1 Johannes 4 - North Frisian New Testament (Clemens)

Dit 4. Kapitel.

¹ I Lewsten! liw ek ark Geist, mar prowe di Geister, ofs van Gott sen; for diär sen vul falsk Profeten ütgingen ön di Warld.

² Diärbi skel I Gottes Geist kän. Ark Geist, diär bekänt, dat Jesus Kristus es ön dit Flesk kjemmen, di es van Gott.

³ En ark Geist, diär ek bekänt, dat Jesus Kristus ön dit Flesk kjemmen es, di es ek van Gott. En dit es di Geist van di Tögenkrist, van welk I hjert ha, dat hi kom skel, en hi es nü al ön di Warld.

⁴ Min Biärner! I sen van Gott, en ha jam aurwonnen; for di diär ön ju es, es gurter üs di, welk ön di Warld es.

⁵ Ja sen van di Warld, diärom sprek ja van di Warld, en di warld hjert jam.

⁶ Wü sen van Gott, en hokken Gott kant, di hjert üs; hokken ek van Gott es, di hjert üs ek. Diärbi kän wü di Geist van di Wårheid, en di Geist van di Dwåling.

⁷ Min Lewsten! let üs arküder lew ha; for di Lewde es van Gott; en hokken lew hed, di es üt Gott geboren en känt Gott.

⁸ Hokken ek lew hed, di känt Gott ek; for Gott es di Lewde.

⁹ Diärön hed Gottes Lewde tögen üs sik ipenbaret, dat Gott sin iningst geboren Seen stjürt hed ön di Warld, om dat wü dör höm lewwe skel.

¹⁰ Diärön bestånt di Lewde: ek, dat wü Gott lew hed; mar, dat Gott üs lew hed, en sin Seen stjürt hēd tö en Forsöning foar üs Send.

¹¹ I Lewsten! hēd Gott üs sa lew hed, da skel wu uk arküder lew ha.

¹² Nemmen hed Gott bi sin Tid jens sen. Wan wü arküder lew hå, da blewt Gott ön üs, en sin Lewde es volâp ön üs.

¹³ Diärbi kän wü dit, dat wü ön höm bliw, en hi ön üs, wil hi üs van sin Geist iwen hēd.

¹⁴ En wü hå-t sen, en betjüg dit, dat di Våder di Seen stjürt hed tö en Seligmåker foar di Warld.

¹⁵ Hokken nü bekänt, dat Jesus Gottes Seen es, ön höm blewt Gott, en hi ön Gott.

¹⁶ En wü hå di Lewde känen lirt, en liw diärön, welk Gott tö üs hed. Gott es di Lewde, en diär ön di Lewde blewt, di blewt ön Gott, en Gott ön höm.

¹⁷ Diärön es di Lewde volkommen bi üs, omdat wü Üp di Gerigtdai en früggelk Fortruen ha, for alliküs hi es, sa sen wü uk ön dös Warld.

¹⁸ Fürgt es ek ön di Lewde, mar di vol Lewde drewt di Fürgt üt; for di Fürgt hed Pin. Hokken sik fürgt di es ek volkommen ön di Lewde.

¹⁹ Let üs höm lew hå, for hi hēd üs jest lew hed.

²⁰ Wan er hokken said: Ik hå Gott lew, en håtet sin Brödher, di es en Lögner. For hokken sin Brödher ek lew hēd, diär hi sjogt, hur kjen hi Gott lew ha, diär hi ek sjogt?

²¹ En dit Gebot hå wü van höm; dat hokken Gott lew hed, di hēd uk sin Brödher lew.