भजनसंग्रहया सफू 70 - नेवाः बाइबलग्वाहालिया निंतिं प्रार्थना दाऊदया भजन, लय् तइम्हय्सिगु निंतिं 1 हे परमेश्वर! जितः बचय् यानादिसँ। हे परमप्रभु, जितः ग्वाहालि यायेत याकनं झासँ। 2 जितः स्यायेत स्वःपिं लज्या चाये मालेमा, अले इतिमिति कनेमा। जिगु दुःखय् लय्तायाजूपिं लिज्यां वनेमा, अले मछालाः जुइमा। 3 “हः” धकाः जितः लाय्बुयाजूपिं मछालाः आछु-आछु कनाजुइमा। 4 छितः मालाजुइपिं धाःसा छिके लय्तायाच्वनेमा। अले छिं मुक्ति बीगु यःपिन्सं सदां थथे धयाच्वनेमा, “परमेश्वर गुलि तःधं!” 5 तर जि ला चीमिम्ह व छुं मदुम्ह मनू खः। हे परमप्रभु, छि जितः उद्धार याइम्ह व जिम्ह परमेश्वर खः। जितः ग्वाहालि यायेत याकनं झासँ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.