हितोपदेश 3 - नेवाः बाइबलल्याय्म्हतय्त उपदेश 1 हे जिकाय्! जिं स्यनागु खँ गुबलें नं ल्वःमंके मते। जिगु उजं नुगलय् स्वचाका ति। 2 जिं धया थें यात कि छ तःदँ तक म्वानाच्वनी, अले छ तःमि नं जुइ। 3 भक्ति व विश्वास गुबलें त्वःते मते। थुमित थःगु गःपतय् घाना ति, अले नुगलय् च्वयाति। 4 अले परमेश्वर व मनूतय्सं छन्त यय्की। अले इमिगु मिखाय् छंगु नां जाइ। 5 थःगु दुनुगलंनिसें परमेश्वरयाके भरोसा ति! थःम्हं स्यूगु खँय् जक नं जुइ मते। 6 न्ह्यागु याःसां परमप्रभुयात लुमंकि, वय्कलं छन्त लँ क्यनादी। 7 थःम्हं थःत सःस्यू धकाः जुइ मते। परमप्रभुयागु भय का, अले मभिंगु ज्या त्वःति। 8 थ्व छंगु म्हयात वासः जुइ अले क्वँय्यात बल जुइ। 9 थःके दुगु धन सम्पत्तिं व थःथाय् सःगु न्हापांगु बाली छायाः परमप्रभुयात हँ। 10 अथे यात धाःसा छंगु धुकू अन्नं जाइ, अले दाखमद्यया थल नं भय्बिक जाइ। 11 हे जिकाय्! परमप्रभुं न्वानादीगु खँयात बकंफुसुलु ताय्के मते। वय्कलं ब्वःबियादीबलय् तंचाये मते। 12 छाय्धाःसा बौनं थःत तसकं यःम्ह काय्यात ब्वःब्यूगु थें परमप्रभुं सुयात माया यानादी वयात ब्वः नं बियादी। बुद्धिं यानाः दइगु लसता 13 धन्य खः व मनू, गुम्हय्सिनं बुद्धि व लिग्यां लुइके फइ। 14 थ्व वहः स्वयाः कतिलाः, अले लुँ स्वयाः मू वं। 15 बुद्धि हिरामोती स्वयाः मू वं, छं थुकियात छुंलिसे नं लनेफइ मखु। 16 बुद्धिया जव ल्हातय् ताः आयु, अले उकिया खव ल्हातय् धनसम्पत्ति व इज्जत दइ। 17 थुकिं जीवनयात न्ह्याइपुसे च्वंगु लँय् न्ह्याकी, अले याउँक न्ह्याकी। 18 बुद्धियात ग्रहण याइपिनिगु निंतिं थ्व जीवनया सिमा खः। अले थ्वयात क्वातुक्क ज्वनातइपिं सदां लय्तायाच्वनी। 19 परमप्रभुं थ्व पृथ्वीयात वय्कःयागु बुद्धिं दय्कादिल। अले वय्कलं आकाशयात वय्कःयागु ज्ञानं दय्कादिल। 20 वय्कःया बुद्धिपाखें हे खुसिबाः वल, सुपाचं पृथ्वीइ वा गाय्कल। 21 हे जिकाय्! बुद्धि व विवेकयात ज्वनाति। थुमित तंके मते। 22 थुकिं छन्त न्ह्याइपुगु जीवन दइ। अले छंगु गःपःया तिसा जुइ। 23 थुकिं छन्त छंगु लँपुइ रक्षा याना तइ, अले छंगु तुति खाइ मखु। 24 छ मग्यासे लासाय् ग्वारातूवने फइ, अले चच्छिं छन्ह्यः यानाः द्यनेफइ। 25 दुष्टतय्त आकाझाकां वइगु विपत्तिपाखें छ ग्यायेमाली मखु। 26 छाय्धाःसा परमप्रभु छन्त रक्षा याइम्ह खः, वय्कलं छंगु पलाःयात जालय् क्यंकादी मखु। 27 छं फतले छंगु ग्वाहालि माःपिन्त ग्वाहालि या। 28 छं जःलाखःलायात थथें यायेफुगु ग्वाहालियात कन्हय् तक पीकातये मते। 29 छं थः जःलाखःलायात मभिंगु जाः ग्वयाजुइ मते छाय्धाःसा व छंगु भलसाय् छनापं च्वनाच्वंगु दु। 30 छन्त गुबलें छुं मभिंगु मयाःम्ह मनूलिसे म्वाःम्वाकं जवाःसवाः याना जुइ मते। 31 ल्वापुख्यापु यानाजुइपिं मनूतलिसे नुगः मुइकाजुइ मते। 32 थज्याःपिं मभिंपिं मनूत परमप्रभुयात मयः। धर्मी मनूतय्त धाःसा वय्कलं थःगु विश्वासय् कयादी। 33 दुष्टतय्गु छेँय् परमप्रभुयागु सराः लाइ धर्मीतय्गु छेँयात धाःसा वय्कलं आशिष बियादी। 34 वय्कलं तःधंछुना जुइपिन्त वास्ता यानादी मखु, क्वमिलुपिन्त धाःसा दया यानादी। 35 बुद्धि दुपिन्त इज्जत दइ, मूर्खतय्त वय्कलं मछालापुकादी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.