भजनसंग्रहया सफू 6 - नेवाः बाइबलदुःखया इलय् ग्वाहालिया निंतिं प्रार्थना दाऊदया भजन, लय् तइम्हसिया निंतिं – तार बाजानापं हालेगु 1 हे परमप्रभु! जितः तमय् ब्वःबियादी मते। थःगु तच्वःगु तमय् जितः सजाँय बियादी मते। 2 जि तसकं न्यले धुंकूगुलिं जितः दया यानादिसँ। जिगु क्वँय् तसकं स्याये धुंकूगुलिं जितः लाय्कादिसँ। 3 जिगु नुगः तसकं स्यानाच्वंगु दु। हे परमप्रभु, जिं गुबलय् तक पियाच्वनेगु? 4 हे परमप्रभु, जिपाखे फहिलादिसँ। अले जितः बचय् यानादिसँ। छिगु तःधंगु दयां जितः बचय् यानादिसँ। 5 सीधुंकाः छिगु नां सुनां काइ? सीगालं छितः सुनां तःधंकी? 6 झसुकाः ततं जि त्यानुइ धुंकल। चच्छिं ख्वयाः जिं थःगु लासा प्याकाच्वना। 7 ख्वख्वं जिगु मिखा बुलुइ धुंकल। जि शत्रुतय्सं यानाः ख्व जक ख्वयाः जिगु मिखा मनावये धुंकल। 8 अय् दुष्टत! जिथाय् च्वने मते। छाय्धाःसा परमप्रभुं जिगु ख्वःसः न्यनादी धुंकल। 9 परमप्रभुं जिगु प्रार्थना न्यनादी धुंकल। परमप्रभुं जिगु प्रार्थनाया लिसः बियादी। 10 जि शत्रुत फुक्कसिनं लज्या चायेमाली, अले ग्याइ। इपिं फुक्कं थत्थें मछालाः बिस्युं वनी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.