यहोशू 16 - नेवाः बाइबलएफ्राइम व पच्छिमया मनश्शेयात ब्यूगु भाग 1 योसेफया सन्तानतय्त ब्यूगु इलाकायागु सिमाना यरीहो लिक्कयागु यर्दन खुसिंनिसें यरीहोया पुर्बय् लाःगु बुँगाःचा जुयाः मरुभूमिपाखे अले च्वय्पाखे बेथेल पहाडी देशय् थ्यन। 2 बेथेलं व सिमाना लुजःपाखे न्ह्यज्यानाः अरकीया इलाका जुयाः अतारोतय् थ्यन। 3 अले इमिगु सिमाना पच्छिमपाखे यल्पेतीतय्गु इलाकाय् क्वय् क्वहां वयाः बेथ-होरोनयागु इलाका जुयाः गेजेर थ्यन, अले भूमध्यसागर तक वनाः क्वचाल। 4 थथे योसेफया काय्पिं मनश्शे व एफ्राइमया सन्तानं थथःगु भाग काल। 5 एफ्राइम कुलया इलाका इमिगु वंश वंशकथं थथे दु – इमिगु सर्बयया पुर्बयागु सिमाना अतारोत-अद्दारंनिसें च्वय् बेथ-होरोन थ्यन। 6 अनंनिसें समुद्र तक वन। उत्तरपाखे लाःगु मिक्मतातंनिसें सिमाना पुर्बपाखे चाःहिलाः तानत-शीलो थ्यन। अले अनं पुर्बपाखे न्ह्यज्यानाः यानोह तक थ्यन। 7 अले थ्व यानोहंनिसें अतारोत व नारा तक क्वहां वयाः यरीहो जुयाः यर्दनय् थ्यन। 8 तप्पूहं व सिमाना पच्छिमय् कनाया खुसिचाय् क्वहां वयाः समुद्रय् क्वचाल। एफ्राइम कुलयापिं वंश वंशयात सर्बयकथं ब्यूगु इलाका थ्व हे खः। 9 थुकी मनश्शेतय्गु सर्बयया दुने एफ्राइमीतय्गु लागिं ब्यागल तःगु छुं शहर व गां नं दुथ्याः। 10 इमिसं गेजेरय् च्वंपिं कनानीतय्त पितमछ्वः। थौं तक नं कनानीत एफ्राइमयापिं मनूतलिसें दास थें ज्या याइपिं ज्यामि जुयाः च्वनाच्वंगु दु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.