गन्ती 3 - नेवाः बाइबलहारूनया काय्पिनिगु नां 1 परमप्रभुं मोशालिसें सीनै पर्वतय् खँ ल्हानादीबलय् हारून व मोशाया परिवारया खँ थथे दु – 2 हारूनया काय्पिनिगु नां तःधिकःम्ह नादाब, अबीहू, एलाजार व ईतामार खः। 3 हारूनया थुपिं काय्पिं अभिषेक याःपिं अले पुजाहारी जुयाः ज्या यायेत ल्यःपिं खः। 4 नादाब व अबीहू धाःसा सीनैया मरुभूमिइ परमप्रभुयात छाये मत्यःगु मि छाःबलय् अन हे सित। इमि काय्मस्त नं मदुगुलिं एलाजार व ईतामारं जक थः बौ हारून म्वानाच्वंतले पुजाहारी जुयाः सेवा यात। पुजाहारीतय्त ग्वाहालि बीपिं लेवीत ल्यःगु 5 परमप्रभुं मोशायात धयादिल, 6 “लेवी कुलयापिन्त हारून पुजाहारीया न्ह्यःने हयाः इमित वयागु ज्याय् ग्वाहालि याकेब्यु। 7 इमिसं नापलायेगु पालय् पवित्र पालया ज्या यानाः हारून व फुक्क खलःया निंतिं यायेमाःगु ज्या याइ। 8 इमिसं नापलायेगु पालया फुक्क ज्वलंयागु जिम्मा कायेमाः। अले फुक्क इस्राएलीतय्गु निंतिं पवित्र पालया ज्या यायेमाः। 9 लेवीत फुक्क इस्राएलीतपाखें ल्यःपिं खः, परमेश्वरं इमित हारून व वया काय्पिन्त पवित्र पालय् पुजाहारीया ज्याय् ग्वाहालि यायेत बियादीगु खः। 10 छं हारून व वया काय्पिन्त पुजाहारी जुयाः सेवा यायेत ति। वने मत्यःपिं सुनानं नापलायेगु पालया सतिक वनेत स्वल धाःसा वयात स्यायेमाः।” 11 परमप्रभुं मोशायात धयादिल, 12 “जिं फुक्क इस्राएली मिसातय्पाखें न्हापां बूपिं काय्पिनिगु पलेसा लेवीतय्त कयागु दु। उकिं लेवीत जिमि थः मनू खः। 13 छाय्धाःसा न्हापां बूपिं फुक्कं जिम्ह खः। मिश्रय् न्हापां बूपिं फुक्कसित स्यानागु दिं इस्राएलया न्हापां बूपिं मनूत व पशुतय्त जिं थःगु हे निंतिं अलग तया। इपिं फुक्कं जिम्ह खः। जि परमप्रभु खः।” लेवीतय्त ल्याः खाःगु 14 सीनैया मरुभूमिइ परमप्रभुं मोशायात धयादिल, 15 “लेवीया सन्तानतय् लच्छि व लच्छिं च्वय्यापिं फुक्क मिजंत इमि वंश व परिवारकथं ल्याःखा।” 16 थुकथं थःत उजं ब्यूगु थें परमप्रभुया वचनकथं मोशां इमित ल्याः खात। 17 लेवीया काय्पिनिगु नां थथे दु – गेर्शोन, कहात व मरारी। 18 गेर्शोनया वंशया नां वया निम्ह काय्पिनिगु नामं तल – लिब्नी व शिमी। 19 कहातया वंशया नां वया पेम्ह काय्पिनिगु नामं तल – अम्राम, यिसहार, हेब्रोन व उज्जीएल। 20 मरारीया वंशया नां वया निम्ह काय्पिनिगु नामं तल – महली व मूशी। थथःगु परिवारकथं लेवीया वंशत थुपिं हे खः। गेर्शोनीतय्त ब्यूगु जिम्मा 21 गेर्शोनपाखें लिब्नी व शिमीया वंशत दत। गेर्शोनया वंशत थुपिं हे खः। 22 थुमि लच्छि व लच्छिं च्वय्यापिं मिजंतय्गु ल्याः ७,५०० म्ह दु। 23 गेर्शोनया वंशतय्सं नापलायेगु पालया लिक्क पच्छिमपाखे थःपिनिगु पाल ग्वयेमाः। 24 गेर्शोनीतय् परिवारया नायः लाएलया काय् एल्यासाप खः। 25 गेर्शोनीतय्त पवित्र पाल, उकिया इलां, पवित्र पालया लुखाया पर्दा, 26 चुकया प्येखेरं ख्वातुगु कापः, चुकया ध्वाखाया पर्दा, उकिया खिपः व अन माःगु फुक्क ज्वलंया रेखदेख यायेगु जिम्मा बिल। कहातीतय्त ब्यूगु जिम्मा 27 कहातपाखें अम्रामी, यिसहारी, हेब्रोनी व उज्जीएलीतय् वंशत दत। कहातीयागु वंशत थुपिं हे खः। 28 इमि लच्छि व लच्छिं च्वय्यापिं मिजंतय्गु ल्याः ८,६०० म्ह दु। इमित पवित्र पाल रेखदेख यायेगु जिम्मा बियातःगु खः। 29 कहातीतय् वंशतय्सं नापलायेगु पालया लिक्क दच्छिनपाखे थःगु पाल ग्वयेमाः। 30 कहातीतय् वंशतय् परिवारया नायः उज्जीएलया काय् एलीजापान खः। 31 इमित बाचाया सनू, तेबिल, त्वाःदेवा, गुँगू थनेगु वेदी व होमबलिया वेदी, महा-पवित्र न्ह्यःने दुगु पर्दा, अले पवित्र पालय् सेवा यायेत माःगु फुक्क ज्वलं, अले थ्व नापं स्वापु दुगु फुक्क सामान रेखदेख यायेगु जिम्मा बियातःगु खः। 32 हारून पुजाहारीया काय् एलाजार लेवी कुलया मू नायः खः। पवित्र पालया जिम्मा कयातःपिं फुक्क मनूतय्त स्वयेत वयात ल्यःगु खः। मरारीतय्त ब्यूगु जिम्मा 33 मरारीपाखें महली व मूशीया वंश दत। मरारीया वंश थुपिं हे खः। 34 इमि लच्छि व लच्छिं च्वय्यापिं मिजंतय्गु ल्याः ६,२०० म्ह दु। 35 मरारीतय् वंशतय् परिवारया नायः अबीहेलया काय् सूरीएल खः। इमिसं नापलायेगु पालया उत्तरपाखे थःगु पाल ग्वयेमाः। 36 मरारीतय्त पवित्र पालया सिँपौ, खगः, थां, लिधंसा व उकिया फुक्क हलंज्वलं, 37 अले प्यखेंया चुकया थां, लिधंसा, नकिं, खिपः अले उकी छ्यलेत माःगु फुक्क ज्वलं रेखदेख यायेगु जिम्मा ब्यूगु खः। 38 मोशा, हारून व वया काय्पिन्सं पुर्बपाखे नापलायेगु पालया लिक्क थःगु पाल ग्वयेमाः। इमित इस्राएलीतय्गु निंतिं नापलायेगु पालया बिचाः यायेगु जिम्मा ब्यूगु खः। वने मत्यःपिं सुं उकिया सतिक वंसा वयात स्यायेमाः। 39 परमप्रभुया उजंकथं मोशा व हारूनं ल्याःखाःपिं लेवीतय् लच्छि व लच्छिं च्वय्यापिं मिजंतय्गु ल्याः २२,००० म्ह दु। न्हापां बूपिं मिजंमस्तय्गु पलेसा लेवीतय्त कयादीगु 40 परमप्रभुं मोशायात धयादिल, “इस्राएलीतय् न्हापां बूपिं लच्छि व लच्छिं च्वय्यापिं मिजंतय्त ल्याः खानाः इमिगु नां धलः दय्कि। 41 इस्राएलीतय् न्हापां बूपिं काय्पिनिगु पलेसा छं लेवीतय्त का। अथे हे इस्राएलीतय् न्हापां बूपिं पशुतय् पलेसा लेवीतय् पशुतय्त का। जि परमप्रभु खः।” 42 अथे जुयाः परमप्रभुं मोशायात उजं बियादीगु थें वं इस्राएलीतय् न्हापां बूपिन्त ल्याः खात। 43 लच्छि व लच्छिं च्वय्यापिं न्हापां बूपिनिगु मुक्क ल्याः २२,२७३ म्ह दु। 44 परमप्रभुं मोशायात धयादिल, 45 “इस्राएलीतय् न्हापा बूपिं काय्पिनिगु पलेसा लेवीत व इमि न्हापां बूपिं पशुतय् पलेसा लेवीतय् पशु का। लेवीत जिमि थः मनू जुइ। जि परमप्रभु खः। 46 लेवीतय् ल्याः स्वयाः अप्वः दुपिं इस्राएलीतय् न्हापां बूपिं काय्पिनिगु ल्याः २७३ म्ह दु। थुमित लिफ्यायेत 47 छम्हय्सियागु मूकथं इमिपाखें न्यागू न्यागू शेकेल का। थ्व पवित्र पालया शेकेलकथं जुइमाः। छगू शेकेलय् निइगू गेरा दइ। 48 अले अप्वः दुपिं इस्राएलीतय्त लिफ्यायेगुकथं वःगु धिबा हारून व वया काय्पिन्त ब्यु।” 49 थुकथं मोशां लेवीतपाखें त्वःतुकूपिं स्वयाः अप्वः दुपिं मनूतय्त लिफ्यायेगु मू काल। 50 वं इस्राएलीतय् न्हापां बूपिनिपाखें पवित्र पालया शेकेलकथं १,३६५ शेकेल वहः काल। 51 अले परमप्रभुं मोशायात उजं बियादी थें वं थ्व धिबा हारून व वया काय्पिन्त बिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.