श्रेष्ठगीत 4 - नेवाः बाइबलल्याय्मम्ह मिजं 1 जिमि प्रिय, छ गुलि बांलाः! तसकं हिसि दु! गाचां त्वपुयाः तःगु छंगु मिखा सुकुभत्तुयागु थें च्वं। छंगु सँ गिलादया भिरय् च्वलय्या बथां तिंन्हुया क्वहां वः थें। 2 छंगु वा, नकतिनि सँ चाकाः म्वःल्हुइका तःपिं फैतय्गु सँ थें तुइसे च्वं। उपिं फुक्कं ज्वः ला अले बांलाक मिलय् जू। 3 छंगु म्हुतुसि ह्याउँगु रिबन थें च्वं, छंगु म्हुतु तसकं बांलाः। गाचाय् दुने छंगु न्यता बागः थलातःगु धालेसि थें च्वं। 4 छंगु गपः दाऊदया तःधंगु धरहरा थें च्वं। उकी द्वःछि गः ढाल यख्खायातःगु दु। उपिं फुक्क सिपाइँतय्गु ढाल खः। 5 छंगु दुरुप्वः निम्ह हरिण थें च्वं। लिली स्वांया दथुइ ज्वयातःपिंनापं बूपिं चल्लाया मचात थें च्वं। 6 तुयुजः मवतले अले किचः तना मवंतले, जि मूर्रया पर्वतय् व धुपाँय्या डाँडाय् वने। 7 जिमि प्रिय, छ तसकं हिसि दु, छंके छुं नं ख्वं मदु। 8 हे जिमि भम्चा, लेबनानं जिनापं वा, धात्थें धाये, लेबनानं जिनापं वा। अमाना पर्वतया च्वकां क्वय् क्वहां वा, सेनीरया च्वकां, हेर्मोनया च्वकां क्वय् क्वहां वा, गन सिंहतय्गु गुफा दु, व चितुवात च्वनी। 9 छं जिगु मन लय्ताय्काः ब्यूगु दु, जिमि तसकं यःम्ह मय्जु, जिमि भम्चा छं जितः छक्वः जक स्वःगुलिं, अले छं क्वखायातःगु रत्नं जिगु मन लय्ताय्काः ब्यूगु दु। 10 छंगु मतिना गुलि जक यइपुस्से च्वं, जिमि तसकं यःम्ह मय्जु, जिमि भम्चा, दाखमद्य स्वयाः नं छं याःगु माया तसकं बांलाः। अले मेमेगु छुं नं मसला स्वयाः छंगु अत्तर नस्वाः वः। 11 छंगु म्हुतुसिं हाप्वःया कस्ति थें साःगु तिकितिकि वयाच्वनी। हे जिमि भम्चा, दुरु व कस्ति छंगु मेया क्वय् दु। छंगु वसःया नस्वाः लेबनानया देवदारुया नस्वाः थें च्वं। 12 हे जिमि तसकं यःम्ह मय्जु, जिमि भम्चा, छ बार तयातःगु बगैँचा थें, त्वःपुया तःगु बुँगाःचा थें, सुं मनूयागु निजी फोहोरा थें खः। 13 छंगु माचात धालेसिया बगैँचा थें खः, भिंगु फलं जाःगु बगैँचा मेहदी व जटामसी, 14 जटामसी व केशर, बोझो व दालचिनी, थीथी कथंया नस्वाःगु धुपाँय्या सिमात, मूर्र व कुनुस्वां अले फुक्क कथंया भिंगु नस्वाःगु मसला थें खः। 15 छ बगैँचाया बुँगाःचा थें खः, लेबनानं न्ह्याना वयाच्वंगु ताजा लःया तुं थें खः। ल्यासेम्ह मिसा 16 हे उत्तरया फय्, न्ह्यलं चाय्की। हे दच्छिनया फय्, न्ह्यां वा, जिगु बगैँचा जुया न्ह्याना हुँ, थुकिया नस्वाः तापाक्क हे थ्यनेमा। जिमि यःम्ह प्रिय थःगु बगैँचाय् वा, अले उकिया भिंगु फल नया स्व। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.