गन्ती 5 - नेवाः बाइबलअशुद्ध मनूतय्त छाउनीं पितिना छ्वयेमाः 1 परमप्रभुं मोशायात धयादिल, 2 “इस्राएलीतय्त छेंगूयागु पुनेयःगु ल्वय् दुपिं, धातुया ल्वय् दुपिं व सीम्ह थियाः अशुद्ध जूपिं दक्वसित छाउनीं पितिनाछ्व धकाः उजं ब्यु। 3 मिसाम्ह जूसां मिजंम्ह जूसां इमित छाउनीं पितिनाछ्व। इमिसं यानाः जि च्वनेगु छिमिगु छाउनी अशुद्ध मजुइमा।” 4 इस्राएलीतय्सं अथे हे यात। इमिसं अज्याःपिं मनूतय्त छाउनीं पितिनाछ्वत। परमप्रभुं मोशायात धयादी थें इस्राएलीतय्सं यात। मभिंगु ज्याया बं पुलेगु 5 परमप्रभुं मोशायात धयादिल, 6 “इस्राएलीतय्त धा, ‘परमप्रभुयात विश्वासघात यानाः छिपिं सुनानं सुयातं पाप ज्या यात धाःसा व मनू दोषी जुइ, 7 वं थःगु पापया प्रायश्चित यायेमाः। अले वं थःम्हं दुःख ब्यूम्ह मनूयागु छुं स्यंगु दुसा उकियागु पलेसा पुलेमाः। नापं न्याब्वय् छब्व अप्वः बं पुलेमाः। 8 व मनू सित, अले वयापाखें बं काइपिं सत्तीपिं सुं थःथिति नं मदुसा व बं परमप्रभुयागु जुइ। अले व पुजाहारीयात बीमाः। प्रायश्चितया निंतिं भ्याःचा नं बीमाः। 9 इस्राएलीतय्सं पुजाहारीयाथाय् परमप्रभुयात देछाये हःगु फुक्क पवित्र वस्तु पुजाहारीयागु जुइ। 10 छम्ह छम्ह मनूया पवित्र कोसेलि वयागु थःगु हे खः, तर वं पुजाहारीयात छु बी व पुजाहारीयागु हे जुइ।’” भाःतं शंका याःम्ह कलाःया जाँच 11 परमप्रभुं मोशायात धयादिल, 12 “इस्राएलीतय्त धा, ‘सुयां कलातं मखुगु लँपुइ वनाः थः भाःतयात विश्वासघात यात धाःसा 13 अले मेम्ह मिजंनापं द्यनाः अशुद्ध जूसां वया भाःतं थ्व खँ मस्यू, अले थुकिया साक्षी नं सुं मदु, 14 अथे हे भाःतम्हय्सित थः कलाः स्यंगु खःसां मखुसां शंका वन धाःसा 15 वं थः कलाःयात पुजाहारीयाथाय् हयेमाः। वं थःनापं देछाकथं छगू एपाया झिब्वय् छब्व तछ्व चुं नं हयेमाः। तछ्व चुं चिकं व धुपाँय् मतसे हयेमाः। छाय्धाःसा थ्व दोषयात लुमंकाबीगु अन्नबलि खः, अले नुगः मुयाः छायेहःगु बलि खः।’ 16 “‘पुजाहारीं व मिसायात परमप्रभुया न्ह्यःने थनेयंकेमाः। 17 पुजाहारीं चाया थलय् नीलः भचा कयाः उकी पवित्र पालया बँय् च्वंगु धू कयाः तयाबीमाः। 18 पुजाहारीं व मिसायात परमप्रभुया न्ह्यःने थनाः वयागु सँ फ्यनाबीमाः। अले वयागु ल्हातय् दसिया बलि अर्थात दाहया अन्नबलि तयाबीमाः। पुजाहारीं सराः लाइगु खायुगु लः थःगु ल्हातिइ कायेमाः। 19 अले पुजाहारीं व मिसायात पाफय्काः थथे धायेमाः, “छ मेपिं सुं मिजंनाप द्यनागु मदुसा, छ थः भाःतनापं ह्वनाः च्वनाबलय् छं थःत अशुद्ध यानागु मदुसा, छन्त थ्व खायुगु लखं छुं याइ मखु। 20 छ थः भाःत बाहेक मेम्हनापं जुयाः अशुद्ध जूगु दुसा, अले छिमि भाःत बाहेक मेम्ह मिजं छनापं द्यंगु दुसा” – 21 पुजाहारीं सराःया पाफय्काः व मिसायात थथे धायेमाः – “परमप्रभुं थ्व सराः लाइगु लखं छंगु प्वाथय् दुहां वनाः छंगु प्वाः मनावय्का बीमा अले छंगु मचाछेँ ध्वग्गीका बीमा। परमप्रभुं थथे यानादीमा, मिसाम्हयसित व्यभिचारया निंतिं सजाँय बीबलय् मेपिं मनूतय्सं वयात सराः बी अले ब्वःबी। इमिसं लिपाया इलय् सुयातं सराः बीबलय् वयागु नां दसुकथं छ्यली। 22 थ्व लः छंगु प्वाथय् दुहां वनाः प्वाः मनावयेमा, अले छंगु गर्भ ध्वग्गिकादीमा।” “‘अले व मिसां “आमेन, थथे हे जुइमा” धायेमा। 23 “‘पुजाहारीं थ्व सराः भ्वंथुलय् च्वयाः खायुगु लखय् सिला हुयाछ्वयेमाः। 24 अले वं सराः हइगु खायुगु लः मिसायात त्वंकेमाः। व दोषी खःसा, सराः लाइगु व लः वयागु म्हय् दुहां वनीबलय् उकिं वयात तसकं सास्ती याइ। 25 पुजाहारीं व मिसायागु ल्हातिं तछ्व चुंयागु अन्नबलि कयाः परमप्रभुया न्ह्यःने ल्ह्वनाः वेदीइ छायेमाः। 26 पुजाहारीं अन्नबलिं छम्हु कयाः लुमन्ति बलिकथं वेदीइ छ्वय्केमाः। अनंलि वं मिसायात लः त्वंकेमाः। 27 व मिसां थः भाःतयात धोखा बियाः थःत अशुद्ध याःगु खःसा व सराः हइगु लखं वयात तसकं सास्ती याइ, वयागु प्वाः मनावइ, वयागु मचाछेँ ध्वग्गी। मनूतय्गु दथुइ वयागु नां हे सराः जुइ। 28 अय्नं व मिसा अशुद्ध जूगु मदुसा अले शुद्धम्ह खःसा व दोषं मुक्त जुइ, अले व मस्त बुइके फुम्ह जुइ। 29 “‘दाहाया नियम थ्व खः, सुं मिसां थः भाःत बाहेक मेपिं मिजंतलिसे जुयाः थःत अशुद्ध याःसा, 30 अले सुं मिजंयात थः कलाः खनाः शंका वन धाःसा यायेमाःगु दाहया नियम थ्व हे खः। मिजंनं थः कलाःयात परमप्रभुया न्ह्यःने हयेमाः। अले पुजाहारीं थथे यायेमाः। 31 थज्याःगु ज्याय् मिजंयात छुं कथंया दोष लाइ मखु। मिसायागु दोष दत धाःसा वं सजाँय फयेमाली।’” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.