लेवी 26 - नेवाः बाइबलपरमप्रभुयागु नियम न्यनीपिन्त बीगु सिरपाः व्य ७:१२-२४ ; २८:१-१४ 1 “‘जि छिमि परमप्रभु परमेश्वर खः, अथे जुयाः छिमिसं थःगु लागि मूर्तित दय्के मज्यू। अले थःगु निंतिं पुजा यायेत गुगु नं झ्वाता, कियातःगु सिँया झ्वाता, ल्वहंया थां वा कियातःगु ल्वहं थने मज्यू। 2 “‘छिमिसं विश्रामबार हनेमाः, अले जिगु नापलायेगु पालयागु हनाबना तयेमाः। जि परमप्रभु खः। 3 “‘छिपिं जिगु नियमकथं न्हेज्यात धाःसा अले जिगु विधियात मानय् यात धाःसा, 4 जिं छिमिगु निंतिं पाय्छि इलय् वा वयेकाबी, गुकें यानाः बुँइ बाली सयावइ अले ख्यलय् च्वंगु सिमाय् फल सयावइ। 5 दाख मुनेगु ईतक छिमिसं बाली लयेगु ज्या याना हे च्वनी। अन्न पीगु इलय् नं छिमिसं दाख खानाच्वनी। छिमिसं लुधंक नयेखनी। छिपिं थःगु देशय् याउँक च्वनी। 6 “‘जिं छिमिगु देशय् शान्ति बी। छिपिं याउँक द्येने फइ। अले छिमित ख्याइपिं सुं दइ मखु। जिं देशं ग्यानापुपिं पशुत ख्याना छ्वये, अले छिमिगु देशय् लडाइँ जुइ मखु। 7 छिमिसं थःपिनि शत्रुतय्त लिनाः तरवारं स्याये फइ। 8 छिमि न्याम्हय्सिनं सच्छिम्हय्सित व सच्छिम्हय्सिनं झिद्वः मनूतय्त बुके फइ। छिमि शत्रुत छिमिगु तरवारं सिनावनी। 9 “‘जिं थःगु ख्वाः छिपिं पाखे स्वय्के, अले छिमित बांलाक ब्वलंकाः छिमिगु ल्याः अप्वय्काबी अले छिपिंनापं चिनातयागु बाचा पूवंकाबी। 10 छिमिसं न्हूगु बाली लये धुंकाः नं पुलांगु बाली नयाच्वनी। अले न्हूगु बालीया लागिं पुलांगु बाली लिकयाः छ्वये माली। 11 जि छिमिगु दथुइ थःगु हे पवित्र पालय् च्वंवये अले जिं छिमित मयय्के मखु। 12 जि छिपिंनापं हे च्वनाच्वने, अले छिमि परमेश्वर जुयाच्वने, छिपिं धाःसा जिमि मनूत जुइ। 13 जि छिमित मिश्र देशं पितहयाम्ह परमप्रभु छिमि परमेश्वर खः। छिपिं मिश्रीतय् दास जुयाच्वने मज्यू धकाः जिं छिमित मिश्रं पित हयागु खः। जिं छिमित झ्यातुगु कु लिकयाः छ्यं धस्वाकाः जुइपिं यानागु दु। परमप्रभुयागु नियम मानय् मयाइपिन्त बीगु सजाँय व्य २८:१५-६८ 14 “‘तर छिमिसं जिगु नियम मानय् मयात धाःसा, जिगु खँ मन्यन धाःसा, 15 जिगु नियमयात क्वह्यंकल धाःसा अले जिनापं चिनातःगु बाचा त्वथुल धाःसा, 16 जिं नं छिमिथाय् आकाझाकां भय छ्वयाहये, अले म्ह सुकुगना वनीगु, मिखायात स्यंकीगु, ग्यानपुसे च्वंगु ल्वय् छ्वयाहये। छिमिसं ह्वलातःगु पुसा अथें सितिं वनी छाय्धाःसा छिमि शत्रुतय्सं बाली नयाबी। 17 जिं थःगु ख्वाः फस्वय्के। गुकें यानाः छिपिं शत्रुतय्गु ल्हातिं बुइ। छिमित हेपय् याइपिन्सं छिमित शासन याइ, सुनानं लिनाच्वंगु मदुसां छिपिं बिस्युं वनाच्वनी। 18 “‘थुलि जुइ धुंकाः नं छिमिसं जिगु खँ मन्यन धाःसा जिं छिमित पापया न्हय्दुगं अप्वः सजाँय बी। 19 जिं छिमिगु घमण्ड चुंचुं याये। छिमिगु च्वय्यागु आकाश नँ थें व छिमिगु क्वय्या जमिन कँय् थें याये। 20 छिमिसं यक्व ज्या याःसां सितिं वनी छाय्धाःसा छिमिगु बुँइ अन्न सइ मखु। अले सिमाय् फल नं सइ मखु। 21 “‘छिपिं जिगु विरोधय् वना हे च्वन धाःसा अले जिं धा थें मयात धाःसा छिमिसं याःगु पापया हानं न्हय्दुगं अप्वः सास्ती छिमिथाय् छ्वया हये। 22 अले जिं छिमिगु दथुइ गुँपशु छ्वया हये। इमिसं छिमि मस्तय्त नयाबी। अले छिमि लहिनातःपिं पशुतय्त स्यानाबी। छिमिगु ल्याः थुलि कम जुइकि छिमिगु लँपुइ जुइपिं मनूत हे दइ मखु। 23 “‘थ्व तःधंगु सजाँय जुइ धुंकाः नं छिपिं जिपाखे मवल धाःसा अले जिगु विरोधय् वन धाःसा 24 जि नं छिमिगु विरोधय् वने, अले छिमिगु पापया लागिं जिं न्हय्दुगं अप्वः सजाँय बी। 25 छिमिसं जिगु बाचा त्वथूगुलीं जिं धात्थें हे छिमित सजाँय बी, अले गुबलय् छिपिं थथःगु शहरय् मुनाच्वनी, जिं छिमिगु दथुइ ल्वय् छ्वया हये। छिमित शत्रुतय्गु ल्हातय् बी। 26 अथे जूगुलिं जिं छिमिथाय् अन्न वय्केबी मखु। उबले झिम्ह मिसां छगू हे भुतुलिइ मरि छुइ। अले इमिसं छिमित नयेत बीबलय् सुयातं गाइ मखु। 27 “‘थ्व फुक्क जुयाः नं छिमिसं जिगु खँ मन्यन धाःसा जिगु विरोधय् वन धाःसा, 28 जि तंचायाः छिमिगु विरोधय् वने, अले छिमिगु पापया लागिं जिं छिमित हानं न्हय्दुगं अप्वः सजाँय बी। 29 छिमिसं थः हे काय् म्ह्याय्पिनिगु ला नयेमाली। 30 जिं छिमिगु पुजा यायेगु देगःचात स्यंकाबी, अले छिमिगु धुपाँय् च्याकेगु मकःयात नं स्यंकाबी, अले छिमिगु सीम्हयात उपिं जीवन मदुगु मूर्तितय्गु द्यःने तयाबी। जिं स्वइबलय् छिपिं घचाइपुसे च्वंपिं जुइ धुंकूगु दु। 31 जिं छिमिगु शहरत नाश यानाबी, छिमिगु पुजा यायेगु थाय्यात भज्यंक स्यंकाबी, अले छिमिसं ब्यूगु नस्वाः वःगु बलि नालाकाये मखु। 32 जिं देशयात नाश यानाबी। थ्व फुक्क खनाः अन च्वंवंपिं छिमि शत्रुत अजू चाइ। 33 जिं छिमित जाति जातिया दथुइ छ्यालब्याल यानाबी, अले तरवारं छिमित लिना च्वनी। छिमिगु देश झिजांमिजां दनी अले शहरत भज्यंक स्यनी। 34 गबले तक छिपिं शत्रुतय्गु देशय् च्वनाच्वनी, उबलय्तक छिमिगु थःगु देशं विश्राम काइ। देशं थःगु आरामया ई हनी। 35 छाय्धाःसा बुँयात बीमाःगु न्हय्दँया झासु लनेगु ई छिमिसं थःगु बुँयात मब्यूगुलिं आः धाःसा झिजामिजा दंगु बुँनं झासु लनेगु ई काइ। 36 “‘छिपिं म्वानाच्वंपिं, शत्रुतय्गु देशय् छिमिसं लप्ते हः कुतुवंगु सः ताइबलय् नं छिपिं तरवारं ल्यू वःगु धकाः ग्यानाः बिस्युं वनी। ल्यूवःपिं सुं मदुसां छिपिं बँय् क्वदइ। 37 सुनां ल्यू मवःसां छिपिं तरवार खनाः ग्यानाः बिस्युं वंपिं थें हे थःथवय् धक्का नयाः ग्वतुली। अथे जुयाः छिमि शत्रुतय्गु न्ह्यःने छिपिं दने फइ मखु। 38 अले छिपिं मेगु जातितय्गु दथुइ नाश जुइ। छिमि शत्रुतय् देशं छिमित नयाबी। 39 छिपिं मध्ये ल्यंदुपिं धाःसा शत्रुतय्गु देशय् थःगु व थः पुर्खातय्गु पापया हुनिं ध्वग्गिनावनी। 40 “‘थःम्हं व थः पुर्खातय्सं याःगु पाप व जिगु विरोधय् याःगु विश्वासघात व जि प्रति क्यंगु दुश्मनी मानय् यात धाःसा, 41 इमिगु विरोधय् वनाः जिं इमित शत्रुतय्गु देशय् हःगु खः धकाः इमिसं छाःगु नुगःयात क्वमिलु यानाः पापया मू पुल धाःसा 42 उबलय् जिं याकूबनापं चिनातयागु बाचा लुमंके। अले इसहाक नापं चिनातयागु बाचा व अब्राहामनापं चिनातयागु बाचा नं लुमंके। नापं जिं देशयात नं लुमंके। 43 इमिसं देश त्वःतल, इपिं मदय्कं नं देशं झासु लनेगु ई हनाच्वनी। लिपतय् इमिसं थःगु अर्धमयागु सजाँययात स्वीकार याइ छाय्धाःसा इमिसं जिगु नियम व विधि मानय् मयाःगु खः। अले इमिसं जिगु विधियात तसकं मय्कल। 44 थुलि जुयाः नं जिं शत्रुतय्गु देशय् च्वना च्वंसां इमित त्वःते मखु। अले इपिं नापं चिनातयागु बाचा नं त्वथुले मखु। इमित मयय्काः नाश याये नं मखु। छाय्धाःसा जि इमि परमप्रभु परमेश्वर खः। 45 तर जिं इमिगु लागिं इमि पुर्खातनापं चिनातयागु बाचा लुमंके। जि हे इमि परमेश्वर खः धकाः म्हसीकेत मेगु जातिं खंक हे इमित मिश्र देशं पित हयागु खः।’” 46 परमप्रभुं इस्राएलीतय्गु निंतिं सीनै पर्वतय् मोशायात बियादीगु विधि, नियम व व्यवस्था थ्व हे खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.