लेवी 24 - नेवाः बाइबलशुद्धगु चिकं व पवित्रगु मरि प्रस २७:२०-२१ 1 परमप्रभुं मोशायात धयादिल, 2 “इस्राएलीतय्त थथे उजं ब्यु, मत मदिक्क च्यानाः जः दयाच्वनेत छन्थाय् भिंगु जैतूनया शुद्धगु चिकं हयेमाः। 3 पवित्र पालय् साक्षीया सनूया न्ह्यःने दुगु पर्दाया पिने, परमप्रभुया न्ह्यःने सन्ध्याकाः इलंनिसें सुथय् तक मदिक्क हारूनं मत च्याका तयेमाः। थ्व छिमि पुस्तौं पुस्ताया लागिं न्ह्याबलेंया नियम खः। 4 हारूनं परमप्रभुया न्ह्यःने शुद्धगु लुँया त्वाःदेवाय् दुगु मतःयात न्हियान्हिथं बिचाः यायेमाः। 5 “अले भिंगु छुचुं कयाः छं झिंनिपा मरि छु। छपा छपा मरिइ छगू एपाया झिब्वय् निब्व छुचुं दयेमाः। 6 खुपा-खुपाया निपँ पँचिनाः निगू पँ परमप्रभुया न्ह्यःने भिंगु लुं भुनातःगु तेबिलय् ति। 7 अले थ्व मरिया निंतिं लुमन्तिकथं ब्व जुयाः परमप्रभुया निंतिं विशेष देछा जुइत छं पँपतिकं भिंगु धुपाँय् ति। 8 विश्रामबार पतिकं हारूनं न्हूगु मरि परमप्रभुया न्ह्यःने ब्वयातयेमाः। थ्व इस्राएलीतय्त न्ह्याबलेंया लागिं विधि खः। 9 अले थ्व मरि हारून व वया सन्तानतय्गु निंतिं खः। अले परमप्रभुयात छाःगु विशेष देछात मध्ये थ्व इमिगु न्ह्याबलेंया भाग तसकं पवित्र खः। अथे जुयाः इमिसं थ्व नापलायेगु पाल दुने नयेमाः।” परमप्रभुया नांयात क्वह्यंके मज्यू 10 छम्ह इस्राएली मिसाया काय् दु। वया अबु मिश्री खः। इस्राएली मिसाया व काय् इस्राएलीतनापं च्वनाच्वंगु खः। व छम्ह इस्राएली मनूनापं ल्वात। 11 व इस्राएली मिसाया काय्नं उबले परमप्रभुया नांयात क्वह्यंकाः सराः बिल। अले मनूतय्सं वयात ज्वनाः मोशायाथाय् हल। वया मांया नां शलोमीत खः। व दानया कुलया दिब्रीया म्ह्याय् खः। 12 परमप्रभुया इच्छा इमिसं मस्यूतले वयात कुनातल। 13 अले परमप्रभुं मोशायात धयादिल, 14 “व सराः ब्यूम्हय्सित छाउनी पिने यंकि अले वं धाःगु खँ न्यंपिं फुक्कसिनं थथःगु ल्हाः वयागु छेनय् तयेमाः, अनंलि फुक्क खलकं वयात ल्वहँतं कय्काः स्यायेमाः। 15 छं इस्राएलीतय्त थथे धा, ‘सुनानं थः परमेश्वरयात सराः बी, थुकिया निंतिं वं सजाँय फयेमाः। 16 सुं मनुखं परमप्रभुया नांयात क्वह्यंकाः सराः बिल धाःसा वयात फुक्क खलकं ल्वहँतं कय्काः स्यायेमाः। स्वदेशी जुइमा वा परदेशी जुइमा सुनानं परमप्रभुया नांयात क्वह्यंकाः सराः बिल धाःसा वयात स्याना हे छ्वयेमाः। 17 “‘सुनानं सुयातं स्यात धाःसा वयात नं स्याना हे छ्वयेमाः। 18 सुं मनुखं सुं मनूयाम्ह पशुयात स्यात धाःसा स्याःम्हय्सिनं पशुया थुवाःयात उकिया पलेसा बीमाः। 19 हानं सुं मनुखं थः जःलाखःलायात घाःपाः यानाबिल धाःसा वं गथे याःगु खः वयात नं अथे हे यायेमाः। 20 क्वँय् त्वथूगु दुसा उकिया पलेसा क्वँय् त्वथुलेगु, मिखाया पलेसा मिखा, वाया पलेसा वा। गथे वं सुयातं घाःपाः यानाब्यूगु दु वयात नं अथे हे यायेमाः। 21 पशु स्याःम्हय्सिनं उकियागु पलेसा पुलेमाः। मनू स्याःम्हय्सित धाःसा स्याना हे छ्वयेमाः। 22 स्वदेशीया निंतिं व विदेशीया निंतिं नियम छगू हे जुइमाः। जि परमप्रभु छिमि परमेश्वर खः।’” 23 मोशां इस्राएलीतय्त थ्व खँ धाल। अले इमिसं व सराः ब्यूम्हय्सित छाउनी पिने हयाः ल्वहँतं कय्काः स्यानाबिल। थथे परमप्रभुं मोशायात उजं बियादी थें इस्राएलीतय्सं यात। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.