जकरिया 8 - नेवाः बाइबलयरूशलेमयात सुवाः बियादीगु बचं 1 हाकनं दक्व शक्ति दुम्ह परमप्रभुयागु थ्व वचन जिथाय् वल। 2 दक्व शक्ति दुम्ह परमप्रभुं थथे धयादी, “सियोनयात जिगु क्वातूगु व दुग्यंगु माया दु। जि यरूशलेमया निंतिं जोशं जाःगु दु!” 3 परमप्रभुं थथे धयादी, “जि सियोनय् लिहां वये अले यरूशलेमय् बाय् च्वने। अबलय् यरूशलेमयात ‘विश्वास याये बहःगु शहर’ धकाः धाइ, अले दक्व शक्ति दुम्ह परमप्रभुया पहाडयात धाःसा ‘पवित्र पर्वत’ धाइ।” 4 दक्व शक्ति दुम्ह परमप्रभुं थथे धयादी, “यरूशलेमया चुक चुकय् हाकनं बुरा व बुरीपिं यक्व उमेर दुगुलिं थथःगु ल्हातय् कथि ज्वनाः च्वनी। 5 शहरया चुक चुकय् म्हितिपिं मस्तय्सं जाइ।” 6 दक्व शक्ति दुम्ह परमप्रभुं थथे धयादी, “अबलय् थुपिं ल्यंदुपिन्त थ्व खँ अजूचाइपुस्से च्वने फु, अय्नं छु व जिगु मिखाय् अजूचाइपुस्से च्वनी ला?” दक्व शक्ति दुम्ह परमप्रभुं थथे धयादी। 7 दक्व शक्ति दुम्ह परमप्रभुं थथे धयादी, “जिं थः मनूतय्त पुर्बयागु देश व पच्छिमयागु देशं बचय् याये। 8 जिं इमित यरूशलेमय् च्वनेत ब्वनाहये। इपिं जि मनूत जुइ। अले जि इमिपाखे विश्वास याये बहःम्ह व धर्मी जुयाः इमि परमेश्वर जुये।” 9 दक्व शक्ति दुम्ह परमप्रभुं थथे धयादी, “देगः हाकनं न्हूगु यानाः दय्केगु बारे परमप्रभु परमेश्वरया देगःया जग तयाच्वंगु इलय् न्हापायापिं अगमवक्तातय्सं छिमित ‘छिमिगु ल्हाः बल्लायेमा!’ धकाः धाःगु खँ हे छिमिसं आः हाकनं न्यनाच्वंगु दु। 10 व ई स्वयाः न्हापा सुनानं ज्याला बियाः मनू वा पशुयात तये मफु। शत्रुया कारणं सुं मनू सुरक्षित थःगु ज्याय् वये वनेमफु। छाय्धाःसा जिं सकल मनूतय्त थःथः जःलाखःलाया विरोधय् थनागु खः। 11 अय्नं आः थ्व ल्यंदुपिं मनूतय्त न्हापा यानागु थें याये मखु” दक्व शक्ति दुम्ह परमप्रभुं धयादी। 12 “पुसा बांलाक बुया वइ, दाखमां फल बी, बुं थःगु अन्न सय्की, अले गाक्क वा वइ। जिं ल्यंदुपिं मनूतय्त थुपिं फुक्क सर्बय कथं बी। 13 हे यहूदा व इस्राएलयापिं मनूत, परदेशीतय्सं सुयातं सराः बीबलय् थौं तक नं छिमिगु नां छ्यलाच्वंगु दु। अय्नं जिं छिमित बचय् याये, अले छिपिं भिंगु सुवाः जुइ।” 14 दक्व शक्ति दुम्ह परमप्रभुं धयादी, “गथे छिमि पुर्खातय्सं जितः तंचाय्कूबलय् जिं इमिथाय् विपत्ति हयेगु क्वःछिना अले भतिचा नं माया मक्यना।” 15 “तर आः हाकनं यरूशलेम व यहूदायापिं मनूतय्त भिं यायेगु क्वःछिनागु दु। उकिं ग्याये मते। 16 छिमिसं यायेमाःगु थ्व हे ज्या खः – छम्हय्सिनं मेम्हलिसे खःगु खँ ल्हा, अले छिमिगु अदालतय् खःगु व पाय्छिगु न्याय या। 17 छम्हय्सिनं मेम्हय्सित स्यंकेगु योजना दय्के मते। पाफयाः मखुगु साक्षी बी मते। थुपिं फुक्क खँयात जिं घृणा याये,” परमप्रभुं धयादी। 18 हाकनं जिथाय् दक्व शक्ति दुम्ह परमप्रभुयागु वचन वल, 19 दक्व शक्ति दुम्ह परमप्रभुं थथे धयादी, “प्यंगूगु, न्यागूगु, न्हय्गूगु व झिगूगु लायागु अपसं व दुखं च्वनेमाःगु दिं आवलिं लसताया नखः जुइ। उकिं छिमिसं सत्य व शान्तियात यय्की।” 20 दक्व शक्ति दुम्ह परमप्रभुं थथे धयादी, “यक्व मनूत व यक्व शहरयापिं मनूत यरूशलेमय् वइगु ई वइतिनि। 21 अले छगू शहरयापिं मनूत मेगु शहरय् वनाः थथे धाइ, ‘जिमित आशिष बियादिसँ धकाः परमप्रभुयात बिन्ति यायेत याकनं हुँ, दक्व शक्ति दुम्ह परमप्रभुयात मालेनु। जि थः नं वने।’ 22 यक्व मनूत व बल्लाःगु जातित यरूशलेमय् दक्व शक्ति दुम्ह परमप्रभुयात मालेत व बिन्ति यायेत वइ।” 23 दक्व शक्ति दुम्ह परमप्रभुं थथे धयादी, “उबलय् मेमेगु जातियापिं व मेमेगु भाय् ल्हाइपिं झिम्ह मनू छम्ह यहूदी मिजंयाथाय् वयाः लंकू ज्वनाः थथे धाइ, ‘जिपिं नं छिलिसे वने, छाय्धाःसा छिलिसे परमेश्वर दु धकाः जिमिसं न्यनागु दु।’” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.