भजनसंग्रहया सफू 128 - नेवाः बाइबलपरमप्रभुया आज्ञा न्यनीपिन्त सुवाः यरूशलेमय् थाहां वनेत हाःगु म्ये 1 धन्य खः परमप्रभुया भय काइपिं व वय्कःया लँपुइ जुइपिं फुक्क मनूत। 2 छं थःगु कमाइ नइबलय् छ लय्ताइ अले छन्त भिं जुइ। 3 छंगु छेँय् छिमि कलाः यक्व फल दुगु दाखमा थें, अले छिमि काय्म्ह्याय्पिं छंगु टेबिलया छचाःखेरं जैतूनया चुलित थें जुइ। 4 स्व, परमप्रभुया भय काइम्ह मनूयात थथे हे सुवाः दइ। 5 परमप्रभुं छ म्वानाच्वंतले सियोनं छन्त सुवाः बियादीमा। छं यरूशलेम च्वन्ह्याःगु खनेमा। 6 छं थः छय्-छुइपिन्त नं खनेमा। इस्राएलय् शान्ति जुइमा! |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.