यहोशू 12 - नेवाः बाइबलमोशां यर्दन पुर्बय् त्याकूपिं जुजुपिं गन्ती २१:२१-३५ ; व्य २:२४–३:१-११ 1 यर्दनया पुर्बय् दच्छिनय् अर्नोन खुसिंनिसें उत्तरय् हेर्मोन पर्वत तक अर्थात अराबया पुर्ब पाखेया फुक्क लागा इस्राएलीतय्सं त्याकाकाःगु खः। इस्राएलीतय्सं त्याकाकाःगु व लागायापिं निम्ह जुजुपिं थुपिं खः – 2 छम्ह हेश्बोनय् राज्य याइम्ह एमोरी जुजु सीहोन, वं अर्नोन खोँचया च्वसं दुगु अरोएर शहरंनिसें अम्मोनीतय्गु सिमानायागु यब्बोक खुसि तक राज्य याइगु खः। उकी बच्छि गिलाद नं लाः। 3 वं अराबाया पुर्बय् गालील समुद्रंनिसें दच्छिनय् मृत-सागर तक, अले च्वय् बेथ-यशीमोतपाखे व दच्छिनय् पिसगाया क्वय्यागु पाःचा तक नं राज्य याइगु खः। 4 मेम्ह अस्तारोत व एद्रईलय् राज्य यानाच्वम्ह बाशानया जुजु ओग। व रपाइँ धाःगु ततःधिकःपिं मनूतय् पुचःयाम्ह लिपांम्ह मनू खः। 5 वं हेर्मोन पर्वत, सलका व फुक्क बाशानय् गशूरीत व माकातीतय् सिमाना तक व हेश्बोनया जुजु सीहोनयागु सिमाना तक व बच्छि गिलादय् राज्य याःगु खः। 6 परमप्रभुया दास मोशा व इस्राएलीतय्सं इपिं निम्ह जुजुपिन्त बुकल। परमप्रभुया दास मोशां रूबेनीतय्त, गादीतय्त व मनश्शेया बच्छि कुलयात अधिकार यायेत थुपिं निम्ह जुजुपिनिगु देश बिल। यहोशूं बुकूपिं यर्दनया पच्छिमया जुजुपिं 7 यर्दनया पच्छिमपाखे लेबनानया ब्यासियागु बाल-गादंनिसें सेइरया तँचाय् दुगु हालाक डाँडा तकयागु थीथी देशयापिं जुजुपिन्त यहोशू व इस्राएलीतय्सं बुकल। यहोशूं इमिगु देश ब्वथल अले छगू छगू कुलयात इमिगु भाग बिल। 8 पहाडी देश, पच्छिमया फेदी, अराबा, अराबा क्वहां वनीगु पुर्बया पाःचा, मरुभूमि व दच्छिनय् नेगेव देशयापिं हित्ती, एमोरी, कनानी, परिज्जी, हिव्वी, व एबूसीतय् जुजुपिं थुपिं खः – 9 यरीहोयाम्ह जुजु छम्ह, बेथेलया लिक्क ऐयाम्ह जुजु छम्ह, 10 यरूशलेमयाम्ह जुजु छम्ह, हेब्रोनयाम्ह जुजु छम्ह, 11 यर्मूतयाम्ह जुजु छम्ह, लाकीशयाम्ह जुजु छम्ह, 12 एग्लोनयाम्ह जुजु छम्ह, गेजेरयाम्ह जुजु छम्ह, 13 दबीरयाम्ह जुजु छम्ह, गेदेरयाम्ह जुजु छम्ह, 14 होर्मायाम्ह जुजु छम्ह, आरादयाम्ह जुजु छम्ह, 15 लिब्नायाम्ह जुजु छम्ह, अदुल्लामयाम्ह जुजु छम्ह, 16 मक्केदायाम्ह जुजु छम्ह, बेथेलयाम्ह जुजु छम्ह, 17 तप्पूहयाम्ह जुजु छम्ह, हेपेरयाम्ह जुजु छम्ह, 18 अपेकयाम्ह जुजु छम्ह, लश्शारोनयाम्ह जुजु छम्ह, 19 मादोनयाम्ह जुजु छम्ह, हासोरयाम्ह जुजु छम्ह, 20 शिम्रोन-मोरनयाम्ह जुजु छम्ह, अक्षापयाम्ह जुजु छम्ह, 21 तानाकयाम्ह जुजु छम्ह, मगिद्दोयाम्ह जुजु छम्ह, 22 कादेशयाम्ह जुजु छम्ह, कर्मेलया योक्नामयाम्ह जुजु छम्ह, 23 नेपोत डोरयाम्ह जुजु छम्ह, गिलगालया गयीमयाम्ह जुजु छम्ह, 24 अले तिर्सायाम्ह जुजु छम्ह, थुपिं सकलें यानाः स्वीछम्ह जुजुपिं दु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.