लेवी 4 - नेवाः बाइबलपापबलि 1 परमप्रभुं मोशायात धयादिल, 2 “इस्राएलीतय्त थथे धा, ‘परमप्रभुं याये मते धयादीगु ज्याखँ मसीकं सुनानं पाप यात धाःसा वं थथे यायेमाः, 3 “‘अभिषेक जूम्ह पुजाहारीं पापयात धाःसा फुक्क मनूतय्त दोष लाःगु जुइ। थथे जूगुलिं वं याःगु पापया निंतिं छम्ह खू मदुम्ह द्वहंचा परमप्रभुया न्ह्यःने पापबलिकथं छायेमाः। 4 वं द्वहंयात नापलायेगु पालया ध्वाखाय् परमप्रभुया न्ह्यःने हयाः वयागु छेनय् थःगु ल्हाः तयाः परमप्रभुया न्ह्यःने स्यायेमाः। 5 अले अभिषेक जूम्ह पुजाहारीं द्वहंया हि कयाः पवित्र थाय्या दुने हयेमाः। 6 पुजाहारीं थःगु पतिंचा हिइ थुनाः व हि पवित्र थाय्या दथुइच्वंगु पर्दाय् न्हय्कः छ्वाकेमाः। 7 अले पुजाहारीं हि भतिचा कयाः पवित्र थासय् दुने परमप्रभुया न्ह्यःने च्वंगु गुँगू थनेगु वेदीया नेकुलिइ तिकेमाः। अले द्वहंया ल्यं दुगु हि नापलायेगु पालया ध्वाखाय् होमबलिया वेदीया तःलय् प्वंकेमाः। 8 पापबलिया द्वहंया फुक्क दाः लिकायेमाः। आतापुति भ्वरि त्वपुइगु दाः व उकिया च्वय्च्वंगु दाः नं लिकायेमाः। 9 निगः जलासेँ व उकिया च्वय् जँ नापं च्वंगु दाः, अले जलासेँ व सेँया भिंगु ब्व वं लिकायेमाः। 10 मेलबलि थें छाःम्ह सा वा द्वहंया दाः लिकयाः पुजाहारीं व होमबलिया वेदीइ छ्वय्केमाः। 11 तर द्वहंया छेंगू, फुक्क ला, छ्यं, तुति व आतापुति भ्वरि सौ नापं 12 पुजाहारीं थ्व फुक्क छाउनी पिने नउ वाइगु विधिकथं शुद्ध जूगु थासय् यंकाः सिँ द्यःने तयाः छ्वय्केमाः। 13 “‘इस्राएलया फुक्क मनूतय्सं परमप्रभुं याये मते धयादीगु ज्याखँ मसीकं यात धाःसा इमिसं थथे यायेमाः – 14 थःपिन्सं याःगु पाप पिज्वइबलय् इमिसं पापबलिया निंतिं द्वहंचा हयाः नापलायेगु पालया ध्वाखाय् छायेमाः। 15 खलःया थकालिपिन्सं परमप्रभुया न्ह्यःने द्वहंयागु छेनय् थथःगु ल्हाः तयेमाः, अले व द्वहंयात परमप्रभुया न्ह्यःने स्यायेमाः। 16 अनं लिपा अभिषेक जूम्ह पुजाहारीं व द्वहंयागु हि भतिचा कयाः पवित्र थासय् हयेमाः। 17 पुजाहारीं थःगु पतिंचा हिइ थुनाः व हि दथुइच्वंगु पर्दाय् न्हय्कः छ्वाकेमाः। 18 अनं लिपा पवित्र थाय्या दुने परमप्रभुया न्ह्यःने च्वंगु गुँगू थनिगु वेदीया नेकुलिइ व हि छुं भचा तिकेमाः। ल्यंगु हि धाःसा नापलायेगु पालया ध्वाखाय् होमबलिया वेदीया तःलय् प्वंकेमाः। 19 द्वहंया फुक्क दाः लिकयाः वेदीइ छ्वय्केमाः। 20 पापबलिया द्वहंयात वं गथे याःगु खः थ्व द्वहंयात नं अथे हे यायेमाः। थुकथं पुजाहारीं इमिगु निंतिं प्रायश्चित यायेमाः, अले इमित क्षमा दइ। 21 पुजाहारीं व द्वहंयात छाउनी पिने यंकाः न्हापांयाम्हय्सित छ्वय्कू थें छ्वय्केमाः। थ्व इस्राएलया फुक्क मनूतय्गु निंतिं पापबलि खः। 22 “‘सुं नायलं मसीकं परमप्रभु वया परमेश्वरं याये मते धयादीगु ज्याखँय् पापयात धाःसा वं थथे यायेमाः। 23 वं याःगु पाप वयाके पिज्वःसा वं छम्ह खू मदुम्ह दुगु थःगु बलिया निंतिं हयेमाः। 24 वं दुगुया छेनय् थःगु ल्हाः तयेमाः। परमप्रभुया न्ह्यःने होमबलिया पशु स्याइगु थासय् वयात स्यायेमाः। थ्व पापबलि खः। 25 अनंलि पुजाहारीं थःगु पतिंचां पापबलिया हि भतिचा कयाः होमबलिया वेदीया नेकुलिइ तिकेमाः। अले ल्यंगु हि वेदीया तःलय् प्वंकेमाः। 26 उकिया फुक्क दाः मेलबलिया दाः थें वेदीइ छ्वय्केमाः। थथे पुजाहारीं नायःया पापया लागिं प्रायश्चित याइ, अले वयात क्षमा दइ। 27 “‘खलःयाम्ह सुनानं मसीकं परमप्रभुं याये मते धयादीगु ज्याखँ यात धाःसा वं थथे यायेमाः। 28 वं याःगु पाप वयाके खनेदत धाःसा थःम्हं यानागु पापया निंतिं थःगु बलिकथं खू मदुम्ह च्वलय् हयेमाः। 29 वं शुद्ध जुइगु बलिया छेनय् थःगु ल्हाः तयेमाः अले होमबलिया थासय् स्यायेमाः। 30 अनंलि पुजाहारीं थःगु पतिंचां शुद्ध जुइगु बलि हि भतिचा कयाः होमबलिया वेदीया नेकुलिइ तिकेमाः। अले उकिया ल्यंगु हि वेदीया तःलय् प्वंकेमाः। 31 उकिया फुक्क दाः मेलबलिया दाः थें लिकायेमाः। अले पुजाहारीं परमप्रभुया निंतिं नस्वाः वय्केत वेदीइ छ्वय्केमाः। थथे पुजाहारीं उकिया निंतिं प्रायश्चित याइ, अले वयात क्षमा दइ। 32 “‘सुनानं पापबलिया निंतिं फैया मचा हल धाःसा वं खू मदुम्ह मिसाम्ह चिधिकःम्ह फै हयेमाः। 33 वं शुद्ध जुइगु बलिया छेनय् थःगु ल्हाः तयेमाः। होमबलिया पशुत स्याइगु थासय् वयात स्यायेमाः। 34 अनंलि पुजाहारीं थःगु पतिंचां शुद्ध जुइगु बलि हि भतिचा कयाः होमबलिया वेदीया नेकुलिइ तिकेमाः। उकिया ल्यंगु हि धाःसा वेदीया तःलय् प्वंकेमाः। 35 परमप्रभुयात छाःगु विशेष देछाया फुक्क दाः नापं मेलबलिया चिधिकःम्ह भ्याःचाया दाः थें पापबलिया फुक्क दाः वं लिकया उकियात पुजाहारीं वेदीइ छ्वय्केमाः। थथे वं याःगु पापया निंतिं पुजाहारीं वयागु लागिं प्रायश्चित याइ, अले वयात क्षमा दइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.