भजनसंग्रहया सफू 52 - नेवाः बाइबलपरमेश्वरया दया माया व न्याय दाऊदया भजन, लय् तइम्हय्सिगु निंतिं – एदोमी दोएगं शाऊलयाथाय् वनाः “दाऊद अहीमेलेकया छेँय् वन” धकाः खँ कं वंगु इलय् दाऊदं च्वःगु भजन। 1 अय् बल्लाःम्ह मनू! छं छाय् मभिंगु ज्या यानाः फुइँ यानाजुइगु? परमेश्वरया दया माया ला सदां दयाच्वनी। 2 न्हिच्छिं छं स्यंकेत ग्वसाः ग्वया जुइगु, छंगु मे ला ज्वःगु छुरि थें च्वं, छं मखुगु खँ ल्हायेगुलिइ तसकं जाः। 3 छं भिंगु स्वयाः मभिंगु यय्काजुल, खःगु खँ स्वयाः मखुगु खँ यय्काजुल। सेला 4 हे बेइमान मे, छन्त फुक्क स्यंकीगु खँ यः। 5 छन्हु छन्त ज्वनाः परमेश्वरं सदांया निंतिं नाश यानादी, वय्कलं छन्त छंगु छेँनं पित हयादी। अले म्वाःपिनिगु थासं छन्त हानापं ल्यहें थनाः वान्छ्वयादी। सेला 6 थ्व खनाः धर्मीत ग्याइ, इमिसं हेस्यानाः थथे धाइ, 7 “स्व, थ्व व हे मनू खः गुम्हय्सिनं परमेश्वरयात थःगु किल्ला मदय्कू, तर थःगु धनय् भलसा तल, मेपिन्त स्यंकाः थः बल्लात।” 8 जि ला परमेश्वरया छेँय् च्वंगु जैतूनया सिमा थें खः। परमेश्वरयागु दया मायाय् न्ह्याबलें विश्वास याना। 9 जिं न्ह्याबलें छिं यानादीगु ज्याया निंतिं छितः तःधंके, हे परमेश्वर! छिकपिनि विश्वास यायेबहःपिं मनूतय् न्ह्यःने जिं छिगु नांयात तःधंके, छाय्धाःसा छिगु नां भिं। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.