भजनसंग्रहया सफू 47 - नेवाः बाइबलपरमप्रभु पृथ्वी न्यंकया जुजु कोरह वंशयापिनिगु भजन, लय् तइम्हय्सिगु निंतिं 1 हे जाति जातियापिं फुक्क मनूत, ल्हाःपा था। ततःसलं परमेश्वरया जयजय या! 2 दक्वसिबय् तःधंम्ह परमप्रभुलिसे झी ग्यायेमाः, वय्कः पृथ्वी न्यंकया तःधंम्ह जुजु खः। 3 वय्कलं जाति जातियात झीगु अधीनय् हयादिल अले मनूतय्त झीगु पालि तःलय् लाकादिल। 4 वय्कलं झीगु लागि सर्बय ल्ययादिल। अले थ्व वय्कःया यःपिनिगु निंतिं गर्वया खँ खः। सेला 5 परमेश्वर प्रशंसाया सःलिसे सिंहासनय् च्वनादीगु दु, परमप्रभु तुरहीया सःलिसें सिंहासनय् च्वनादीगु दु। 6 परमेश्वरया प्रशंसा या, भजन हा! झी जुजुया प्रशंसा या, भजन हा! 7 परमेश्वर पृथ्वी न्यंकया जुजु खः, वय्कःयात प्रशंसा यानाः म्ये हा! 8 परमेश्वर थःगु पवित्र गद्दीइ च्वनादी, वय्कलं जाति जातियात शासन यानादी। 9 अब्राहामया परमेश्वरया मनूतनापं जाति जातिया शासकत मुंगु दु। छाय्धाःसा पृथ्वीइ च्वंपिं फुक्क जुजुत परमेश्वरया ल्हातय् दु। वय्कः तसकं तःधंम्ह खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.