यहोशू 18 - नेवाः बाइबलल्यं दुगु देश इनाब्यूगु 1 इस्राएलीतय् फुक्क खलः शीलोय् मुन, अले अन नापलायेगु पाल ग्वल। छाय्धाःसा देश इमिगु ल्हातय् वये धुंकूगु दु। 2 अय्नं आः तक नं थथःगु सर्बय् मकाःपिं न्हय्गू कुल ल्यंदनि। 3 उकिं यहोशूं इस्राएलीतय्त धाल, “छिमि पुर्खातय् परमप्रभु परमेश्वरं छिमित बियादीगु देश त्याका कायेत छाय् लिबाका च्वनेगु? 4 उकिं कुलपतिकं स्वम्ह स्वम्ह मनूत ल्य, अले जिं इमित छ्वये। अले इपिं थःत काये मनदुगु थथःगु सर्बयया बयान च्वयाः जिथाय् लिहां वयेमाः। 5 इमिसं उकियात न्हय्ब्व यायेमाः। उत्तरय् योसेफया घरानाया जमिन व दच्छिनपाखे यहूदाया जमिन दुमथ्याय्माः। 6 अनंलि छिमिसं देशयागु न्हय्ब्वया बयान च्वयाः जिथाय् ज्वना वा। अले जिं छिमिगु लागि परमप्रभु थः परमेश्वरया न्ह्यःने चिट्ठा तये। 7 लेवी कुलतय्त धाःसा छिमिगु दथुइ छुं सर्बय् दइ मखु, छाय्धाःसा परमप्रभुं बियादीगु पुजाहारीया ज्या हे इमिगु सर्बय् खः। गाद, रूबेन व मनश्शेया बच्छि कुलयात यर्दनया पुर्बय् परमप्रभुया दास मोशां ब्यूगु इलाका दये धुंकूगु दु।” 8 यहोशूं थथे आज्ञा बीधुंकाः देश चाःहिलेत व उकिया बयान च्वयेत इपिं वने न्ह्यः वं इमित थथे आज्ञा बिल, “देशया फुक्क थाय् स्व, उकिया बयान च्वयाः जिथाय् लिहां वा, अले शीलोय् जिं परमप्रभुयागु न्ह्यःने चिट्ठा तये।” 9 उकिं मनूत वनाः देशया फुक्क थासय् चाःहिल, अले व देशयात गथे यानाः न्हय्ब्व यायेगु खः उकियागु बयान च्वल अले छगू छगू पुचःया शहरतय्गु धलः दय्कल। अनंलि इपिं यहोशूयाथाय् शीलोय् दुगु छाउनीइ लिहां वल। 10 अले यहोशूं शीलोय् परमप्रभुया न्ह्यःने इमिगु निंतिं चिट्ठा तल। अले अन हे यहोशूं इस्राएलीतय्त इमिगु भाग भागकथं देश इनाबिल। बेन्यामीन कुलयात ब्यूगु भाग 11 दकलय् न्हापा बेन्यामीन कुलया लागि वंश वंश यानाः चिट्ठा तल। इमिगु इलाका यहूदा कुल व योसेफया कुलया दथुइ लात। 12 उत्तरपाखे इमिगु सिमाना यर्दनं शुरु जुल, अले यरीहोया उत्तर पाखेया पाःचाय् थाहां वनाः पच्छिमपाखे पहाडी देश जुयाः बेथ-आवनया मरुभूमिइ थ्यन। 13 व सिमाना अनं बेथेल धाइगु लुजः तक थ्यन। हानं व डाँडाय् क्वहां वनाः क्वय्यागु बेथ-होरोनया दच्छिनय् डाँडाय् दुगु अतारोत-अद्दारय् तक थ्यन। 14 अले बेथ-होरोनया क्वय्या दच्छिन पाखेयागु थ्व डाँडां सिमाना दच्छिनपाखे चाःहिल अले यहूदाया सन्तानतय्गु किर्यत-यारीम धाइगु किर्यत-बाल तक थ्यन। पच्छिम सिमाना थ्व हे खः। 15 दच्छिनया सिमाना धाःसा किर्यत-यारीमया सिथ सिथं शुरु जुल। थ्व दच्छिनया कुन्चां थ्व सिमाना पुर्बपाखे वनाः नेप्तोहया मुहान तक थ्यन। 16 व सिमाना रपाईमया ब्यासियागु उत्तरय् च्वंगु बेन-हिन्नोमया खोँचपाखे लाःगु पहाडया क्वय् क्वहां वन। व सिमाना अनं बेन-हिन्नोमया खोँच जुयाः क्वहां वन अले यबूसी शहरया दच्छिनया पाःचा जुयाः एन-रोगेल थ्यन। 17 अनंलि व उत्तरपाखे चाःहिलाः एन-शेमेश बुंगाःचाय् थ्यनाः अदुम्मीमया भन्ज्याङया न्ह्यःने गलीलोतय् पिहां वयाः रूबेनया काय् बोहनया ल्वहँतय् थ्यन। 18 अनं व बेथ-अराबाया उत्तरया पाःचां अराबाय् क्वहां वन। 19 व सिमाना हानं बेथ-होग्ला डाँडाया उत्तर जुयाः यर्दनया दच्छिनपाखे च्वंगु यर्दन खुसि सागरनापं मिलय् जुइगु मृत सागरया खाडीइ क्वचाःगु दु। थ्व हे दच्छिनयागु सिमाना खः। 20 पुर्बपाखें उकियागु सिमाना यर्दन खुसि खः। बेन्यामीनीतय्गु सर्बयया प्यखेरं च्वंगु सिमानानापं इमिगु वंश वंशकथं थ्व हे जुल। 21 बेन्यामीनया कुलया शहर इमिगु वंश वंशकथं थुपिं खः – यरीहो, बेथ-होग्ला, एमेक-कसीस, 22 बेथ-अराबा, समारैम, बेथेल, 23 अब्बीम, पारा, ओप्रा, 24 कपर-अमोनी, ओप्नी, गेबा – झिंनिगू शहर व इमिगु फुक्क गां। 25 गिबोन, रामा, बेरोत, 26 मिस्पा, कपीरा, मोशा, 27 रेकेम, यिर्पल, तरला, 28 सेलाह, एलेप, यबूसी शहर धाइगु यरूशलेम, गिबा व किर्यत-झिंप्यंगू शहर व इमिगु फुक्क गां। बेन्यामीनया वंशतय्त थुपिं सर्बय् दत। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.