भजनसंग्रहया सफू 5 - नेवाः बाइबल

रक्षाया निंतिं प्रार्थना

दाऊदया भजन, लय् तइम्‍हसिया निंतिं – बाँसुरीनापं हालेगु भजन

¹ हे परमप्रभु! जिगु खँ न्‍हाय्‌पं बियाः न्‍यनादिसँ। जिगु झसुकाःयात बिचाः यानादिसँ।

² जिगु नुगःया खँ न्‍यनादिसँ, हे जिमि जुजु, जिमि परमेश्‍वर। छाय्‌धाःसा जिं छि हे छम्‍हसित जक प्रार्थना यानाच्‍वना।

³ हे परमप्रभु, सुथय् छिं जिगु सः न्‍यनादी। सुथय् सुथय् जिं छितः प्रार्थना याये, अले लिसः पियाच्‍वने।

⁴ छि मभिंगु ज्‍याय् लय्‌तायादीम्‍ह परमेश्‍वर मखु। दुष्‍टतय्‌गु मभिंगु ज्‍या यात छिं सह यानादी मखु

⁵ घमण्‍ड याइपिं छिगु न्‍ह्यःने च्‍वने फइ मखु। मभिंगु ज्‍या याइपिन्‍त छिं यय्‌कादी मखु।

⁶ मखुगु खँ ल्‍हानाजुइपिन्‍त छिं नाश यानादी। मनू स्‍यानाजुइपिं व झंगःलानाजुइपिं परमप्रभुयात तसकं मयः।

⁷ छिगु तःधंगु दयां यानाः जि धाःसा छिगु छेँय् दुहां वये। जिं छिगु पवित्र देगलय् पुलिं चुयाः छितः भागियाये।

⁸ हे परमप्रभु! जितः भिंगु लँय् यंकादिसँ। जिगु न्‍ह्यःने छिगु लँ तप्‍यंकादिसँ। मखुसा जि शत्रुतय्‌सं जितः त्‍याकी।

⁹ इमिगु म्‍हुतुइ खःगु खँ धयागु हे मदु। इमिगु नुगलय् स्‍यंकेगु खँ जक दु। इमिगु कथुप्‍वाः चालाच्‍वंगु चिहान थें खः इमिगु में च्‍वछायाः जक खँ ल्‍हाना जुइ।

¹⁰ हे परमेश्‍वर! इमित दोषी ठहरय् यानादिसँ। इमित इमिगु हे जालय् तक्‍यंकादिसँ। इमिगु यक्‍व अपराधया कारणं इमित पित छ्वयादिसँ। छाय्‌धाःसा इपिं छिगु विरोधय् जूगु दु।

¹¹ छिगु शरणय् वःपिं धाःसा लय्‌तायाच्‍वनेमा। अले न्‍ह्याबलें लसतां म्‍ये हालाच्‍वनेमा। छिं हे इमिगु रक्षा यानादिसँ। अले छिगु नांयात माया याइपिं लसतां जायाच्‍वनेमा,

¹² छाय्‌धाःसा परमप्रभु, छिं धर्मीतय्‌त सुवाः बियादी। छिं थःगु मायां इमित प्‍यखें ढालं थें रक्षा यानादी।