1 Thessaloniker 3 - North Frisian New Testament (Clemens)

Dit 3. Kapitel.

¹ Diärom küd wü-t ek länger üthoald en ha beslöten, ön Athen alining tö bliwen.

² En ha Timotheus, üs Brödher stjürt, Gottes Diner, en üs Helper önt Evangilje van Kristus, om ju tö starken en tö formanin ön ju Glow.

³ Om dat er Nemmen wankelig ud ön dös Bedrüwwinger, for I wēt, dat wü diärtö bestemt sen.

⁴ En üs wü bi ju wiär, said wü ju dit tövoaren, dat wü Bedrüwwing hå skuld, allik üs-t uk sken es, üs I nog wēt.

⁵ Diärom ha ik dit uk ek länger üthoald küd, en ha höm stjürt, omdat ik tö weten fing, hur-t me ju Glow stånt; of dat di Forsjukker ju meskin forsagt hēd, en üs Årbed foriws wiär.

⁶ Mar nü, üs Timotheus van ju tö üs kjemmen es, en üs di gud Bödskep brågt hed van ju Glow en ju Lewde, en dat I altid om üs tänk üp-t bäst, en dit Forlangen hå, üs tö sen, alliküs wü eter ju:

⁷ Da sen wü, lew Brödhern! tröstet uden aur ju ön al üs Bedrüwwing, dör ju Glow.

⁸ For nü lewwe wü weder ap, wil dat I stun ön di Herr.

⁹ For watfoar en Dank kjen wü Gott tö Forgelting bring foar ju, foar al dös Frügged, welk wü van ju hå voar üs Gott.

¹⁰ Wü bed Nagt en Dai rogt vul, dat wü ju Ansegt se mai, en dit volmake, hur jit wat wånt ön ju Glōw.

¹¹ Mar üs Gott en Vader, en üs Herr Jesus Kristus, wänd üs Wei tö ju.

¹² En di Herr formiäre ju Lewde, en lets tönem tögen arküder, en tögen Arkjen, alliküs wü-s tögen ju hå.

¹³ Omdat ju Harten starkt ud en ünskildjig sen ön di Helligheid voar Gott üs Vader, üp di Tökomst van üs Herr Jesus Kristus me al sin Helligen.