भजनसंग्रहया सफू 100 - नेवाः बाइबलसुभाय्या भजन 1 हे पृथ्वीयापिं सकल मनूत, परमप्रभुया जयजय या। 2 लय्तातां परमप्रभुया आराधना या, लसतां जाःगु भजन हालाः वय्कःया न्ह्यःने वा। 3 परमप्रभु हे परमेश्वर खः धकाः सीकि। वय्कलं हे झीत दय्कादिल, झीपिं वय्कःया हे खः। अले झीपिं वय्कःया प्रजा व वय्कःया ख्यःयापिं फैत खः। 4 सुभाय् ब्युब्युं देगःया ध्वाखाय् दुहां हुँ, प्रशंसा यायां वय्कःया चुकय् हुँ, वय्कःयात सुभाय् ब्यु, अले वय्कःया नांया प्रशंसा या। 5 परमप्रभु भिंम्ह खः, वय्कःया दया माया सदां दयाच्वनी। वय्कः न्ह्याबलेंया लागि विश्वास याये बहःम्ह खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.