यहोशू 23 - नेवाः बाइबल

यहोशूं नायःतय्‌त हपाः ब्‍यूगु

¹ ताःई लिपा परमप्रभुं इस्राएलीतय्‌त प्‍यखेरं च्‍वंपिं फुक्‍क शत्रुतपाखें आराम बियादिल। अबलय् तक तसकं बुरा जुइ धुंकूम्‍ह यहोशूं

² सकलें इस्राएलीतय्‌त, इमि थकालित, नायःत, न्‍याय याइपिं व भारदारतय्‌त सःताः धाल, “जि आः तसकं बुरा जुइ धुंकल।

³ छिमिगु निंतिं परमप्रभु छिमि परमेश्‍वरं थुपिं फुक्‍क जातितय्‌त छु छु यानादिल, व फुक्‍क खंगु दु। छिमिगु निंतिं लडाइँ यानादीम्‍ह छिमि परमप्रभु परमेश्‍वर खः।

⁴ जिं गथे यानाः यर्दन खुसिंनिसें पच्‍छिमय् भूमध्‍यसागर तकयापिं जिं त्‍याकाःपिं अले ल्‍यंदुपिं जातितय्‌गु फुक्‍क इलाका चिट्ठा ततं छिमिगु कुलतय्‌त सर्बयकथं इनाबियागु खः व लुमंकि।

⁵ परमप्रभु छिमि परमेश्‍वर थःम्‍हं हे छिमिगु न्‍ह्यःने इमित पित छ्वयादी। अले परमप्रभु छिमि परमेश्‍वरं धयादी थें छिमिसं इमिगु देश अधिकार याइ।

⁶ “तसकं बल्‍ला जु। मोशायागु व्‍यवस्‍थाया सफुलिइ च्‍वयातःगु फुक्‍क खँ बांलाक मानय् या। उकिं छिपिं जव खवय् वने मते।

⁷ छिमिगु दथुइ ल्‍यंदुपिं थुपिं जातितनापं स्‍वापु तये मते, इमि द्यःतय्‌गु नां काये मते, इमिगु नामय् पाफये मते। इमित पुजा याये मते अले इमित भागियाये मते।

⁸ तर छिमिसं थौं तक याःथें परमप्रभु छिमि परमेश्‍वरनापं जुयाच्‍वँ।

⁹ “परमप्रभुं छिमिगु न्‍ह्यःनें ततःधंगु व बल्‍लाःगु जातितय्‌त पित छ्वयादीगु दु। थौं तक सु नं छिमिगु न्‍ह्यःने दनाच्‍वने मफुत।

¹⁰ छिमि छम्‍हय्‌सिनं द्वःछिम्‍हय्‌सित लिनाछ्वये फइ, छाय्‌धाःसा परमप्रभुं थःगु बचंकथं छिमिगु निंतिं ल्‍वानादी।

¹¹ अथे जुयाः परमप्रभु छिमि परमेश्‍वरयात माया यायेत बांलाक ध्‍यान ब्‍यु।

¹² “छिमिसं परमेश्‍वरयात त्‍वःतल धाःसा अले छिमिगु दथुइ ल्‍यंदुपिं जातितलिसें स्‍वापु तल धाःसा अले इपिंलिसें ब्‍याहा यात धाःसा

¹³ परमप्रभु छिमि परमेश्‍वरं थुपिं जातितय्‌त छिमिगु न्‍ह्यःनें पित छ्वयादी मखु धयागु खँ सीका का, तर इपिं छिमिगु लागिं तक्‍यंकीगु जाः व स्‍वःतिपाँय् जुइ अले छिमिगु म्‍ह ल्‍युने कोर्रा व मिखाय् कँ जुइ। अले परमप्रभु छिमि परमेश्‍वरं छिमित बियादीगु थ्‍व भिंगु थासं छिपिं मदया मवंतले थ्‍व खँ जुया हे च्‍वनी।

¹⁴ “आः जि सीत्‍यंगु दु। परमप्रभु छिमि परमेश्‍वरया फुक्‍क बचं पूवंगु दु, छगू नं पूमवंगु मदु धयागु खँ छिमिसं थथःगु नुगः व आत्‍मां सि हे स्‍यू।

¹⁵ तर परमप्रभु छिमि परमेश्‍वरयागु फुक्‍क भिंगु बचं पूवंगु थें वय्‌कलं छिमित बियादीगु थ्‍व भिंगु देशं छिमित नाश यानामदीतले वय्‌कलं छिमिथाय् फुक्‍क विपत्ति नं छ्वयाहयादी।

¹⁶ परमप्रभु छिमि परमेश्‍वरं छिपिंलिसें चिनादीगु बाचा छिमिसं मानय् मयात धाःसा अले मेपिं द्यःतय्‌गु सेवा व पुजायात धाःसा वय्‌कलं थःगु तम्‍वय् छिमित सजाँय बियादी। अले वय्‌कलं छिमित बियादीगु थ्‍व भिंगु देशं छिपिं याकनं नाश जुयावनी।”