गन्ती 36 - नेवाः बाइबलछगू कुलया जमिन मेगु कुलय् मछ्वयेगु 1 योसेफया छुइ, मनश्शेया छय्, माकीरया काय् गिलादया वंशया थकालित मोशा व इस्राएली नायःतय्थाय् वयाः धाल, 2 “परमप्रभुं इस्राएलीतय्त सर्बयकथं गोला तयाः देश इनाबीत छितः उजं बियादीगु खः। अले जिमि किजा सलोफादया सर्बय वया म्ह्याय्पिन्त ब्यु धकाः नं परमप्रभुं छितः उजं बियादीगु खः। 3 इमिसं मेगु कुलयापिं मिजंतलिसे ब्याहा यात धाःसा इमिगु सर्बय नं मिजंतय्गु सर्बय नापं ल्वाकज्याःवनी। थुकथं जिमिगु कुलया सर्बय कम जुयावनी। 4 इस्राएलीतय्गु निंतिं लुँदँ वइबलय् इमिगु सर्बय इपिं ब्याहा याना वंगु कुलय् हे ल्वाकज्याःवनी। इमिगु सर्बय झी पुर्खातय्गु सर्बयपाखें लाका काइ।” 5 अले मोशां थथे धकाः परमप्रभुया उजं इस्राएलीतय्त बिल, “योसेफया सन्तानया कुलं धाःगु खँ पाय्छि जू। 6 सलोफादया म्ह्याय्पिनिगु खँय् परमप्रभुं थथे उजं बियादीगु दु – इमिसं थःपिन्त यःपिं थः बौया कुलया वंशया मिजंत नापं जक ब्याहा यायेमाः। 7 थथे याःसा छगू कुलयागु सर्बय मेगु कुलय् वनी मखु। थुकथं फुक्क इस्राएलीत थथःगु पुर्खाया कुलया सर्बयया जमिनय् हे दयाच्वनी। 8 इस्राएलीतय्गु कुलय् सर्बयया अंश काइपिं सुं नं म्ह्याय्मस्त दुसा, वं थःगु हे कुलया वंशया मिजंनाप ब्याहा यायेमाः। थुकथं इस्राएलया फुक्क कुलयाके थःपिनि पुर्खाया सर्बयया अंश दयाच्वनी। 9 छगू कुलया सर्बय मेगु कुलय् मवनेमा। थुकथं इस्राएलया फुक्क कुलया सर्बय न्हापा गुलि खः उलि हे दयाच्वनी।” 10 सलोफादया म्ह्याय्पिन्सं परमप्रभुं मोशायात बियादीगु उजंकथं हे यात। 11 सलोफादया म्ह्याय्पिं महला, तिर्सा, होग्ला, मिल्का व नोअहापिन्सं थः कका व तःबाःया काय्पिं नापं ब्याहा यात। 12 इमिसं योसेफया काय् मनश्शेया वंशय् हे ब्याहा यात। थुकथं इमिगु कुलया सर्बय इमिगु कुलय् हे ल्यनाच्वन। 13 परमप्रभुं यरीहो शहरया उखे यर्दन खुसिया सिथय् मोआबया ख्यलय् मोशापाखें इस्राएलीतय्त बियादीगु उजं व नियम थुपिं हे खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.