नहेम्याह 11 - नेवाः बाइबलयरूशलेमय् च्वनिपिं मनूत 1 इस्राएलीयापिं नायःत यरूशलेमय् च्वन। मेपिं मनूतय्सं चिट्ठा तयाः झिम्हय् छम्ह मनू पवित्र शहर यरूशलेमय् वना च्वनेत ल्यल। मेपिं मनूत मेमेगु शहर व गामय् च्वन। 2 मनूतय्सं यरूशलेमय् च्वने मास्तिवय्कूपिं सकल मनूतय्त सुवाः बिल। 3 छुं इस्राएलीत, पुजाहारीत, लेवीत, देगलय् सेवा याइपिं, सोलोमनयाथाय् ज्या याइपिं मनूतय् सन्तान यहूदाया थीथी शहरय् दुगु थःगु हे जमिनय् च्वन। यहूदा व बेन्यामीन कुलयापिं छुं मनूत धाःसा यरूशलेमय् च्वन। यरूशलेमय् च्वंवःपिं प्रान्तयापिं मू मू नायःत थुपिं हे खः। 4 यहूदा कुलपाखें – उज्जियाहया काय् अतायाह, उज्जियाह जकरियाया काय् खः, जकरिया अमर्याहया काय् खः, अमर्याह शपत्याहया काय् खः, शपत्याह महलालेलया काय् खः। महलालेल फारेसया वंशयाम्ह खः। 5 बारुकया काय् मासेयाह, बारूक कोल-होजेया काय् खः, कोल-हाजे हजायाहया काय् खः, हजायाह अदायाहया काय् खः, अदायाह योयारीबया काय् खः, योयारीब जकरिया काय् खः। जकरियाह शेलह वंशयाम्ह खः। 6 यरूशलेमय् च्वनाच्वंपिं फारेसया सन्तान (४६८) म्ह दु। इपिं सकलें नांजाःपिं खः। 7 बेन्यामीनया कुलपाखें – मशुल्लामया काय् सल्लू, मशुल्लाम योएदया काय् खः, योएद पदायाहया काय् खः, पदायाह कोलायाहया काय् खः, कोलायाह मासेयाहया काय् खः, मासेयाह इथीएलया काय् खः, इथीएल यशयाहया काय् खः। 8 अले वया ल्यू जुइपिं गब्बै व सल्लै यानाः मुक्क ९२८ म्ह दु। 9 जिक्रीया काय् योएल इमि मू नायः खः अले हस्सेनूअया काय् यहूदा जिल्लायाम्ह नोकू खः। 10 पुजाहारीतपाखें – योयारीबया काय् यदायाह व याकीन, 11 हिल्कियाह मशुल्लामया काय् खः, मशुल्लाम सादोकया काय् खः, सादोक मरायोतया काय् खः, मरायोत परमप्रभुया देगः स्वइम्ह अहीतूबया काय् खः। 12 अले अदायाह यरोहामया काय्, यरोहाम पेलाल्याहया काय् खः, पेलाल्याह अम्सीया काय् खः, अम्सी जकरियाया काय् खः, जकरिया पशहूरया काय् खः, पशहूर मल्कियाहया काय् खः। थ्व वंशपाखें देगःया ज्या याइपिं ८२२ म्ह दु। 13 अज्रेलया काय् अमाश्शै, अज्रेल अहजैया काय् खः, अहजै मशिल्लेमोतया काय् खः, मशिल्लेमोत इम्मेरया काय् खः। अदायाहया ग्वाहालिमित व परिवारया नायःत मुक्क २४२ म्ह दु। 14 अमाश्शै व वया ग्वाहालिमित नांजाःपिं खः। इपिं १२८ म्ह दु। इमि मू हाकिम हग्गदोलीमया काय् जब्दीएल खः। 15 लेवीतपाखें – हश्शूबया काय् शमायाह, हशून अज्रीकामया काय् खः, अज्रीकाम हशब्याहया काय् खः, हशब्याह बुन्नीया काय् खः। 16 लेवीतय् नायःत सब्बतै व योजाबाद, इमिगु जिम्माय् परमप्रभुयागु देगःया पिनेया ज्या दु। 17 मीयकाया काय् मत्तन्याह, मीयका जब्दीया काय् खः। जब्दी आसापया वंशयाम्ह खः। व प्रार्थनाय् सुभाय् बीपिनि नायः खः। वया ग्वाहालिमित मध्ये निगूगु थाय् काइम्ह बक्बुक्याह, अले शम्मूअया काय् व गालालया छय् अब्दा। व यदूतूनया परिवारयाम्ह खः। 18 पवित्र शहरय् च्वनिपिं लेवीत मुक्कं २८४ म्ह दु। 19 देगलय् पिवाः च्वनिपिं – अक्कूब व तल्मोन अले ध्वाखाय् पिवाः च्वनिपिं इमि ग्वाहालिमित १७२ म्ह दु। 20 मेपिं इस्राएलीत, पुजाहारीत व लेवीत यहूदाया मेमेगु शहर व गामय् थथःगु सर्बयनापं च्वनीगु खः। 21 देगलय् सेवा याइपिं यरूशलेम दुने ओफेल त्वालय् च्वनीगु खः। इमि नायः सीहा व गिश्पा खः। 22 बानीया काय् व हशब्याहया छय् उज्जी यरूशलेमय् च्वंपिं लेवीतय् नायः खः। आसाप वंशयापिं मत्तन्याह व मीयका इमि पुर्खात खः। उपिं आसापया सन्तान परमेश्वरया देगःया सेवाया निंतिं भजन हालेगु जिम्मा काःपिं खः। 23 इमिसं देगःया संगीत ज्याझ्वः न्हियान्हिथं पालंपाः न्ह्याकेत जुजुं नियम दय्काब्यूगु खः। 24 इस्राएलीतय्गु फुक्क ज्याया निंतिं यहूदाया काय् जेरह वंशयाम्ह मशेजेबेलया काय् पतहियाह फारसयाम्ह जुजुया प्रतिनिधि खः। यरूशलेम पिने च्वंगु बस्ती 25 छुं यहूदी कुलयापिं मनूत थथःगु बुँ लिक्क लाःगु गामय् च्वनीगु खः। किर्यत-अर्बा व उकिया जःख च्वंगु बस्तीइ, दीबोन व उकिया जःखः च्वंगु बस्तीइ अले यकब्सेल व उकिया गामय्। 26 येशूअ, मोलादा, बेथ-पातेल, 27 हसर-शूआल, बेर्शेबा व उकिया जःखः च्वंगु बस्तीइ 28 सिक्लग, मकोना व उकिया बस्तीइ 29 एन-रिम्मोन, सोरा, यर्मूत, 30 जानोह, अदुल्लाम व उकिया गामय्, लाकीश व उकिया बुँइ अले आजेका व उकिया बस्तीइ। इपिं बेर्शेबांनिसें हिन्नोमया ब्यासि तक च्वनीगु खः। 31 बेन्यामीन कुलयापिं मनूत थुपिं थासय् च्वनीगु खः। गेबा, मिकमाश, अय्या, बेथेल व जःखःया गामय्, 32 अनातोत, नोब, हननिया, 33 हासोर, रामा, गित्तैम, 34 हादीद, सबोयीम, नबलत, 35 लोद, ओनो व गे-हरशीम ब्यासिइ नं। 36 यहूदाय् दुपिं छुं लेवीत बेन्यामीन कुलतय्गु गामय् वनाः अन हे च्वन। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.