1 Korinther 6 - North Frisian New Testament (Clemens)

Dit 6. Kapitel.

¹ Hur dört er hokken mung ju, wan hi en Såk tögen en Üdern hēd, tö Rogt gung voar di Ünrogtfârdigen, en ek voar di Helligen.

² Wet I ek, dat di Helligen di Warld rigte skel? Wan nü di Warld van ju rogt ud, sen I da ek gud nog, aur mender Såken Rogt tö spreken.

³ Wet Ik ek, dat wü aur di Engel rigte skel? Om hurvul moar aur di Såken, welk dit Lewent öngung.

⁴ Mar wan I en Såk aur dit Warldsgud hå, da nem I danen, diär bi dit Geminte litjet agtet sen, ön tö Rigtern.

⁵ Ik mut ju dit si tö ju ein Skand. Es er da ek en wis Man mung ju? Of dag jen, diär rigte küd twesken Brödher en Brödher.

⁶ Wan di jen Brödher me di Üder Strid hed, diärtö voar di Ünglowsken.

⁷ Hat es al en Feiler mung ju, dat I me arküder Rogtsåken hå. Hurom let I ju ek vul lewwer Ünrogt dö? Hurom lid I ek vul lewwer salw Skåd?

⁸ Mar I dö Ünrogt en bedrai, en dö sok bi di Brödhem.

⁹ Wet I ek, dat di Ünrogtfârdigen Gottes Könningrik ek arwe skel. Let ju ek forför, nogweder di Hurenjägers, of di Ofgottdiners, of di Ebrekers, of di Sallewskänder, of di Hoalewsegen.

¹⁰ Of di Tiwer, of di Gitshalsen, of di Dronksters, of di Skreiers, of di Rowers skel Gottes Könningrik ârwe.

¹¹ En sokken hå Sommen van ju wessen, mar I sen rin oftauet, I sen hellig måket, I sen rogtfârdig uden dör di Nom van di Herr Jesus, en dör üs Gott sin Geist.

¹² Ik hå tö Alles Forlof, mar hat es ek Alles gud slåget. Ik ha tö Alles Forlof, mar ik wel mi ek beherske let.

¹³ Din Spis es foar di Måg, en di Måg es foar di Spis; mar Gott wel dös en di jünder tö nönt måke. Dit Lif es ek diär foar di Hureri, mar foar di Herr, en di Herr foar di Likhäm.

¹⁴ Mar Gott hed di Herr âpwäkt; en wel uk üs apwäk dör sin Kraft.

¹⁵ Wet I ek, dat ju Likhäm Leden van Kristus sen? Skuld ik nü di Led van Kristus nem, en Hurleden diärüt make? Diär est fir van!

¹⁶ Of wet I ek, hokken ön di Hur hinget, di es jen Likhäm me hör? For di tau (sprakt hi) skel jen Flesk wis.

¹⁷ Mar hokken ön di Herr hinget, di es jen Geist me höm.

¹⁸ Flögt voar di Hureri. Alle Send, diär di Mensk däd, sen bütten sin Likhäm. Mar hokken huret, di forsendigt sik ön sin ein Lif en Lewent.

¹⁹ Of wet I ek, dat ju Likhäm en Tempel van di hellig Geist es, diär ön ju es, welk I van Gott hå, en dat I ek ju ein sen.

²⁰ For I sen jür kopet. Diärom prise Gott ön ju Likhäm, en ön ju Geist, welk Gott töhir.