लेवी 15 - नेवाः बाइबलमिजंतय् म्हया अशुद्ध खँ 1 परमप्रभुं मोशा व हारूनयात धयादिल, 2 “इस्राएलीतय्त धा, ‘सुं नं मिजंयात धातुया ल्वय् जुल धाःसा, व धातुया ल्वय्या हुनिं व मनू अशुद्ध जुइ। 3 वयागु म्हं धातु बाः वयाच्वंसा द्यूसां उकिं व मनूयात अशुद्ध याइ। 4 “‘धातुया ल्वय् दुम्ह मनू द्यंगु लासा व च्वंगु थाय् अशुद्ध जुइ। 5 सुनां वयागु लासा थी, वं थःगु वसः हीमाः, अले थःम्हं नं म्वःल्हुइमाः। सन्ध्याकाः ईतक व मनू अशुद्ध जुइ। 6 धातुया ल्वय् जूम्ह मनू च्वंगु थासय् च्वंम्ह मनुखं थःगु वसः हीमाः, अले म्वःल्हुइमाः। सन्ध्याकाः ईतक व अशुद्ध जुइ। 7 “‘सुनां धातुया ल्वय् दुम्ह मनूयात थी, वं थःगु वसः हीमाः, अले थःम्हं नं म्वःल्हुइमाः, सन्ध्याकाः ईतक व नं अशुद्ध जुइ। 8 “‘धातुया ल्वय् दुम्ह मनुखं शुद्धम्ह मनूयात थुकलं बिल धाःसा वं थःगु वसः हीमाः, अले थःम्हं नं म्वःल्हुइमाः। सन्ध्याकाः ईतक व अशुद्ध जुइ। 9 “‘व सल गइबलय् फ्यतुइगु फुक्क अले व च्वंगु थाय् नं अशुद्ध जुइ। 10 सुनां वया तःलय् लाःगु वस्तु थी, व सन्ध्याकाः ईतक अशुद्ध जुइ। सुनां अज्याःगु वस्तु ल्ह्वनाः काइ, वं थःगु वसः हीमाः, अले थःम्हं नं म्वःल्हुइमाः। सन्ध्याकाः ईतक व अशुद्ध जुइ। 11 “‘धातुया ल्वय् दुम्ह मनुखं थःगु ल्हाः मस्युसे सुयातं थिल धाःसा व मनुखं थःगु वसः हीमाः, थःम्हं नं म्वःल्हुइमाः, अले व सन्ध्याकाः ईतक अशुद्ध जुइ। 12 “‘व ल्वगिम्ह मनुखं चाया थल थिल धाःसा, थ्यूगु चाया थल तछ्याना छ्वयेमाः, सिँया थल जक लखं सिलाछ्वयेमाः। 13 “‘धातुया ल्वय् दुम्ह मनुखं थःगु ल्वय् लाये धुंकाः न्हय्न्हु तक पीमाः। न्हय्न्हुया दुने वं थःगु वसः हीमाः, नीलखं म्वःल्हुइमाः। अले व शुद्ध जुइ। 14 च्यान्हु खुन्हु वं निम्ह सुकुभत्तु वा बखुंया निम्ह मचा नापलायेगु पालया ध्वाखाय् परमप्रभुया न्ह्यःने यंकाः पुजाहारीयात बीमाः। 15 पुजाहारीं छम्ह शुद्ध जुइगु बलि निंतिं व छम्ह होमबलिया निंतिं छायेमाः। थुकथं पुजाहारीं परमप्रभुया न्ह्यःने वयागु ल्वय्या निंतिं प्रायश्चित यायेमाः। 16 “‘सुं मिजंया वीर्य कुतुंवल धाःसा वं म्ह छम्हं म्वःल्हुइमाः। अले सन्ध्याकाः ईतक व अशुद्ध जुइ। 17 वीर्य लाःगु वसः वा छेंगू नं लखं सिलाछ्वयेमाः, अले सन्ध्याकाः ईतक व अशुद्ध जुइ। 18 सुं मिजं मिसालिसे द्यनीबलय् वीर्य लात धाःसा इपिं निम्हय्सिनं नं म्वःल्हुइमाः, अले इपिं सन्ध्याकाः ईतक अशुद्ध जुइ। मिसातय् म्हया अशुद्ध खँ 19 “‘सुं मिसा थीमत्यः जुइबलय् व न्हय्न्हु तक अशुद्ध जुइ। सुनानं वयात थिल धाःसा सन्ध्याकाः ईतक व अशुद्ध जुइ। 20 “‘व द्यंगु थाय् व फ्यतूगु फुक्क थाय् अशुद्ध जुइ। 21 सुनां वयागु लासा थी, वं थःगु वसः हीमाः, थःम्हं नं म्वःल्हुइमाः, अले व सन्ध्याकाः ईतक अशुद्ध जुइ। 22 सुनां व च्वंगु वस्तु थी, वं थःगु वसः हीमाः, थःम्हं नं म्वःल्हुइमाः, अले सन्ध्याकाः ईतक अशुद्ध जुइ। 23 सुनानं व द्यंगु लासा वा व च्वंगु वस्तु थिल धाःसा व सन्ध्याकाः ईतक अशुद्ध जुइ। 24 “‘सुं नं मिजं व नापं द्यन धाःसा न्हय्न्हु तक व मिजं अशुद्ध जुइ। अले व द्यंगु लासा नं अशुद्ध जुइ। 25 “‘सुं मिसाया थीमत्यः जुइगु ई बाहेक तःन्हु तक हि बावयाः च्वन धाःसा अले थीमत्यः जूगु ई स्वयाः यक्व दिं हि बाः वल धाःसा हि बाः वयाच्वंतले व थीमत्यः जुइबलय् थें हे अशुद्ध जुइ। 26 अले थीमत्यः जुइबलय् थें हे व द्यंगु लासा अले व फ्यतूगु थाय् हि खने दुबलय् तक हे अशुद्ध जुइ। 27 सुनां थुपिं वस्तुयात थी व अशुद्ध जुइ। वं थःगु वसः हीमाः, अले थःम्हं नं म्वःल्हुइमाः। सन्ध्याकाः ईतक व अशुद्ध जुइ। 28 “‘हि खनेमदये धुंकाः न्हय्न्हु तक व मिसां पीमाः। अनंलि तिनि व शुद्ध जुइ। 29 च्यान्हु खुन्हु वं निम्ह सुकुभत्तु वा बखुंया निम्ह मचा नापलायेगु पालया ध्वाखाय् परमप्रभुया न्ह्यःने यंकाः पुजाहारीयात बीमाः। 30 पुजाहारीं छम्ह पापबलिया निंतिं व छम्ह होमबलिया निंतिं छायेमाः। थुकथं पुजाहारीं परमप्रभुया न्ह्यःने वयागु हि बावःगुया निंतिं प्रायश्चित यायेमाः। 31 “‘थुकथं छिमिसं इस्राएलीतय्त अशुद्ध याइगु खँपाखें अलग तयेमाः। मखुसा इमिसं थःपिन्थाय् च्वंगु जिगु पवित्र पालयात अशुद्ध याइ। अले इपिं थःपिनिगु अशुद्ध खँया हुनिं सी माली।’” 32 धातुया ल्वय् दुपिं व वीर्य कुतुं वइपिं मिजंतय्गु विधि थ्व हे खः, 33 अले थीमत्यः जुयाच्वंम्ह मिसा वा थीमत्यः जूगु बाहेक मेबलय् हिबा वयाच्वंम्ह मिसा, धातु ल्वय् दुम्ह मिजं, अले थीमत्यः जूम्ह मिसालिसे द्यनीम्ह मिजंलिसे गुकथं व्यवहार यायेमाः धयागु खँया विधि थ्व हे खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.