मीका 4 - नेवाः बाइबलपरमप्रभुयागु पर्वत 1 लिपांगु न्हिइ परमप्रभुया देगः पलिस्था यानातःगु पर्वत मेगु फुक्क पर्वत स्वयाः मू वंगु जुयाः थापं जुइ। व हिमालत स्वयाः तसकं तःजाः जुइ, अले मनूत अन मूंवइ। 2 अले यक्व जातित वयाः थथे धाइ, “वा, झीपिं परमप्रभुया पर्वत, याकूबया परमेश्वरयागु देगलय् वनेनु। अनंलि वय्कलं हे झीपिं वय्कःयागु लँपुइ वने फयेमा धकाः झीत थःगु लँपु स्यनादी।” अले व्यवस्था सियोनं व परमप्रभुया वचन यरूशलेमं पिहां वइ। 3 वय्कलं यक्व जातितय्गु दथुइ न्याय यानादी। अले तातापाक च्वंपिं बल्लाःगु जातितय्गु ल्वापुख्यापु मिलय् यानादी। इमिसं थःगु तरवारयात मुगलं दायाः हलोया फली व भालायात मुगलं दायाः ईंचा दय्की। जाति जातितय् दथुइ ल्वापुख्यापु जुइ मखु, अले लडाइँया निंतिं सुनानं स्यनेकने याइ मखु। 4 दक्व मनूत थःगु दाखमाया क्वय् व थःगु यःमरिमाया क्वय् च्वनेगु याइ। सुनानं इमित ख्याइ मखु, छाय्धाःसा दक्व शक्ति दुम्ह परमप्रभुं हे न्ववानादीगु दु। 5 देश देशयापिं फुक्क मनूत थथःगु द्यःया ल्यूल्यू वंसां झीपिं धाःसा न्ह्याबलें परमप्रभु झी परमेश्वरया ल्यूल्यू वने। जिपिं धाःसा न्ह्याबलें न्ह्याबलें परमप्रभु जिम्ह परमेश्वरयागु नां कयाः जुयाच्वने। परमप्रभुयागु योजना 6 परमप्रभुं घोषणा यानादी, “उगु दिनय् जिं लँगडातय्त मुंके, अले ज्वनाः मेगु देशय् यंकूपिन्त व जिं दुःखय् लाकाबियापिं मनूतय्त मुंके। 7 लँगडातय्त जिं ल्यंकातये, तापाक लिनाछ्वःपिन्त जिं छगू बल्लाःगु जाति दय्के। परमप्रभुं इमित सियोन पर्वतय् न्ह्याबलें राज्य यानादी। 8 छ धाःसा, हे बथांया धरहरा, म्ह्याय् सियोनया किल्ला, छन्त न्हापायागु राज्य हाकनं लितबीगु जुइ, म्ह्याय् यरूशलेमयाथाय् हाकनं न्हापायागु राज्य वइ।” 9 हे यरूशलेम! आ छ छाय् ख्वयाच्वनागु? छंगु जुजु मदु ला? छन्त सल्लाह बीम्ह नाश जुल ला? छन्त मचाबू ब्यथा जूम्ह मिसायात थें दुःख जूगु दु ला? 10 हे म्ह्याय् सियोन, मचाबू ब्यथा जूम्ह मिसा थें सास्तीं छतपते जु, छाय्धाःसा आः छं थ्व शहर त्वःते हे माः अले मैदानय् पाल ग्वयाच्वनेमाः। आः छ बेबिलोनय् वनेमाली। अन हे छन्त त्वःतकीगु जुइ। अन हे परमप्रभुं छन्त शत्रुतय्गु ल्हातं त्वःतकादी। 11 आः यक्व हे जातित छंगु विरोधय् मुनाः छंगु बारे धाइ, “सियोन स्यना हे च्वनेमा अले जिमिसं व खनेमा।” 12 तर इमिसं परमप्रभुया बिचाःयात सीके मफु। इमिसं वय्कःयागु आजुयात नं थुइके मफु। वय्कलं इमित अन्न दायेगु थासय् थूत मुंकु थें इमित मुंकादी। 13 “हे सियोनया म्ह्याय्, दनाः अन्नयात दा, छाय्धाःसा जिं छन्त नँयागु नेकूत बी, जिं छन्त कँय्यागु ख्वः बी, अले छं यक्व हे जातितय्त कुचा कुचा याये फइ।” इमिगु अधर्मयागु कमाइ अले इमिगु सम्पत्ति सारा पृथ्वीयाम्ह परमप्रभुयात देछाइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.