1 Petrus 1 - North Frisian New Testament (Clemens)

Dit 1. Kapitel.

¹ Petrus, en Apostel van Jesus Kristus, ön di ütwälet Främenden, diär ombistrit sen ön Pontus, Galatien, Cappadocien, Asien en Bithynien.

² Üs Gott Våder dit beslöten hed, dör di Helligmåking van di Geist, tö Fölligsomheid, en tö Bespränking me dit Blöd van Jesus Kristus, Gott iw ju vul Gnåd en Frēd.

³ Gott en di Våder van üs Herr Jesus Kristus wis lowet, diär üs eter sin gurt Barmhartigheid wedergeboren hēd tö en lewendig Höpning, dör Jesus Kristus sin Apstunen van Doaden.

⁴ Tö en ünforgängelk en ek forwellet Arfdil sönder Plakken, wat behölden ud on Hemmel.

⁵ Diär dör Gottes Magt ön di Glow bewåret ud tö di Seligheid, welk törēd es, omdat-s ipenbar ud on di lēst Tid.

⁶ Ön di Tid skel I ju frügge, wan I uk en kurt Tid, (wan-t sa wis mut) bedrüwwet sen ön manningerlei Önfegtinger.

⁷ Omdat ju Glow rogtskaffen en vul köstelker ön di Prow befünden ud, üs al dit forgängelk Gold, wat dör dit Jöld prowet ud, tö Low, Pris en Iär, wan Jesus Kristus nü ipenbaret ud.

⁸ Welk I ek sen ha, en höm dag lew ha, en nü ön höm liw, alhurwel I höm ek se, diäraur skel I ju frügge me en herrelk Frügged, welk ek üttöspreken es.

⁹ En di Loan van ju Glow diärvan bring, nämelk di Selen Seligheid.

¹⁰ En di Seligheid hå di Profeten sågt en forsket, welk van di Gnad ön di tökommen Tid voarütsaid ha, welk ju tö Dil uden es.

¹¹ En ja hå eterforsket, tö welk en watfoar en Tid düdet di Geist van Kristus, diär ön jam wiär, en tovoaren betjügt hēd di Liden, diär ön Kristus sen, en di Herlikheid, welk diärüp fölligt.

¹² Danen dit ipenbåret es, dat ja dit ek jam sallew, mar üs tö Guden dön ha, dat ja dit Evangilje forkindjigt hå, dör di hellig Geist, diär van Hemmel stjürt ud, hurtö uk di Engel Lest hed, om dit tö skauin.

¹³ Diärom apskort di Lunken van ju Gemüt, wis nügtern, en sät ju Höp hilental üp di Gnad, welk ju önböden ud dör di Ipenbåring van Jesus Kristus.

¹⁴ Üs Biärner, diär frai harke, en stel ju ek alliksa üs tövoaren, üs ju jit ünwis wiär, en ön Wellest lewwet.

¹⁵ Mar eter di, diär ju beröpen hed, en hellig es, skel I uk hellig wis, ön al ju Wandel.

¹⁶ For diär stånt skrewwen: I skel hellig wis, for ik sen hellig.

¹⁷ En wan I höm üs Våder önröp, diär sönder Önsen van di Person rigtet, eter ark sin Werk, da för ju Wandel, sa lung üs I hjir wandele, me Fürgt.

¹⁸ For I wet, dat I ek me forgängelk Sölwer en Gold erlöset sen van ju aurdådig Wandel, eter di Wis van ju Våders.

¹⁹ Mar me dit jür Blöd van Kristus, üs en ünskiljig Lum sönder Plakken.

²⁰ Welk diärtö bestemmet wiär, jer dat di Gründ tö di Warld leid wåd, mar ipenbåret ön di lest Tid om ju wel.

²¹ Dör höm liw I ön Gott, diär höm âpwäkt hed van Doaden en höm di Herrelkheid iwen hed, omdat I di Glow en di Höp tö Gott hå mai.

²² En måke ju Selen rin ön di Fölligsomheid van di Wårheid dör di Geist, tö âprogtig Brödher- Lewde, en hå arküder hartlik lew me en frai Gemüt.

²³ Üs dânen, diär wedergeboren sen, ek ut forgangelk, mar üt ünforgängelk Sit, nämelk üt dit lewendig Urd van Gott, wat ewig blewt.

²⁴ For al dit Flesk es üs Gärs en alle Menskens Herrelkheid üs di Gärs Kröllen. Dit Gärs es fordorret, en di Kröllen sen offälen.

²⁵ Mar di Herr sin Urd blewt ön Ewigheid. En dit es dit Urd, wat bi ju forkindjigt uden es.