जकरिया 11 - नेवाः बाइबल1 हे लेबनान, खापा चाय्कि, गुकिं यानाः मिं छंगु देवदारुया सिमायात भस्म यायेमा। 2 हे थाकुराःमा ख्व! छाय्धाःसा देवदारुया सिमात क्वःदःगु दु। ततःमागु व बांबालाःगु सिमात नाश जूगु दु। हे बाशानयागु स्वसिमा ख्व! ख्वातुगु गुँया सिमात पालाब्यूगु दु। 3 फैजवाःतय्गु ख्वःसः न्यँ छाय्धाःसा इमिगु फै ज्वयेगु ख्यः नाश जूगु दु। सिंहत गर्जय् जूगु सः न्यँ, छाय्धाःसा यर्दन खुसिया जःखः च्वंगु झाः नाश जूगु दु। निम्ह फैजवाःत 4 परमप्रभु जिमि परमेश्वरं थथे धयादीगु दु, “स्यायेत चिं तःपिं फैच्वलय्तय्त ज्व। 5 न्यानायंकीपिन्सं फैयात स्याइ, अय्नं इमित सजाँय जुइ मखु। इमित म्यूपिन्सं थथे धाइ, ‘परमप्रभुयात तःधंकि, जिपिं तःमि जुल।’ फैजवाःतय्सं थः बथांयात दया मया। 6 आवंलि जिं देशय् च्वंपिं सुयातं हे दया याये मखुत,” परमप्रभुं धयादी। “जिं मनूतय्त छम्हय्सित मेम्हय्सिगु विरोधी यानाबी। अले इमित इमि शासकतय्गु ल्हातिइ तयाबी। इमिसं देशयात क्वत्यली। अय्नं जिं थ्वयात इमिगु ल्हातिं बचय् याये मखु।” 7 उकिं जिं स्यायेत चिं तयातःपिं फैतय्गु पुचलं सुसाःकुसाः मगाःपिं फैतय्त ज्वया। अले निपु कथि कयाः जिं बथांयात ज्वयाः छपु कथियागु नां “दया” तया, अले जिं बथांयात ज्वयाः मेगु कथियागु नां “छप्पँ” तया। 8 जिं लच्छिया दुने स्वम्ह फैजवाःतय्त पितिनाछ्वया। अले उगु फैबथानं जितः मयय्कल। जितः इपिं खनाः वाक्क वल। 9 “आवंलि जि छिमि फैजवाः जुइ मखुत। छिपिं सीसां थजु, स्यासां थजु। ल्यंदनिपिन्त नं थवंथवय् स्यानाः ला नयेमा।” 10 अले जिं “दया” नांयागु कथि कयाः फुक्क जातियापिंलिसे चिनागु बाचा त्वाःथला धकाः क्यनेत निकू थलाबिया। 11 थुकथं उखुन्हु हे बाचा क्वःदल। सुसाःकुसाः मगाःपिं फैतय्गु बथानं जिगु ज्याखँ स्वयाच्वन। इमिसं स्यू, जिगु ज्याखँपाखें परमप्रभुं नवानाच्वंगु दु। 12 जिं इमित धया, “छिमित बांलाः सा जितः ज्याला ब्यु, मखुसा म्वाः।” अले इमिसं जितः ज्याला कथं स्वीकू वहः बिल। 13 अले परमप्रभुं जितः धयादिल, “थ्व धिबा कुमाःयात ब्यु” थ्व जिगु ज्यायात इमिसं क्वःछ्यूगु तःधंगु मू खः। उकिं व स्वीकू वहः यंकाः जिं परमप्रभुया देगलय् च्वंगु धुकुतिइ तयाबिया। 14 अले जिं “छप्पँ” नांयागु कथि कयाः यहूदा व इस्राएलया स्वापु त्वःधुल धकाः क्यनेत, निकू थलाबिया। 15 अले परमप्रभुं जितः धयादिल, “हाकनं छं छकः ग्वाज्यःम्ह फैजवाःयागु ज्याभः का। 16 जिं थःगु बथां स्वयेत मेम्ह छम्ह फैजवाः तये। वं तंपिं फैतय्त वास्ता याइ मखु, थुखेलाः उखेलाः जूपिन्त मुंकी नं मखु, घाःपा जूपिन्त लंकी नं मखु, छुं मजूपिन्त ज्वइ नं मखु। वं बांबालाःपिं फैतय्गु ला नइ अले इमिगु ख्वःयात सालाः लिकाइ।” 17 बथां त्वःतावंपिं ज्यालगय् मजूपिं जवाःतय्त धिक्कार! वयागु ल्हाः व जव मिखाय् तरवार लाइ। वयागु ल्हाः गनावनी अले वयागु जव मिखा कां जुइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.