नहेम्याह 13 - नेवाः बाइबलविदेशीतपाखें अलग 1 उखुन्हु हे मनूतय्त मोशाया सफू ब्वना न्यंकल। उकी सुं नं अम्मोनी वा मोआबी परमेश्वरयागु सभाय् गुबलें दुहां वने दइ मखु धकाः च्वयातःगु लुइकल। 2 छाय्धाःसा इपिं मरि व लः ज्वनाः इस्राएलीतलिसे नापलाः मवः अले हानं इमित सराः बीत बालामयात ज्याला बियाः सःतल। अय्नं जिमि परमेश्वरं व सराःयात सुवाय् हिलादिल। 3 मनूतय्सं व व्यवस्था न्यनाः फुक्क विदेशी वंशयापिं सन्तानयात इस्राएलपाखें अलग तल। नहेम्याहं दकलय् लिपा ब्यूगु आज्ञा 4 थ्व जुइ न्ह्यः, जिमि परमेश्वरया देगःया धुकू स्वइम्ह पुजाहारी एल्यासीबयागु तोबियालिसें यक्व हे बांलाःगु स्वापु दुगु जुयाच्वन। 5 उकिं वं तोबियायात छकू तःकूगु क्वथा छ्यलेत ब्यूगु जुयाच्वन। न्हापा व क्वथाय् अन्नबलि, धुपाँय् व देगःया सामान अले लेवीत, म्ये हालीपिं व देगलय् पिवाःतय्गु निंतिं झिब्वय् छब्व अन्न, न्हूगु दाखमद्य, चिकं व पुजाहारीतय्गु निंतिं देछात तइगु खः। 6 थ्व फुक्क खँ जुयाच्वंबलय् जि धाःसा यरूशलेमय् मदु, छाय्धाःसा बेबिलोनयाम्ह जुजु अर्तासास्तया स्विइनिगूगु दँय् जि जुजुयाथाय् लिहां वनागु खः। छुं ई लिपा जुजुयाके मन्जुरी कयाः 7 जि यरूशलेमय् लिहां वया। थन एल्यासीबं तोबियायात परमेश्वरया देगःया चुकय् छकू क्वथा बियाः मभिंगु ज्या याःगु जिं सिल। 8 जितः थ्व तसकं मयल अले जिं व क्वथाय् दुगु तोबियायागु फुक्क सामान वांछ्वा बिया। 9 जिं क्वथात शुद्ध यायेगु आज्ञा बिया अले जिं उपिं क्वथातय् परमप्रभुया देगःया सामान, अन्नबलि व धुपाँय् हाकनं तयाबिया। 10 लेवीतय्त क्वःछिनातःगु इमिगु ब्व मब्यूगु खँ नं जिं सिल। उकिं देगलय् सेवाया जिम्मा काइपिं लेवीत व भजन हालीपिं सकलें थथःगु गामय् लिहां वन धइगु नं जिं न्यना। 11 उकिं जिं हाकिमतय्त हक्काः धया, “परमेश्वरया देगःयात छाय् वास्ता मयानागु?” अले जिं लेवीतय्त सःताः हाकनं इमिगु थथःगु हे ज्याय् तया। 12 अबलय् सकल यहूदीतय्सं हानं अन्न, दाखमद्य व चिकंया झिब्वय् छब्व धुकुतिइ हल। 13 देगःया धुकू स्वयेत जिं पुजाहारी शेलेम्याह, व्यवस्थाया स्यनामि सादोक व लेवी पदायाहयात जिम्मा बिया। जक्कूरया काय् व मत्तन्याहया छय् हानानयात इमि ग्वाहालिमि ल्यया। छाय्धाःसा इमित विश्वास बहःपिं मानय् याइगु अले थः दाजुकिजापिनिगु दथुइ इनेगु इमिगु ज्या खः। 14 हे जिमि परमेश्वर, जिगु थ्व ज्या जिगु भिंया निंतिं लुमंका तयादिसँ। अले जिं जिमि परमेश्वरया देगःयागु व उकिया सेवाया निंतिं थुलि विश्वास बहःम्ह जुयाः छु यानागु दु उकियात हुयाछ्वयादी मते। 15 उबलय् शबाथ खुन्हु यहूदायापिं मनूतय्सं दाखयात तिस्यानाच्वंगु व अन्न मुंकाः दाखमद्य, दाख, यःमरि व मेमेगु किसिमयागु कु गधाया म्हय् तयाच्वंगु जिं खना। इमिसं थुपिं फुक्क मीत यरूशलेमय् शबाथ खुन्हु हइगु जुयाच्वन। उकिं उखुन्हु नयेगु नसा म्यूगुलिं जिं इमित ख्याच्वः बिया। 16 यरूशलेमय् च्वनिपिं टुरोसयापिं मिजंतय्सं नं न्या व मेमेगु फुक्क किसिमयागु मीगु सामान हयाः शबाथ खुन्हु यहूदायापिं मनूतय्त मीगु जुयाच्वन। 17 अले जिं यहूदायापिं भारदारतय्त हक्काः धया, “शबाथयात अपवित्र यानाः छिमिसं थ्व छु यानागु? 18 छु छिमि पुर्खातय्सं नं थज्याःगु ज्या याःगुलिं झी परमेश्वरं झीके व थ्व शहरय् फुक्क विपत्तित हयादीगु मखु ला? आः छिमिसं शबाथयात अपवित्र यानाः अज्ज परमप्रभुया तं अप्वय्का इस्राएलतय्गु विरोध यानाच्वंगु दु।” 19 शबाथया न्ह्यः यरूशलेमया ध्वाखातय् खिउँसे च्वनावःबलय् जिं ध्वाखात तीगु व शबाथ सिमधःतले मचाय्केगु आज्ञा बिया। शबाथ खुन्हु छुं नं कु दुने हये मफयेमाः धकाः जिं ध्वाखाय् पिवाःत तया। 20 छकः निकः थीथी कथंया सामान मीपिं बन्जातय्सं यरूशलेमया पिने हे चा छ्याये माल। 21 जिं इमित थथे धयाः ख्याच्वः बिया, “छिपिं छाय् चान्हय् चान्हय् शहरया पखाः लिक्क च्वनाच्वनागु? छिमिसं हाकनं थथे यात धाःसा जिं छिमित सजायँ बी।” उखुन्हुंनिसें इपिं शबाथ खुन्हु वयेगु त्वःतल। 22 अले जिं लेवीतय्त थःत शुद्ध यायेत व शबाथयात पवित्र तयेत वनाः ध्वाखाय् पिवाः च्वनेत आज्ञा बिया। हे जिमि परमेश्वर, थ्व नं जिगु निंतिं लुमंका तयादिसँ। अले छिगु दया मायां जितः दया यानादिसँ। 23 उबलय् नं यहूदायापिं छुं मनूतय्सं अश्दोद, अम्मोन व मोआबयापिं मिस्तलिसे ब्याहा याःगु जिं खना। 24 इमि मस्त मध्ये बच्छिसिनं अश्दोदी भाय् ल्हाइगु वा मेपिं मनूतय्गु भाय् ल्हाइगु इमिसं यहूदाया भाय् ल्हाये मसः। 25 जिं इमित हक्काः सराः बिया, जिं छुं मनूतय्त दायाः अले इमिगु सँ पुया। अले जिं इमित जिपिं व जिमि काय् म्ह्याय्पिन्सं आवंलि गुबलय् नं मेगु जातिलिसे ब्याहा याये मखु धकाः परमेश्वरया नामय् पाफय्का। 26 जिं इमित धया, विदेशी मिस्तय्सं सोलोमन जुजुयात पाप याकेब्यूगु खः। व मेगु फुक्क जातियापिं जुजुपिं स्वयाः तःधं। परमेश्वरं वयात माया यानादिल, अले फुक्क इस्राएलयाम्ह जुजु ल्ययादिल। अय्नं वं थ्व हे पाप यात। 27 अले छु जिमिसं छिमिगु खँ न्यनेगु ला! अले विदेशी मिस्तलिसे ब्याहा यायेगु ला! झी परमेश्वरयात विश्वासघात यायेगु तसकं मभिंगु ज्या यायेगु ला! 28 दकलय् तःधंम्ह पुजाहारी एल्यासीबया काय् योयादाया छम्ह काय् होरोनी सन्बलतया जिलाजं खः, उकिं जिं वयात जिथासं तापाक्क लिना छ्वया। 29 हे जिमि परमेश्वर, इमित लुमंकादिसँ छाय्धाःसा पुजाहारीया ज्या यात व पुजाहारीतय् व लेवीतय्गु बाचायात अशुद्ध याःगु दु। 30 थुकथं जिं इमित फुक्क मेगु जातितपाखें शुद्ध याना, अले पुजाहारीतय्त व लेवीतय्त थथःगु ज्याय् ल्यया। 31 हानं जिं सिँया देछा हयेगु व न्हापा सःगु अन्न हयेगु ई क्वःछिना बिया। हे जिमि परमेश्वर, जिगु भिंया निंतिं जितः लुमंकादिसँ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.