistelken, di Vader- Mūrdigers, en di Doadslåers.

¹⁰ Di Hurer, di Halwsegen, di Menskenrowers, di Lögner di Meneidigen, en wan üders wat moar tögen di sünd Lirdom es.

¹¹ Eter dit herrelk Evangilje van di selig Gott, wat mi önfortrūt es.

¹² En ik danke üs Herr Kristus Jesus, diär mi stark maket, en mi foar tru agt hed, en mi ön dit Amt insät hed.

¹³ Ik wiär tövoaren en Spotter, en Forfölliger, en en Smoaier, mar mi es Barmhartigheid tö Dil uden, for ik ha dit sönder Weten dön, ön di Ünglow.

¹⁴ Mar Gottes Gnad hēd om sa vul rikkelker wessen, me samt di Glow en di Lewde, welk ön Kristus Jesus es.

¹⁵ For dit es wes wår, en en jür wördig Urd, dat Kristus Jesus ön di Wârld kjemmen es, om di Senders selig tö makin, mung dânen ik di jest sen.

¹⁶ Mar diärom es mi Barmhartigheid tö Dil uden, omdat Jesus Kristus ön mi, üs di gurtst, alle Geduld bewiset, welk ön höm liw skuld tö dit ewig Lewent.

¹⁷ Mar Gott, di ewig Könning, di Ünforgängelk, en Ünsigtbår, en alining Wissen, wis Iar en Pris ön Ewigheid. Amen.

¹⁸ Döt Gebot befele ik di, min Seen Timotheus, eter di voarige Profeseiinger aur di, dat dü diärön en gud Strid först.

¹⁹ En hēst di Glow en en gud Geweten, wat Sommen van sik stöt ha, en ön di Glow Skepbrek ledden hå.

²⁰ Mung danen sen Hymenäus en Alexander, welk ik auriwen ha ön di Satan, omdat jam lirt wåd, ek moar tö lasterin.