यर्मिया 38 - नेवाः बाइबलयर्मियायात लः मदुगु त्यांकिइ क्वफाःगु 1 मत्तानया काय् शपत्याह, पशहूरया काय् गदल्याह, शेलेम्याहया काय् यहूकल व मल्कियाहया काय् पशहूरं यर्मियां सकलें मनूतय्त थथे धयाच्वंगु ताल, 2 “परमप्रभुं थथे धयादी ‘सु थ्व शहरय् च्वनी व तरवार, अनिकाल व महामारीं सी। तर गुम्ह बेबिलोनीतय्थाय् वनाः आत्मसमर्पण याइ व म्वाइ। वं थःगु ज्यान बचय् याइ, अले व म्वाइ।’ 3 अले परमप्रभुं थथे धयादी, ‘थ्व शहरयात धात्थें हे बेबिलोनयाम्ह जुजुया ल्हातय् लःल्हाइ। वं थुकियात त्याकाकाइ।’” 4 अले हाकिमतय्सं जुजुयात धाल, “थ्व मनूयात स्याये हे माः, छाय्धाःसा थ्वं थज्याःगु खँ ल्हानाः थ्व शहरय् ल्यनाच्वंपिं सिपाइँतय्त व मनूतय्त निराश याःगु दु। थ्वयात थुपिं मनूतय्त भिंकेगु मखु कि स्यंके मास्ति वः।” 5 सिदकियाह जुजुं लिसः बिल, “व छिमिगु हे ल्हातय् दु। जुजुं ला छिमिगु विरोधय् छुं याये फइ मखु।” 6 उकिं इमिसं यर्मियायात यंकाः पिवाःत च्वनीगु चुकय् दुगु जुजुया काय् मल्कियाहया तुंथिइ क्वफानाबिल। इमिसं यर्मियायात खिपःया ग्वाहालिं तुंथिइ क्वफात। उगु तुंथिइ लः मदु, ध्याचः हे ध्याचः जक दु। यर्मिया ध्याचलय् तुन। 7 अले दरबारय् च्वनाच्वंम्ह छम्ह हाकिम कूशी एबेद-मेलेकं यर्मियायात तुंथिइ क्वफात धयागु खँ न्यन। उबलय् जुजु बेन्यामीनया ध्वाखाय् च्वनाच्वंगु खः। 8 अथे जुयाः एबेद-मेलेकं दरबारं पिहां वनाः जुजुयात थथे धाल, 9 “हे जिमि प्रभु, हे महाराज! थुपिं मनूतय्सं यर्मिया अगमवक्तायात तुंथिइ क्वफानाबियाः मभिंगु ज्या यात। अन व नये मखंक सी, छाय्धाःसा शहरय् आः छपा नं मरि मन्त।” 10 अले जुजुं कूशी एबेद-मेलेकयात थथे धकाः आज्ञा बिल, “थनं स्विम्ह मनूनापं यंकाः यर्मिया अगमवक्ता अन सी न्ह्यः हे वयात तुंथिं लिका।” 11 उकिं एबेद-मेलेकं उपिं मनूतय्त दरबारया धुकू क्वथाया क्वय्यागु छगू क्वथाय् यंकल। अनं भ्वाथः भ्वाथःगु वसः लिकाल, अले वं तुंथिइ यर्मियाया लागि खिपतं चिनाः व फुक्क क्वकयाबिल। 12 अले कूशी एबेद-मेलेकं यर्मियायात धाल, “छंगु याकु व खिपःया दथुइ थुपिं भ्वाथःगु कापः ति।” यर्मियां अथे हे यात। 13 अले इमिसं उपिं खिपःया ग्वाहालिं यर्मियायात तुंथिं थकाल। अनंलि यर्मिया पिवाःत च्वनीगु चुकय् च्वन। सिदकियाह जुजुं यर्मियायाके सल्लाह काःगु 14 सिदकियाह जुजुं यर्मिया अगमवक्तायात सःतके छ्वत। अले परमप्रभुया देगःयागु स्वंगूगु लुखाय् वयात हल। जुजुं यर्मियायात धाल, “जिं छन्त छुं खँ न्यने। जितः छुं खँ सुचुके मते।” 15 यर्मियां सिदकियाहयात धाल, “जिं छितः व धाल धाःसा छिं जितः स्यानाः मदी ला? जिं छितः सल्लाह ब्यूसां व छिं न्यनादी मखु।” 16 तर जुजु सिदकियाहं मेपिन्सं मसीक यर्मियालिसें थथे धकाः पाफल, “झीत सासः बियादीम्ह परमप्रभु गथे धात्थें म्वाःम्ह खः, जिं छन्त स्याये मखु, न त छन्त स्यायेत स्वःपिं मनूतय्गु ल्हातय् छन्त बिइगु जुइ।” 17 अले यर्मियां सिदकियाहयात धाल, “दक्व शक्ति दुम्ह परमप्रभु, इस्राएलया परमेश्वरं थथे धयादी, ‘छि बेबिलोनयाम्ह जुजुया हाकिमतय्थाय् वन धाःसा बचय् जुइ अले थ्व शहरयात छ्वय्काबी मखु, छि व छिगु परिवार बचय् जुइ। 18 तर छि बेबिलोनयाम्ह जुजुया हाकिमतय्थाय् मवन धाःसा थ्व शहरयात बेबिलोनीतय्गु ल्हातय् बिइगु जुइ, अले इमिसं थुकियात छ्वय्काबी, छि इमिगु ल्हातं बचय् जुइ फइ मखु।’” 19 अले सिदकियाह जुजुं यर्मियायात धाल, “बेबिलोनीतय्थाय् बिस्युं वंपिं यहूदायापिं खनाः जि ग्याः। छाय्धाःसा बेबिलोनीतय्सं जितः इमिगु ल्हातय् बिल धाःसा इमिसं जिलिसें बांमलाःगु व्यवहार याइ।” 20 यर्मियां लिसः बिल, “इमिसं छितः इमिगु ल्हातय् बी मखु। जिं छितः धयागु परमप्रभुया वचन पालन यानादिसँ, छिगु भिं जुइ, छि बचय् जुइ। 21 तर छिं वनेत इन्कार यात धाःसा परमप्रभुं जितः क्यनादीगु दर्शन थ्व हे खः, 22 यहूदाया जुजुया दरबारय् त्वःताथकुपिं सकलें मिस्तय्त बेबिलोनयाम्ह जुजुया हाकिमतय्थाय् यंकी। उपिं मिसातय्सं छितः थथे धाइ, “‘छिं भलसा कयादीम्ह छिकपिनि पासापिन्सं छितः झंगः लानाः थःगु बसय् तल। छिगु तुति ध्याचलय् तुनेवं इमिसं छितः त्वःतावन।’ 23 “छिकपिनि सकलें कलाःपिं व काय् म्ह्याय्पिन्त बेबिलोनीतय्थाय् यंकी। छि थः नं इमिगु ल्हातं बचय् जुइ मखु। छितः बेबिलोनयाम्ह जुजुं ज्वना यंकी। अले थ्व शहरयात मि तयाः छ्वय्काबी।” 24 अले सिदकियाहं यर्मियायात धाल, “थ्व खँ सुनानं मसीमाः, मखुसा छन्त स्याइ। 25 जिं छलिसें खँल्हाबल्हा याःगु इमिसं न्यनाः छन्थाय् वयाः ‘छं जुजुयात छु धया अले जुजुं छन्त छु धाल व जिमित धा! जिमित छुं खँ सुचुके मते, मखुसा जिमिसं छन्त स्यानाबी,’ धकाः धाल धाःसा, 26 छं इमित थथे धा, ‘जितः जोनाथनया छेँय् सीत छ्वयादी मते धकाः जिं जुजुयात बिन्ति जक यानाच्वनागु खः।’” 27 सकलें हाकिमत यर्मियायाथाय् वयाः वयात न्यन। वं जुजुं धाःथें हे इमित धाल। उकिं इमिसं वयाके मेगु छुं मन्यन, छाय्धाःसा जुजु व यर्मियाया दथुइ जूगु खँल्हाबल्हा सुनानं मताः। 28 थुकथं यर्मिया यरूशलेम कब्जा याःबलय् तक पिवाःत च्वनीगु चुकय् हे च्वन। थ्व गुकथं यरूशलेमयात कब्जा यात धयागु खँ खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.