1 Korinther 5 - North Frisian New Testament (Clemens)

Dit 5 Kapitel.

¹ Aural hjert em van di Hureri mung ju, en sa en Hureri, hurvan di Heiden ek jens wet tö sien, dat er Jen sin Vaders Wüf hed.

² En I sen âpblögen, en ha ek vul moar Sörrig drain, omdat di, diär dit Werk dön hed, van ju ütsköt ud.

³ Al sen ik ek bi ju me min Lif en Lewent, da sen ik dag me min Geist bi ju, ha nü al beslöten aur di, diär sawat drewwen hed.

⁴ Ön üs Herr Jesus Kristus sin Nom, ön ju Forsåmlung, me min Geist, en me di Kraft van üs Herr Jesus Kristus.

⁵ Skel hi auriwen ud on di Satan, om sin Flesk tö fordarwin, om dat di Geist selig ud üp üs Herr Jesus sin Dai.

⁶ Ju Berop es ek gud. Wet I ek, dat en litjet Süring dit hile Jei sür maket?

⁷ Diärom fåge dit oald Süring üt, omdat I en ni Jei sen, alliksa üs I sönder Süring sen. For wü hå uk en Poasklum, dit es Kristus, diär foar üs slagtet es.

⁸ Diärom let üs Poask hoald, ek ön dit oald Süring, uk ek ön dit Süring van Bosheid en Skalkheid, mar on dit Jei van Aprogtigheid en Wårheid.

⁹ Ik ha ju ön dit Bref skrewwen, dat I skel nönt tö skaffin ha me di Hurenjägers.

¹⁰ Dit min ik ek van al di Hurers üp dös Wârld, of van di Gitsigen, of van di Rowers, of van di Ofgottdiners; üders måst I jå üt di Warld flögt.

¹¹ Mar nü hå ik ju skrewwen, I skel me jam nin Omgang ha, nämelk wan er hokken es, diär sik en Brödher näm let, en es en Hurer, of en Gitshals, of en Lästerer, of en Dronkster, of en Rower, me höm skel I uk ek it.

¹² Fo wat gung mi dânen ön, diär bütten sen, dat ik aur jam rigte skuld. Rigte I aur danen, diar mung ju sen.

¹³ Mar Gott wel danen, diär bütten sen, rigte. Skaffe di Bösewigt weg van ju.