मीका 6 - नेवाः बाइबल

इस्राएलीतय्‌गु विरोधय् परमप्रभुयागु द्वपं

¹ परमप्रभुं धयादीगु खँ ध्‍यान बियाः न्‍यँ– “दँ, पर्वतय् न्‍ह्यःने छिमिसं थःगु उजुर न्‍ह्यःने तयाब्‍यु, छिमिसं छु धाइ डाँडातय्‌सं न्‍यनेमा।

² “हे पर्वतत, हे पृथ्‍वीया बल्‍लाःगु जग परमप्रभुयागु द्वपं ध्‍यान बियाः न्‍यँ। छाय्‌धाःसा थः प्रजालिसे वय्‌कःया छगू मुद्दा दु, वय्‌कलं इस्राएलयात छगू अपराधया द्वपं बियादीगु दु।

³ “हे जिमि प्रजा, जिं छिमित छु याना? गथे यानाः जिं छिमित झ्‍यातुगु कु क्‍वबिकागु दु? जितः लिसः ब्‍यु।

⁴ जिं ला छिमित मिश्र देशं पित हया, छिमित दासत्‍वया देशं लिफ्‍याना हया। अले मोशा, हारून व मरियमयात छिमिगु नायः जुइत छ्वयाहया।

⁵ हे जि प्रजा, मोआबया जुजु बालाकं छु सल्‍लाह याःगु खः? अले बओरया काय् बालामं वयात छु लिसः बिल व लुमंकी। शित्तिमंनिसें गिलगाल तकयागु यात्रायात लुमंकी। अले छिमिसं परमप्रभुया धार्मिकताया ज्‍या सीके फयेमा।”

⁶ जि छु ज्‍वनाः परमप्रभुयाथाय् वयेगु, अले च्‍वय् च्‍वनादीम्‍ह परमेश्‍वरया न्‍ह्यःने छ्यं क्‍वःछुकेगु? दच्‍छि दच्‍छि दुपिं द्वहंचात हयाः होमबलिया लागि वय्‌कःया न्‍ह्यःने वये ला?

⁷ द्वलंद्वः भ्‍याःचा, अले जैतूनया चिकंयागु झिद्वः खुसिलिसें वय्‌कः लय्‌तायादी ला? जिं यानागु पाप व अपराधयागु लागि जिं जिम्‍ह तःधिकःम्‍ह काय्‌यात बीहये ला?

⁸ हे मनू, बांलाःगु अले भिंगु खँ वय्‌कलं छन्‍त क्‍यनादीगु दु। छपाखें परमप्रभुं छु यय्‌कादी? खःकथं ज्‍या यायेगु, मायायात यय्‌केगु, थः परमेश्‍वरलिसें क्‍वमिलु जुयाः जुयेगु।

इस्राएलया अपराध व सजाँय

⁹ न्‍यँ, परमप्रभुं यरूशलेमय् च्‍वंपिं सकसित सःता च्‍वनादीगु दु। हे परमप्रभु! छिगु नांया भय कायेगु ज्ञान खः। “राजदण्‍ड व उकियात ल्‍यःम्‍हय्‌सिगु खँ बांलाक न्‍यँ।

¹⁰ हे दुष्‍ट घराना, छिमिसं बांमलाःगु अले अधर्मयागु ज्‍या यानाः कमय् यानातःगु सम्‍पत्ति व छंगु ध्‍वंलाइगु धःताल्‍जु घच्‍चाइपुसे मच्‍वं ला?

¹¹ मिले मजूगु ताल्‍जु व छलया धःया म्‍हिचा तइम्‍हय्‌सित जिं गय् यानाः क्षमा बीगु?

¹² थनयापिं तःमिपिं मनूत ल्‍वापुख्‍यापुं जाःगु दु। थनच्‍वंपिं सकसिनं मखुगु खँ ल्‍हानाच्‍वंगु दु। इमिगु म्‍हुतुं छलया खँ ल्‍हानाच्‍वनी।

¹³ छिमिसं यानातःगु पाप व अपराधयागु कारणं जिं छिमित नाश याये त्‍यनागु दु।

¹⁴ छिमिसं यक्‍व हे नःसां छिमिगु प्‍वाः गुबलें हे जाइ मखु। अले न्‍ह्याबलें छिपिं नयेपित्‍याकाः च्‍वनेमाली। छिमिसं सम्‍पत्ति मुंका तःसां उकियात छिमिसं ल्‍यंकातये फइ मखु। छाय्‌धाःसा छिमिसं छु ल्‍यंका तइ उकियात जिं तरवारयात बी।

¹⁵ छिमिसं अन्‍न ह्वःसां लये खनी मखु अले जैतूनया चिकं पिकाःसां छ्यलेदइ मखु। अले दाख तिस्‍यूसां त्‍वने दइ मखु।

¹⁶ छिपिं ओम्रीया विधित व आहाबया घरानायागु दक्‍व खँ पालन यानाः इमिगु थितिकुथिया ल्‍यूल्‍यू जुयाच्‍वंगुलिं जिं छिमित नाश यानाबी। छिमि मनूत दक्‍वसिनं हेपय् याकाः च्‍वनाच्‍वने माली। अले जाति जातियापिं मनूतय्‌सं नं छिमित हेस्‍यानाच्‍वनी।”