यहोशू 22 - नेवाः बाइबलयहोशूं पुर्बया कुलतय्त बिदा ब्यूगु 1 अले यहोशूं रूबेनी, गादी व मनश्शेया बच्छि कुलयात सःताः 2 इमित धाल, “परमप्रभुया दास मोशां छिमित ब्यूगु फुक्क आज्ञा छिमिसं मानय् याःगु दु, अले जिं धयागु फुक्क खँ नं छिमिसं मानय् याःगु दु। 3 ताःइलंनिसें थौं तक नं छिमिसं मेपिं इस्राएलीतय्त त्वःतूगु मदु, तर परमप्रभु थः परमेश्वरयागु आज्ञा बांलाक मानय् याःगु दु। 4 आः छिमि परमप्रभु परमेश्वरं छिमि मेपिं इस्राएलीतय्त नं थःगु बचंकथं आराम बियादी धुंकूगु दु। उकिं परमप्रभुया दास मोशां यर्दन पारि छिमित ब्यूगु थःगु जमिन दुगु थथःगु छेँय् लिहां हुँ। 5 परमप्रभु छिमि परमेश्वरयात माया या, वय्कःया लँपुइ हुँ, उकियात गुबलें त्वःते मते, वय्कःया खँ न्यँ। दुनुगलंनिसें व बलं फत्तले वय्कःया सेवा या धकाः परमप्रभुया दास मोशां छिमित ब्यूगु आज्ञा व व्यवस्था बांलाक मानय् या।” 6 अले यहोशूं इमित सुवाः बियाः बिदा बिल, अले इपिं थथःगु छेँय् वन। 7 मनश्शेया बच्छि कुलयात ला मोशां बाशानय् जमिन ब्यूगु खः। मनश्शेया मेपिं बच्छियात धाःसा यहोशूं यर्दनया पच्छिमपाखे मेपिं इस्राएलीतय्गु दथुइ जमिन बिल। उकिं यहोशूं इमित छेँय् छ्वःबलय् सुवाः बियाः 8 थथे धाल, “यक्व धन-सम्पत्ति व पशुतय्गु बथां, वहः, लुँ, कँय्, न व यक्व वसः ज्वनाः थथःगु छेँय् लिहां हुँ। छिमिसं शत्रुतय्गु लाकाकाःगु फुक्क सामान इस्राएली दाजुकिजापिन्त इनाब्यु।” 9 अले रूबेनी, गादी व मनश्शेया बच्छि कुल परमप्रभुयागु आज्ञाकथं मोशापाखें इमित ब्यूगु अधिकारया देश गिलादय् वनेत इस्राएलीतलिसें बिदा जुयाः कनान देशयागु शीलों लिहां वन। यर्दन सिथय् छगू वेदी दय्कूगु 10 रूबेनी, गादी व मनश्शेया बच्छि कुल कनान देशय् यर्दनयागु लिक्कसं च्वंगु गलीलोतय् थ्यंबलय् इमिसं यर्दन खुसि सिथय् छगू तःधंगु वेदी दय्कल। 11 रूबेनी, गादी व मनश्शेया बच्छि कुलं कनानया सिमानाय् गलीलोतय् यर्दनया लिक्क इस्राएलीतय्गु भागय् वेदी दय्कल धयागु खँ न्यनाः 12 इपिंनापं ल्वायेत इस्राएलयापिं फुक्क खलः शीलोय् मुन। 13 अले इस्राएलीतय्सं गिलाद देशय् रूबेनी, गादी व मनश्शेया बच्छि कुलयाथाय् पुजाहारी एलाजारया काय् पीनहासयात छ्वल। 14 वनापं इस्राएलया छगू छगू कुलं छम्ह छम्ह यानाः झिम्ह नायः छ्वल। इपिं इस्राएलया वंशतय् छगू छगू परिवारया नायःपिं खः। 15 इपिं रूबेनी, गादी व मनश्शेया बच्छि कुलयाथाय् गिलाद देशय् थ्यनाः इमित थथे धाल, 16 “परमप्रभुया फुक्क खलकं थथे धाःगु दु, ‘छिमिसं थथे छाय् परमेश्वरयात ध्वंलानागु? थौं छिमिसं गय् यानाः परमप्रभुया विरोधय् विद्रोही जुयाः वय्कःयात त्वःताः थःगु लागि वेदी दय्केफुगु? 17 छु पोरय् यानागु पाप झीत मगात ला? गुकें यानाः परमप्रभुया खलःयाथाय् महामारी वल। झीसं थौं तक नं थःपिन्त शुद्ध याये मफुनि? 18 छु, छिमिसं हाकनं आः परमप्रभुयात त्वःतेगु ला? “‘थौं छिमिसं परमप्रभुया विरोधयात धाःसा कन्हय् वय्कः इस्राएलया फुक्क खलःलिसें तंचायादी। 19 छिमिगु थःगु जमिन अशुद्ध जूगु दुसा परमप्रभुया पवित्र पाल दुगु परमप्रभुया देशय् वा, जिमिगु जमिन जिपिंनापं इनाका। तर परमप्रभु झी परमेश्वया वेदी दय्कं हाकनं मेगु वेदी दय्काः परमप्रभुयागु व जिमिगु विरोध याये मते। 20 जेरहया काय् आकानं देछायेमाःगु धनमालयागु खँय् विश्वासघात याःबलय् इस्राएलया फुक्क खलः खनाः परमप्रभु तंचायादीगु, मखु ला? आकानयागु पापया सजाँय वयात जक लाःगु मखु, मेपिन्त नं लात।’” 21 रूबेन, गाद व मनश्शेया बच्छि कुलयापिन्सं इस्राएलया कुल कुलया नायःतय्त लिसः बिल, 22 “परमप्रभु परमेश्वर दकलय् बल्लाःम्ह खः! वय्कः परमप्रभु खः, परमप्रभु परमेश्वर दकलय् बल्लाःम्ह खः! छाय् झीसं थ्व ज्या यानागु खः धकाः वय्कलं स्यू अले इस्राएलं नं सीमा! जिमिसं विद्रोह यानाः परमप्रभुयागु खँ मन्यनागु दुसा जिमित आः हे स्यानाछ्व। 23 परमप्रभुया ल्यू वनेगु त्वःताः जिमिसं थःगु निंतिं होमबलि वा अन्नबलि वा मेलबलि छायेत वेदी दय्काःगु दुसा, परमप्रभु थःम्हं हे जिमित सजाँय बियादीमा। 24 “अथे मखु, लिपा छिमि सन्तानं जिमि सन्तानयात थथे धाइ धकाः जिपिं ग्याः, ‘परमप्रभु इस्राएलयाम्ह परमेश्वरनापं छिमिगु छु ज्या दु? 25 हे रूबेनी व गादीत, परमप्रभुं जिमिगु व छिमिगु दथुइ यर्दन खुसियात सिमाना दय्कादिल। आः परमप्रभुनापं छिमिगु छुं ज्या मदु।’ थथे धयाः छिमि सन्तानं जिमि सन्तानयात परमप्रभुया आराधना याकेमबी फु। 26 “अथे जुयाः जिमिसं थथे धया, ‘झीसं छगू वेदी दय्केनु, व होमबलि व बां बीत मखु।’ 27 उकिया पलेसा छिमि व छिमि सन्तानया दथुइ, पुस्ता पुस्ता तक जिमिसं धात्थें होमबलि, बलिदान व मेलबलि ज्वनाः परमप्रभुयात वय्कःया नापलायेगु पाल न्ह्यःने जक आराधना यायेत साक्षी जुइमा धकाः जिमिसं थ्व दय्काःगु दु। लिपा छिमि सन्तानं जिमि सन्तानयात, ‘छिमिगु परमप्रभुनापं छुं ज्या मदु धकाः मधायेमा।’ 28 “अले जिमिसं धया कि इमिसं जिमित वा जिमि सन्तानयात लिपा अथे धाल धाःसा जिमिसं थथे धाये, ‘झी पुर्खातय्सं होमबलि व बलिदान छायेत मखु तर जिमिगु व छिमिगु दथुइ साक्षीकथं दय्कूगु परमप्रभुया वेदी थें च्वंक दय्कूगु थ्व वेदीयात स्व।’ 29 “धात्थें जिमिसं परमप्रभुयागु विरोधय् विद्रोह याये मखु। वय्कःयात मानय् यायेगु त्वःते नं मखु। परमप्रभुया पवित्र पालया न्ह्यःने दुगु परमप्रभु झी परमेश्वरयागु वेदी बाहेकं होमबलि, अन्नबलि व बलिदान छायेत मेगु वेदी जिमिसं दय्के मखु।” 30 रूबेन, गाद व मनश्शे कुलयापिं मनूतय्सं धाःगु खँ न्यनाः पुजाहारी पीनहास व इस्राएलया खलःया नायःत लय्ताल। 31 अले पुजाहारी एलाजारया काय् पीनहासं इमित धाल, “परमप्रभु झीपिंलिसें दी धकाः थौं जिमिसं सिल, छाय्धाःसा थ्व खँय् छिमिसं परमप्रभुयात ध्वंलाःगु मदु। आः धाःसा छिमिसं इस्राएलीतय्त परमप्रभुया ल्हातं बचय् याःगु दु।” 32 अले एलाजार पुजाहारीया काय् पीनहास व उपिं कुलनायःत गिलाद देशयापिं रूबेनी व गादीत नाप लाये धुंकाः कनानय् लिहां वल। अले इस्राएलीतय्त अन जूगु खँ कन। 33 थ्व खँ न्यनाः इस्राएलीत लय्ताल। इमिसं परमेश्वरयात प्रशंसा यात, अले रूबेनीत व गादीत च्वनाच्वंगु देश नाश यायेत लडाइँ याःवनेगु खँ हानं पिमकाल। 34 रूबेनीत व गादीतय्सं, थ्व वेदीं परमप्रभु झी परमेश्वर खः धयागु साक्षी बी धकाः धयाः उकियागु नां साक्षी तल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.