लेवी 14 - नेवाः बाइबलछेंगूया ल्वय्पाखें शुद्ध जुइगु 1 परमप्रभुं मोशायात धयादिल, 2 “छेंगूया पुनेयःगु ल्वचं कःम्ह मनूयात शुद्ध यायेगु इलय् वयात पुजाहारीयाथाय् हइबलय् यायेमाःगु विधि थथे खः। थःगु ल्वय् लने धुंकू थें च्वंसा 3 पुजाहारीयात छाउनीं पिने सःताः जाँचय् याकेगु। छेंगूया व पुनेयःगु ल्वय् लन धाःसा, 4 पुजाहारीं निम्ह शुद्धपिं झंगः, थाकुराःमाया कचा, ह्याउँगु का व हिसपमा हयेत उजं बीमाः। 5 पुजाहारीं छम्ह झंगःयात ताजा लः दुगु चाया थलया च्वय् तयाः स्यायेत उजं बीमाः। 6 अले वं मेम्ह झंगः, थाकुराःमाया कचा, ह्याउँगु का व हिसपमा कयाः ताजा लःया च्वय् स्याःम्ह झंगःया हिइ थुनेमाः। 7 वं न्हय्कः तक ल्वगिम्ह मनूयात उकिं हाः हाः यानाः शुद्ध थहरय् यायेमाः अले ल्यंम्ह झंगःयात चकंगु ख्यलय् त्वःताबीमाः। 8 “ल्वगिं थःगु वसः हियाः म्हय् च्वंगु फुक्क सँ खानाः म्वःल्हुइमाः। अले तिनि व धात्थें शुद्ध जुइ, अले छाउनीइ दुहां वने खनी। अय्जूसां न्हय्न्हु तक धाःसा व थःगु पालं पिने हे च्वनेमाः। 9 न्हय्न्हु दुखुन्हु वं हाकनं थःगु छेनय् च्वंगु सँ, दाह्रि, मिखाफुसि व म्हय् दक्व सँ खानाः, थःगु वसः हियाः म्वःल्हुइमाः। अले व धात्थें शुद्ध जुइ। 10 “च्यान्हु दुखुन्हु वं खू मदुपिं दच्छि दुपिं निम्ह चिधिकःपिं भ्याःचात व छम्ह मिसाम्ह चिधिकःम्ह फैचा, अन्नबलिया निंतिं जैतूनया चिकनय् बुलातःगु भिंगु छुचुं छगू एपाया झिब्वय् स्वब्व व छगू लिटरया स्वब्वय् छब्व चिकं हयेमाः। 11 पुजाहारीं नापलायेगु पालया ध्वाखाय् परमप्रभुया न्ह्यःने ल्वगियात व वं हःगु फुक्क ज्वलं यंकेमाः। 12 “पुजाहारीं चिधिकःम्ह भ्याःचा छम्ह व १/३ लिटर चिकं कयाः दोषबलिकथं छायेमाः। वं संकाबीगु बलिकथं परमप्रभुया न्ह्यःने उकियात छायेमाः। 13 अले वं पापबलि व होमबलि स्याइगु पवित्र इलाकाय् चिधिकःम्ह भ्याःचायात स्यायेमाः। छाय्धाःसा पापबलि पुजाहारीया जू थें दोषबलि नं वयागु हे जुइ। अले व तसकं पवित्र खः। 14 अले पुजाहारीं दोषबलिया हि भचा कयाः ल्वगिया जव न्हाय्पंया फ्वः, जव ल्हाःया बुरापतिं व जव तुतिया बुरापतिनय् तिकाबीमाः। 15 पुजाहारीं उगु १/३ लिटर मध्ये भचा चिकं कयाः थःगु खव ल्हाःपाय् तयेमाः। 16 अले पुजाहारीं थःगु जव च्वलापतिं उकी थुनाः न्हय्कः तक परमप्रभुया न्ह्यःने हाः हाः यायेमाः। 17 थःगु ल्हाःपाय् ल्यंगु चिकं भचा पुजाहारीं ल्वगिया जव न्हाय्पंया फ्वलय्, जव ल्हाःया बुरापतिं व जव तुतिया बुरापतिनय् दोषबलिया हिया द्यःने तिकाबीमाः। 18 अले थःगु ल्हाःपाय् ल्यं दुगु चिकं फुक्क पुजाहारीं ल्वगिया छेनय् तयाबीमाः। अले परमप्रभुया न्ह्यःने वयागु निंतिं प्रायश्चित यायेमाः। 19 “अले पुजाहारीं पापबलि छायाः ल्वगियागु निंतिं प्रायश्चित यायेमाः। अनं लिपा वं होमबलि स्यानाः 20 पुजाहारीं अन्नबलि नापं वेदीइ छायेमाः। अले ल्वगियागु निंतिं प्रायश्चित यायेमाः। थुकथं व शुद्ध जुइ। 21 “छुं जुयाः व उलिमछि छाये मफुम्ह जूसा वं थःगु प्रायश्चित याकेत, दोषबलिया निंतिं संकेत छम्ह जक चिधिकःम्ह भ्याःचा व अन्नबलिया निंतिं चिकं ल्वाकछ्यानातःगु छगू एपाया झिब्वय् छब्व भिंगु छुचुं व छगू लिटरया स्वब्वय् छब्व चिकं, 22 पापबलि व होमबलियात छम्ह छम्ह यानाः सुकुभत्तु जूसां बखुंचा जूसां निम्ह हयेमाः। 23 “च्यान्हु खुन्हु ल्वगिं थः शुद्ध जुइत नापलायेगु पालया ध्वाखाय् परमप्रभुया न्ह्यःने पुजाहारीयाथाय् थुपिं फुक्क हयेमाः। 24 पुजाहारीं दोषबलियाम्ह चिधिकःम्ह भ्याःचा छम्ह व चिकं कयाः संकाबीगु बलिकथं परमप्रभुया न्ह्यःने देछायेमाः। 25 पुजाहारीं चिधिकःम्ह भ्याःचायात दोषबलिया निंतिं स्यानाः दोषबलिया हि भचा कयाः ल्वगिया जव न्हाय्पंया फ्वः, जव ल्हाःया बुरापतिं व जव तुतिया बुरापतिनय् तिकाबीमाः। 26 पुजाहारीं भचा चिकं कयाः थःगु खव ल्हाःपाय् तइ, 27 अले पुजाहारीं थःगु जव च्वलापतिं उकी थुनाः न्हय्कः तक परमप्रभुया न्ह्यःने हाः यायेमाः। 28 थःगु ल्हाःपाय् दुगु चिकं छुं भचा कयाः पुजाहारीं ल्वगिया जव न्हाय्पंया फ्वलय्, जव ल्हाःया बुरापतिं व जव तुतिया बुरापतिनय् दोषबलिया हिया द्यःने तिकाबीमाः। 29 अले थःगु ल्हाःपाय् ल्यं दुगु चिकं फुक्क पुजाहारीं ल्वगिया छेनय् तयाबीमाः। अले परमप्रभुया न्ह्यःने वयागु निंतिं प्रायश्चित यायेमाः। 30 अनंलि वं फु थें निम्ह सुकुभत्तुत वा निम्ह बखुंत, 31 छम्ह पापबलिया निंतिं छम्ह होमबलिया निंतिं पुजाहारीं अन्नबलि नापं छायेमाः। थुकथं पुजाहारीं ल्वगिया निंतिं परमप्रभुया न्ह्यःने प्रायश्चित यायेमाः।” 32 छेंगूया पुनेयःगु ल्वचं काःपिं ल्वगितय्सं व मगाःमचाःपिं ल्वगितय्सं थःम्हं फु थें शुद्ध जुइत यायेमाःगु विधि थथे हे खः। खाःचिलूगु छेँ शुद्ध यायेगु 33 परमप्रभुं मोशा व हारूनयात धयादिल, 34 “जिं छिमित सम्पत्तिकथं बीत्यनागु कनान देशय् छिपिं च्वंवने धुंकाः अन च्वंगु सुयागुं छेँय् जिं खाःचिलुइकाबिल धाःसा 35 व छेँया थुवालं वनाः पुजाहारीयात थथे धायेमाः, ‘जिं जिगु छेँय् खाःचि थें छुं खनागु दु।’ 36 पुजाहारीं छेँ स्वःवने न्ह्यः छेँ खालि यायेत उजं बीमाः। उबलय् तक छेँय् च्वंगु छुं नं वस्तु अशुद्ध जुइ मखु। अनंलि पुजाहारी छेँ स्वयेत वनेमाः। 37 वं छेँय् खाःचिलूगु जाँच यायेमाः। छेँया अंगलय् वाउँक वा ह्याउँक अंगः स्वयाः गाःवंक खाःचिलुयाच्वंगु दुसा 38 पुजाहारीं छेँनं पिहां वनाः न्हय्न्हु तक छेँय् तालं ग्वयाः तयेमाः। 39 न्हय्न्हु दुखुन्हु वयाः पुजाहारीं हानं स्वयेमाः। छेँया अंगलय् च्वंगु खाःचि मेथाय् नं न्यनावनाच्वंगु दुसा 40 पुजाहारीं खाःचिलुयाच्वंगु ल्वहंयात लिकयाः शहरं पिने विधिकथं अशुद्धगु थासय् वान्छ्वय्के छ्वयेमाः। 41 अले वं अंगः छपातिं खुर्के याकेबीमाः, खुर्के यानाः वःगु चा वं शहरं पिने अशुद्धगु थासय् वान्छ्वय्के छ्वयेमाः। 42 अनंलि वं अंगलय् न्हूगु ल्वहं हयाः तिनाबीमाः, अले हाकनं लेवं इलाबीमाः। 43 “अथे यानाः नं हाकनं खाःचिलुयावल धाःसा 44 पुजाहारीं वनाः उकियात स्वयेमाः। अले खाःचि छेँय् न्यनावंगु दुसाः व छगू छगू नाश याइगु अशुद्धगु खाःचि खः। अले व छेँ अशुद्ध खः। 45 व छेँयात थुनाछ्वयेमाः, अर्थात थुकिया ल्वहं, सिँ, व चा फुक्कं थुना शहरं पिने अशुद्धगु थासय् वांछ्वये यंकेमाः। 46 “थ्व छेँ तिनातःबलय् सुं नं दुहां वन धाःसा सन्ध्याः ईतक व मनू अशुद्ध जुइ। 47 सुं नं थ्व छेँया दुने वनाः द्यन वा नल धाःसा वं थःगु वसः हीमाः। 48 “पुजाहारीं हाकनं छेँयात स्वःवइबलय् लेवं तये धुंकूबलय्निसें अशुद्धगु खाःचि खने मदयाच्वंसा व छेँयात वं शुद्ध भाःपीमाः। छाय्धाःसा आः खाःचि मदये धुंकल। 49 अले छेँ शुद्ध यायेत पुजाहारीं निम्ह शुद्धपिं झंगः, थाकुराःमाया कचा, ह्याउँगु का व हिसपमा हयेत धाइ। 50 पुजाहारीं छम्ह झंगःयात ताजा लः दुगु चाया थलया च्वय् तयाः स्यायेमाः। 51 अले वं मेम्ह झंगः, स्वसिमामाया कचा, हिसपमा व ह्याउँगु का कयाः स्याःम्ह झंगःया हि व ताजा लखय् थुनाः न्हय्कः तक खाःचिलूगु छेँयात उकिं हाः यायेमाः। 52 थुकथं वं झंगःया हि, ताजा लः, बलि मब्यूम्ह झंगः, स्वसिमामाया कचा, हिसपमा व ह्याउँगु का कयाः छेँ शुद्ध यानाबीमाः। 53 अनंलि वं मस्याःम्ह झंगःयात शहरं पिने चकंगु ख्यलय् त्वःताबीमाः। थुकथं वं व छेँया निंतिं प्रायश्चित यायेमाः, अले व छेँ शुद्ध जुइ।” 54 छेंगूया फुक्क कथंया पुनेयःगु ल्वय्, चासुल्वय्, 55 छेँय् लुइगु खाःचि, वसतय् वइगु फ्वसा, 56 मनावइगु, कै व दुबि 57 शुद्ध खः ला कि अशुद्ध खः धकाः सीकेगु विधि थ्व हे खः। छेंगूया पुनेयःगु ल्वय् व फ्वसा वःगुपाखें शुद्ध जुइगु थुकथं खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.