1 Korinther 3 - North Frisian New Testament (Clemens)

Dit 3. Kapitel.

¹ En ik, lew Brödhern! küd ek me ju rede üs me Geistelken mar üs me flesklik Mensken, üs me Biärner ön Kristus.

² Ik ha ju Molk tö drinken iwen, en ek fast Spis; for I küd dit jit ek fordrai, en uk nü formai I dit jit ek.

³ Wil dat I jit flesklik Mensken sen. For mung ju es Ofgönst, Kiwing en Twedragt; sen I da ek flesklik Mensken, en wandele I da ek eter Menskenwis?

⁴ For wan er jen said: Ik hoald-t me Paulus, en di Üder said: ik hoald-t me Apollo; sen I da ek flesklik Mensken?

⁵ Hokken es nü Paulus? Hokken es Apollo? Diner sen ja, dör welk I tö di Glow kjemmen sen, en dit, alliküs di Herr dit ark iwen hēd.

⁶ Ik hå plåntet, Apollo hed bejitten, mar Gott jewt di Di.

⁷ Sa es nü nogweder di, diär plåntet, of di, diär bejit wat, mar Gott, diär di Dī jewt.

⁸ Di diär plåntet, en di diär bejit, di jen es üs di Üder. Ark skel sin Loan fo eter sin Arbed.

⁹ For wü sen Gottes Meårbeder. I sen Gottes Eker, en Gottes Begning.

¹⁰ Eter Gottes Gnad, diär mi iwen es, ha ik di Gründ leid üs en wis Begmeister; en Üder beg diärüp. Mar ark se tö, hurdelling hi diärüp begt.

¹¹ En Üder Gründ kjen er Nemmen li voarbütten di, welk leid es, dit es Jesus Kristus.

¹² Mar wan er hokken üp dös Gründ begt Gold, Sölwer, Edelstin, Holt, Fodder, Stöpeler:

¹³ Da skel arkjens Werk ipenbår ud; dit Daislägt skelt âpklåre, for hat skel dör dit Jold ipenbar ud, en huns arkjens Werk es, skel dör dit Jöld ütprowet ud.

¹⁴ Wan huns Werk blewt, wat hi diärüp begt hēd, da skel hi Loan fo.

¹⁵ Mar wan huns Werk forbrent, da skel hi diärvan Skad lid; mar hi skel sallew selig ud, dag sa, üs dör Jöld.

¹⁶ Wet I ek, dat I Gottes Tempel, en Gottes Geist ön ju unet?

¹⁷ Wan er hokken Gottes Tempel skänt, di wel Gott skänt. For Gottes Tempel es hellig, welk I sen.

¹⁸ Nemmen bedrai sik sallew. Hokken van ju sik īnbild, wis tö wisen, di ud en Nar ön dös Warld, omdat hi wis ud mai.

¹⁹ For di Wisheid van dös Warld es Tåbigheid bi Gott. For diär stånt skrewwen, di Wissen fatet hi ön jår Klokheid.

²⁰ En wederom: Di Herr känt di Wissen jar Aurleg, dat ja nöntsags sen.

²¹ Diärom röme sik Nemmen üp Mensken, for Alles es ju.

²² Hat mai Paulus, of Apollo, Kefas, of di Warld wis, hat mai Lewent of Doad wis, hat mai dit wis, wat nü diär es, of dit ön di Tökomst, Alles es ju.

²³ Mar I sen Kristus sin, en Kristus es Gott sin.