भजनसंग्रहया सफू 83 - नेवाः बाइबलइस्राएलया शत्रुतय्त बुकेत प्रार्थना आसापया भजन 1 हे परमेश्वर, छि नमवासें च्वनादी मते! सुम्क च्वनादी मते! शान्त जुयादी मते, हे परमेश्वर! 2 छाय्धाःसा छिकपिनि शत्रुत हाःहू यानाच्वंगु दु, छितः मयय्कीपिन्सं थःगु छ्यं धस्वाकूगु दु। 3 इमिसं छिकपिनि मनूतय्त स्यंकेत दुनें दुनें ग्वसाः ग्वयाच्वंगु दु, इमिसं छिं यय्कादीपिं मनूतय्गु विरोधय् जाः ग्वयाच्वंगु दु। 4 इमिसं धाल, “वा, झीसं इमित इमिगु जाति हे मदय्क नाश यानाबीनु, अले इस्राएलयात न्ह्यबलेंया लागि सकसिनं ल्वःमंकी।” 5 इमिसं छप्पँ जुयाः ग्वसाः ग्वःगु दु, अले छिगु हे विरोधय् सन्धि याःगु दु। 6 थुपिं एदोम व इश्माएलयापिं मनूत, मोआबीत व हग्रीत, 7 गबाली, अम्मोनी, अमालेकी, पलिश्ती व टुरोसयापिं मनूत खः। 8 लोतया सन्तानतय्त ग्वाहालि बीत थुपिंनापं अश्शूर नं मिले जूगु दु। सेला 9 छिं मिद्यानीतय्त अले कीशोन खुसिइ सीसरा व याबीनयात गथे यानादियागु खः, अथे हे इमित नं यानादिसँ। 10 इपिं एन्दोरय् नाश जुल, अले जमिनया लागि साः जुल। 11 इमि भारदारतय्त ओरेब व जएब थें यानादिसँ। इमि सकलें राजकुमारतय्त जेबह व सल्मुन्ना थें यानादिसँ। 12 इमिसं “परमेश्वरया ख्यः जिमिगु याये” धकाः धाःगु खः। 13 हे जिमि परमेश्वर, धू थें, फसं ब्वयेकूगु सुपः थें इमित छ्यालब्याल यानादिसँ। 14 मिं गुँ भस्म याःथें, मिजलां पहाड छ्वयेकूगु थें 15 वाफय् व ग्यानापुगु फसं इमित थरथर खाकाः लित्तुलिनादिसँ। 16 हे परमप्रभु, इमिगु ख्वाः लज्यां त्वःपुयादिसँ, अले इमिसं छिगु नां मालेमा। 17 इपिं न्ह्याबलेंया लागि बुइमा अले न्ह्याबलेंया लागि ग्यायेमा, इपिं लज्या चायाः सीमा। 18 छिगु नां परमप्रभु खः, इमिसं पृथ्वी न्यंकंयाम्ह दक्वसिबय् तःधंम्ह शासक खः धकाः म्हसीमा। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.