लेवी 16 - नेवाः बाइबलप्रायश्चितया दिं 1 हारूनया निम्ह काय्पिं परमप्रभुया न्ह्यःने वनाः सी धुंकाः परमप्रभुं मोशालिसें खँ ल्हानादिल। 2 परमप्रभुं मोशायात धयादिल, “छिमि दाजु हारूनयात बाचा चिनादीगु सनूया द्यःने च्वंगु प्रायश्चितया कृपा-आसनया न्ह्यःने पर्दा दुने च्वंगु महा-पवित्र थासय् मंदुबलय् वये मते धा। मखुसा व सी। छाय्धाःसा जि अन सनूया च्वय् सुपाँचय् खनेदय्कः वयेगु खः। 3 “हारून महा-पवित्र थासय् दुहां वने न्ह्यः वं थुपिं उजं पालन यायेमाः, वं पापबलिया निंतिं छम्ह द्वहंचा व होमबलिया निंतिं छम्ह भ्याःचा हयेमाः। 4 अले वं म्ह छम्हं म्वःल्हुयाः सूती कापःया लंसुर्वाः फिनाः, तुयुगु विशेष कापःया हे दुवसः, सूती कापःया जनी चिनाः सूती कापःया बेतालि पुयाः वयेमाः। थ्व पवित्र वसः खः। 5 अले हारूनं इस्राएलीतय् खलःपाखें वयात पापबलिया निंतिं निम्ह दुगुचा व होमबलिया निंतिं भ्याःचा छम्ह हयेमाः। 6 “अनंलि हारूनं थःगु पापबलिया द्वहं छायेमाः अले थःगु व थः छेँजःया निंतिं प्रायश्चित यायेमाः। 7 अले वं व निम्हं दुगुचा यंकाः नापलायेगु पालया ध्वाखाय् परमप्रभुया न्ह्यःने तयाबीमाः। 8 अनं लिपा वं निम्ह दुगुचाय् गुम्ह परमप्रभुया निंतिं बलि बीगु अले गुम्ह त्वःताछ्वयेगु धकाः चिट्ठा तयेमाः। 9 परमप्रभुया निंतिं लाःम्ह दुगुचायात हयाः हारूनं पापबलिकथं परमप्रभुयात छायेमाः। 10 त्वःताछ्वयेगुलिइ लाःम्ह दुगुचायात म्वाःम्वाकं परमप्रभुया न्ह्यःने हयेमाः। अले मनूतय्गु पापया प्रायश्चितया निंतिं वयात मरुभूमिइ त्वःतेमाः। 11 “हारूनं थःगु व थःगु छेँजःया प्रायश्चितया निंतिं पापबलिया द्वहं हयेमाः। थःगु पापबलिया द्वहंयात स्याये धुंकाः 12 वं परमप्रभुया न्ह्यःने च्वंगु वेदीं जायेक मि च्याकातःगु मकः व निपा ल्हातिं जायेक नस्वाः वःगु विशेष धुपाँय्चुं कयाः महा-पवित्र थासय् दुने यंकेमाः। 13 वं परमप्रभुया न्ह्यःने मिइ धुपाँय्चुं तयेमाः। थुकिया कुं साक्षीया सनूया च्वय्च्वंगु प्रायश्चितया कृपा-आसनयात त्वपुइमाः, मखुसा व सी। 14 अनंलि वं द्वहंया हि भतिचा कयाः थःगु पतिंचां प्रायश्चितया कृपा-आसनया पुर्बपाखे हाः हाः यायेमाः। प्रायश्चितया कृपा-आसनया न्ह्यःने न्हय्कः तक पतिंचां व हि छ्वाकेमाः। 15 “अले वं मनूतय्गु पापबलिया निंतिं दुगुयात स्यायेमाः। उकिया हि भचा कयाः महा-पवित्र थासय् यंकाः द्वहंया हि हाः याः थें प्रायश्चितया कृपा-आसनया च्वय् व न्ह्यःने छ्वाकेमाः। 16 थुकथं वं इस्राएलीतय्गु पाप व अशुद्ध ज्याखँपाखें तच्वकं महा-पवित्रगु थाय्यात शुद्ध यायेत प्रायश्चित यायेमाः। अथे हे वं पवित्र पालया निंतिं नं अथे हे यायेमाः, छाय्धाःसा थ्व छाउनी इमिगु अशुद्धताया दथुइ दु। 17 हारून प्रायश्चित यायेत महा-पवित्र थासय् दुहां वनाः थःगु, थःगु छेँजःया निंतिं व फुक्क इस्राएलीतय्गु निंतिं प्रायश्चित यानाः पिहां मवतले पवित्र पालय् सुं नं च्वने दइ मखु। 18 “अले वं पिहां वयाः परमप्रभुया न्ह्यःने च्वंगु वेदीया लागिं प्रायश्चित यायेमाः। वं द्वहंया हि व दुगुचाया हि भतिभति कयाः वेदीया प्यखेरं च्वंगु नेकुलिइ तिकाबीमाः। 19 छुं भचा हि वं थःगु पतिंचां न्हय्कः तक उकी च्वय् हाः यानाः इस्राएलीतय्गु अशुद्ध ज्याखँपाखें वेदीयात शुद्ध व पवित्र यायेमाः। त्वःताछ्वःम्ह दुगुचा 20 “हारूनं महा-पवित्र थाय्, पवित्र पाल व वेदीया निंतिं प्रायश्चित याये धुंकाः ल्यंम्ह दुगुचा हयेमाः। 21 अले हारूनं थःगु निपा ल्हाः दुगुचिया छेनय् तयाः इस्राएलीतय्गु फुक्क मभिंगु ज्या, पाप व अपराधयात नालाः व फुक्क दुगुचिया छेनय् चीकेमाः। अनंलि व दुगुचित मरुभूमिइ यंकीम्ह मनूयात बियाछ्वयेमाः। 22 थुकथं व दुगुचां इमिगु फुक्क पाप क्वबियायंकी। व मनुखं वयात मरुभूमिइ त्वःताबीमाः। 23 “अनंलि हारूनं पवित्र पाल दुने वनाः महा-पवित्र थासय् वने न्ह्यः पुंगु तुयुगु विशेष कापःया वसः त्वयाः अन हे त्वःताथकेमाः। 24 अले पवित्र इलाकाय् हे म्वःल्हुयाः थःगु पुजाहारीया वसः पुनेमाः। अले अनं पिहां वयाः थःगु व मनूतय्गु निंतिं होमबलि छानाः प्रायश्चित यायेमाः। 25 वं पापबलिया दाः नं वेदीइ छ्वय्केमाः। 26 “मरुभूमिइ दुगुचा त्वःतःवंम्ह मनुखं थःगु वसः हियाः म्वःल्हुइमाः। अले व छाउनीइ लिहां वये फइ। 27 हिपाखें प्रायश्चित यायेत महा-पवित्रगु थासय् हःगु पापबलिया द्वहं व दुगुयात छाउनीं पिने यंकाः इमिगु छेंगू, ला व आतापुति मिइ छ्वयेका छ्वयेमाः। 28 छ्वयेकूम्ह मनुखं थःगु वसः हियाः म्वःल्हुइमाः, अले व छाउनीइ लिहां वने फइ। प्रायश्चितया दिं गुकथं हनेगु 29 “थ्व छिमिगु निंतिं न्ह्याबलेंया नियम खः। दँय्दसं न्हय्गूगु लाया झिन्हु खुन्हु छिमिसं छुं नये मते। अले छुं ज्या मयासें च्वनेमाः। थथे छिपिंनापं दुपिं पिनेयापिं मनूतय्सं नं यायेमाः। 30 छाय्धाःसा उखुन्हु हे छिमित शुद्ध यायेत छिमिगु निंतिं प्रायश्चित याइ। अले परमप्रभुया न्ह्यःने छिमिगु फुक्क पापपाखें छिपिं शुद्ध जुइ। 31 थ्व छिमिगु निंतिं झासु लनेगु विश्रामबार खः। थ्वखुन्हु छिमिसं छुं मनसें, छुं नं ज्या मयासें च्वनेमाः। थ्व छिमिगु निंतिं न्ह्याबलेंया नियम खः। 32 अभिषेक जूम्ह व बौया पलेसा दकलय् तःधंम्ह पुजाहारी जूम्ह पुजाहारीं हे प्रायश्चित यायेगु ज्या यायेमाः, अले पवित्र तुयुगु विशेष कापःया वसः पुनाः यायेमाः। 33 वं थ्व प्रायश्चित महा-पवित्र थाय्, पवित्र पाल, वेदी, पुजाहारीत व फुक्क इस्राएलीतय्गु निंतिं यायेमाः। 34 “छिमिसं आवंलि दँय् छकः न्ह्याबलें इस्राएलीतय्त इमिगु पापं शुद्ध यायेत थुकथं प्रायश्चित यायेगु थ्व छिमिगु लागिं न्ह्याबलेंया नियम खः।” अले परमप्रभुं मोशायात धयादी थें अथे हे यात। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.