नहेम्याह 6 - नेवाः बाइबलज्या पनेत ग्वसाः ग्वःगु 1 जिं पखाः दय्के धुंकूगु व उकी छगू नं खालि थाय् मदुगु खँ सन्बलत, तोबिया व अरबी गेशेम व जिमि मेपिं शत्रुतय्गु न्हाय्पनय् थ्यन। खः ला उबलय् तक जिं ध्वाखातय् खापा धाःसा तयागु मदुनि। 2 सन्बलत व गेशेमं जितः ओनो ब्यासिइ लाःगु छगू गामय् वयाः इपिंलिसें खँल्हाबल्हा यायेत बुखँ छ्वयाहल। अय्नं थ्व जितः स्यंकेगु इमिगु छगू ग्वःसा खः। 3 उकिं जिं थथे धायेत दूतत छ्वयाः, “थुबलय् जिगु ल्हातय् छगू तःधंगु ज्या दु, व ज्या त्वःताः जि वयेमफु। थनयागु ज्या दिकाः जि छिमित नापलाः वयेमफु।” 4 इमिसं जिथाय् प्यकः थ्व हे बुखँ छ्वयाहल, छकःपतिकं हे जिं इमित अथे हे लिसः बिया। 5 अले सन्बलतं थः छम्ह च्यःयात झौ छाप मदुगु पौ बियाः न्याक्वः खुसी जिथाय् छ्वयाहल। 6 उकी थथे च्वयातःगु दु, “छ व यहूदीतय्सं विद्रोह यायेगु ग्वःसा ग्वयाच्वंगु दु, उकिं छिमिसं पखाः दय्काच्वंगु दु धयागु खँ जाति जातितय्थाय् हल्ला जुयाच्वंगु दु धकाः गेशेमं जितः धाःगु दु। छ थः हे इमि जुजु जुइत्यंगु दु धकाः मनूतय्सं नं धयाच्वंगु दु। 7 ‘यहूदाय् छम्ह जुजु दु’ धकाः घोषणा यायेत छं अगमवक्तात तःगु दु हँ। जुजुं थ्व खँ न्यँ हे न्यनी। उकिं वा, झीपिं नाप च्वनाः थुकिया बारे खँल्हाबल्हा यायेनु।” 8 अय्नं जिं वयाथाय् थथे धाय्के छ्वया, “छिं धाःगु खँ खःगु खँ मखु। व छिं हे दय्कूगु खँ खः।” 9 जिपिं कमजोर जुइमा अले जिमिगु ज्या गुबलें सिमधय्मा धइगु बिचाः यानाः इमिसं ज्या दिकेत जिमित ख्यायेत स्वइगु। जिं प्रार्थना याना, “हे परमेश्वर, जिमिगु ल्हाः बल्लाकादिसँ।” 10 उबलय् जि महेतबेलया छय् दलायाहया काय् शमायाहयात नापलाः वना। व छेँनं पिहां वयेमफु। वं जितः धाल, “झीपिं देगःया दुने परमेश्वरया छेँय् नापलायेनु, अले देगःया खापात तीनु। छाय्धाःसा छितः स्यायेत इपिं वयाच्वंगु दु। छितः स्यायेत इपिं चान्हय् वइ।” 11 अय्नं जिं शमायाहयात धया, “जि थें ज्याःम्ह मनू बिस्युं वनेगु ला? छु जि थें ज्याःम्ह मनू बचय् जुइत देगलय् वनेगु ला? जि वने मखु।” 12 हानं जिं थ्व खँय् बिचाः याना, शमायाहलिसें परमेश्वर न्ववानादीगु मखु, अय्नं तोबिया व सन्बलतं धिबा नकाः वयात अथे धाय्कूगु खः धकाः जिं सिल। 13 शमायाहं जितः ख्यानाः पाप याकेत अले बेइज्जत यायेत धिबा काःगु खः। 14 “हे जिमि परमेश्वर, तोबिया, सन्बलत, अगमवादिनी नोअदिया व जितः ख्यायेत स्वःपिं ग्वःम्ह अगमवक्तात दु, इपिं फुक्कसिगु थज्याःगु ज्या लुमंका तयादिसँ।” पखाः दय्केगु ज्या सिधःगु 15 नेय्निन्हु खुन्हु तक ज्या याये धुंकाः एलूल लाया निइन्यान्हु खुन्हु पखाःया ज्या सिधल। 16 जिमि शत्रुतय्सं थ्व खँ न्यंबलय् अले जःखः च्वंपिं फुक्क मेगु जातियापिन्सं थ्व खंबलय् इपिं तसकं लज्या चाल। अले थ्व ज्या जिमि परमेश्वरया ग्वाहालिं पूवंगु खः धकाः इमिसं सिल। 17 उबलय् नं यहूदायापिं भारदारतय्सं तोबियाथाय् यक्व पौ छ्वयाच्वंगु जुल, अले तोबियाया लिसः नं इमिथाय् वयाच्वंगु जुल। 18 यहूदायापिं यक्व मनूतय्सं वयात ग्वाहालि बी धकाः पाफःगु जुयाच्वन। छाय्धाःसा तोबियाया ससःअबु आराया काय् शकन्याह यहूदी खः। अले वया काय् यहोहानानं बेरेक्याहया काय् मशुल्लामया म्ह्याय्लिसें ब्याहा याःगु खः। 19 मनूतय्सं जिगु न्ह्यःने तोबियायात तःधंकीगु अले जिं धयागु खँ नं वयात न्यंकीगु। तोबियां जितः ख्यायेत पौ छ्वयाहया च्वनीगु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.