गन्ती 10 - नेवाः बाइबलवहःयागु निपु तुरही 1 परमप्रभुं मोशायात धयादिल, 2 “वहःयात मुगलं दायाः निपु तुरही दय्कि। थ्व तुरही खलःयात मुंकेत व छाउनी न्ह्यःने न्ह्याकेत छ्यलेगु या। 3 निपुं तुरही पुइबलय् फुक्क खलः नापलायेगु पालया ध्वाखाय् छंगु न्ह्यःने मुंवयेमाः। 4 छपु जक तुरही पुइबलय् इस्राएलया वंशया नायःत छन्थाय् मुंवयेमाः। 5 “छुमांकथं छं चिहाकलं तुरही पुइबलय् पुर्बपाखेया छाउनीया मनूत न्ह्याःवनेमाः। 6 निक्वः खुसी चिहाकलं तुरही पुइबलय् दच्छिन पाखेया छाउनी न्ह्याःवनेमाः। तुरहीया सः न्ह्याःवनेगुया छुमां खः। 7 मनूतय्त मुंकाः मुँज्या यायेबलय् धाःसा ताहाकलं तुरही पुइमाः। तर न्ह्याःवनेगु छुमां थें मखु। 8 “हारूनया पुजाहारी काय्पिन्सं हे तुरही पुइमाः। थ्व छिपिं व छिमि लिपायापिं पुस्तातय्त सदां सदांया लागि नियम जुल। 9 “छिमित क्वत्यलातःपिं शत्रुतलिसें छिमिगु थःगु देशय् लडाइँ याः वनीबलय् नं चिहाकलं छुमांया तुरही पु। अले छिमित परमप्रभु छिमि परमेश्वरं लुमंकाः छिमि शत्रुतपाखें बचय् यानादी। 10 छिमिसं लसताया ज्याखँय्, क्वःछिनातःगु नखःचखः व अमाइ पतिकं थःगु होमबलि व मेलबलि छायेबलय् नं तुरही पु। अले छिमि परमेश्वरयात छिपिं लुमनावइ। जि परमप्रभु छिमि परमेश्वर खः।” सीनै पर्वतं मोआव तक सीनै मरुभूमि त्वःतूगु गन्ती १०:११–२१:३५ 11 इस्राएलीतय्सं मिश्र त्वःता वंगु निगूगु दँया निगूगु लाया निइन्हु दुखुन्हु पवित्र पालया च्वं सुपाँय् चिला वन। 12 अले इस्राएलीत सीनै मरुभूमि त्वःताः न्ह्याः वन। सुपाँय् पारानया मरुभूमिइ मदीतले इपिं छगू थासं मेगु थासय् न्ह्याःवनाच्वन। 13 थुकथं मोशापाखें परमप्रभुं बियादीगु उजंकथं इपिं न्हापांखुसी न्ह्यज्यानावन। 14 दक्वसिबय् न्हापां यहूदाया कुलया पुचः थःगु झण्डा ज्वनाः न्ह्याः वन। अम्मीनादाबया काय् नहशोन थ्व पुचःया न्ह्यलुवाः खः। 15 अथे हे इस्साखार कुलया पुचःया न्ह्यलुवाः सूआरया काय् नतनेल खः। 16 जबूलून कुलया पुचःया न्ह्यलुवाः हेलोनया काय् एलीआब खः। 17 अले गेर्शोनी व मरारीतय्सं पवित्र पालयात क्वकयाः ल्ह्यल। 18 अनंलि रूबेनया छाउनीया पुचः थःगु झण्डा ज्वनाः न्ह्याः वन। इमि न्ह्यलुवाः शदेऊरया काय् एलीसूर खः। 19 शिमियोन कुलया पुचःया न्ह्यलुवाः सूरीशद्दैया काय् शलूमीएल खः। 20 अले गाद कुलया पुचःया न्ह्यलुवाः दूएलया काय् एल्यासाप खः। 21 अनं लिपा कहातीत पवित्र सामान व ज्वलं क्वबियाः न्ह्याः वन। इपिं थ्यने न्ह्यः हे मेगु छाउनीइ पवित्र पालयात धस्वाकातये धुंकीगु। 22 अनंलि थःगु झण्डा ज्वनाः एफ्राइमया छाउनीया पुचः न्ह्यात। इमि न्ह्यलुवाः अम्मीहूदया काय् एलीशामा खः। 23 मनश्शे कुलया पुचःया न्ह्यलुवाः पदासूरया काय् गमलिएल खः। 24 बेन्यामीन कुलया पुचःया न्ह्यलुवाः गिदेओनीया काय् अबीदान खः। 25 दक्वसिबय् लिपा दानया छाउनीया पुचः थःगु झण्डा ज्वनाः न्ह्यात। अम्मीशद्दैया काय् अहीएजेर इमि न्ह्यलुवाः खः। 26 आशेर कुलया पुचःया न्ह्यलुवाः ओक्रानया काय् पगीएल खः। 27 नप्ताली कुलया पुचःया न्ह्यलुवाः एनानया काय् अहीरा खः। 28 थुकथं थथःगु पुचःकथं इस्राएलीत न्ह्यज्यां वनीगु खः। मोशां थः ससःदाजुयात इनाप याःगु 29 अले मोशां थः ससःबौ मिद्यानी रूएलया काय् होबाबयात धाल, “परमप्रभुं जिमित बी धकाः धयादीगु थासय् जिपिं वनेत्यनागु दु। छि नं जिपिंनापं झासँ, जिमिसं छितः भिं हे याये छाय्धाःसा परमप्रभुं इस्राएलया बारे भिंगु बाचा यानादीगु दु।” 30 वं धाल, “जि वने मखु। जि थःगु हे देशय् थःथितिपिन्थाय् लिहां वने।” 31 मोशां धाल, “जिमित त्वःताः झाये मते! छाय्धाःसा छिं मरुभूमिइ गन गन छाउनी तयेमाः धकाः बांलाक स्यू। छिं जिमित लँ क्यनादी फइ। 32 छि जिपिंनापं झाल धाःसा परमप्रभुं जिमित छु आशिष बियादी व जिमिसं छिनापं इनाकाये।” मनूत न्ह्यःने न्ह्याःगु 33 परमप्रभुया पर्वत, सीनै त्वःताः इपिं स्वन्हु तक न्ह्याः वन। इमिगु निंतिं बाय् च्वनेगु थाय् मालेत परमप्रभुया बाचाया सनू थुपिं स्वन्हु तक हे इमिगु न्ह्यः न्ह्यः वन। 34 इपिं छगू बाय् त्वःताः मेगु थासय् न्ह्याः वनीबलय् न्हिच्छि परमप्रभुया सुपाँय् इमि च्वंच्वं जुयाच्वन। 35 बाचाया सनू न्ह्याकीगु इलय् मोशां न्ह्याबलें थथे धाइगु, “हे परमप्रभु, दनादिसँ! छिकपिनि शत्रुत छ्यालब्याल जुइमा! छितः घृणा याइपिं छिगु न्ह्यःनं बिस्युं वनेमा!” 36 बाचाया सनूयात दिकीबलय् वं थथे धाइगु, “हे परमप्रभु, द्वलंद्वः इस्राएलया मनूतय्थाय् लिहांझासँ!” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.