यर्मिया 3 - नेवाः बाइबलअविश्वासी इस्राएल 1 “सुं मनुखं थः कलाःयात त्वःतल धाःसा अले व मिसा वयाथासं वनाः मेम्ह मिजंया कलाः जुल धाःसा छु व मनू हाकनं वयाथाय् लिहांवनी ला? छु व देश अशुद्ध मजुइ ला? छ छम्ह वेश्या थें यक्वसिथाय् वंगु दु, छु छ आः जिथाय् लिहां वयेगु ला?” परमप्रभुं धयादी। 2 “नांगा डाँडाय् मिखा ब्व। उपिं मध्ये छं मभिंगु ज्या मयाःगु गुगु थाय् दु? चाचाःहिलाः जुइम्ह छम्ह मनू मरुभूमिइ च्वनाच्वं थें छं लँय् च्वनाः थः प्रेमीत पियाच्वन। छं देशयात थःगु व्यभिचार व मभिंगु ज्यां अशुद्ध याःगु दु। 3 उकिं परमेश्वरं बसन्तया वा वयेगु दिकाब्यूगु दु, वा वइ मखु। अय्नं छंगु ख्वाः वेश्यायागु थें च्वं। छ लज्या चाये हे मसः। 4 अय्नं छं जितः थथे धाइ, ‘हे जिम्ह अबु, छि जिम्ह ल्याय्म्हबलय्याम्ह पासा खः। 5 छु छि न्ह्याबलें तंचायाच्वनादीगु ला? छु छिगु तं न्ह्याबलें दयाच्वनी ला?’ छं थथे ला धाःगु दु, अय्नं छं फतले मभिंगु ज्या याःगु दु।” इस्राएल व यहूदा पस्ताय् चायेमाः 6 योशियाह जुजुया पालय् परमप्रभुं जितः धयादिल, “विश्वास यायेबहः मजूम्ह इस्राएलं छु छु यात छु छं खना ला? वं फुक्क ततःजाःगु डाँडाय् व फुक्क वाउँगु सिमाया क्वय् वं व्यभिचार यात। 7 थ्व फुक्क ज्या सिधय्के धुंकाः व जिथाय् लिहां वइ धकाः मतिइ तयागु खः। तर व लिहां मवः। अले वया विश्वासघाती केहेँ यहूदां थ्व खन। 8 जिं विश्वास यायेबहः मजूम्ह इस्राएलयात वं व्यभिचार याःगुलिं त्वःताछ्वयागु खंका नं वया विश्वासघाती केहेँ यहूदा मग्यात, तर वं नं वनाः व्यभिचार यात। 9 व लज्या मचाःम्ह व्यभिचारिणी जूगुलिं देश नं अशुद्ध जुल। वं ल्वहं व सिँनापं नं व्यभिचार यात। 10 थुलि जूसां नं वया विश्वासघाती केहेँ यहूदा दुनुगलंनिसें जिथाय् लिहां मवः। तर ख्यालं जक लिहां वल,” परमप्रभुं धयादी। 11 परमप्रभुं जितः धयादिल, “विश्वास यायेबहः मजूम्ह इस्राएल, विश्वासघाती यहूदा स्वयाः कम दोषी जूगु दु। 12 उकिं छ वनाः उत्तर पाखे थ्व खँ धा, “हे विश्वास यायेबहः मजूम्ह इस्राएल, छ लिहां वा, जि छ खनाः तम्वये मखु, छाय्धाःसा जि दयामाया दुम्ह खः, जि न्ह्याबलें तंचायाच्वने मखु,” परमप्रभुं धयादी। 13 “छं थः परमप्रभु परमेश्वरया विरोधय् विद्रोही जुया, छं फुक्क वाउँगु सिमाया क्वय् द्यःतय्त पुजा यानाः जिगु विरोधय् व्यभिचार याना धकाः स्वीकार जक या,” परमप्रभुं धयादी। 14 “अय् विश्वास याये बहःमजूपिं मनूत लिहां वा,” परमप्रभुं धयादी, “छाय्धाःसा जि छिमि मालिक खः। जिं छगू छगू शहरं छम्ह छम्ह व छगू छगू कुलं निम्ह निम्हय्सित सियोनय् हये। 15 अले जिं थःगु मननापं मिलय् जूपिं जवाःत छिमित बी। इमिसं छिमित ज्ञान व बुद्धिं लँ क्यनी। 16 “छिपिं थ्व देशय् यक्व दयाः न्यनावनीबलय् छिमिसं हाकनं गुबलें परमेश्वरया बाचाया सनू धकाः धाइ मखु,” परमप्रभुं धयादी। “छिमिगु नुगलय् उकिया बिचाः वइ मखु, व लुमनी तक नं मखु, अले सनूयात हाकनं दय्के माली मखु। 17 उबलय् यरूशलेमयात ‘परमप्रभुया सिंहासन’ धाइ। अले फुक्क जातित व हे यरूशलेमय् जिगु नांयात इज्जत यायेत मुनेगु याइ। अले इपिं जिराहा जुयाः थःगु मनया मभिंगु खँया ल्यू गुबलें जुइ मखु। 18 अबलय् इस्राएलया मनूत यहूदाया मनूतलिसें मिलय् जुइ, इपिं छकलं उत्तरय् च्वंगु देशं लिहां वयाः जिं इमि पुर्खातय्त न्ह्याबलेंया निंतिं बियागु देशय् वइ। इस्राएलं मूर्ति पुजा याःगु 19 “जिं मनमनं धया, “‘हे इस्राएल, जिं छिमित थः मस्त दय्केगु व छगू सुख हे सुख जुइगु, संसारया दकलय् बांलाःगु देश बीगु बिचाः यानागु खः।’ जिं छिमिसं जितः अबु धाइ, अले जिगु ल्यू जुइगु त्वःती मखु धकाः मतिइ तयागु खः। 20 तर विश्वासघाती कलातं थें छं जितः ध्वंलात, हे इस्राएलया घराना,” परमप्रभुं धयादी। 21 नांगा डाँडा डाँडाय् इस्राएलीतय्गु ख्वःसः व इनाप यानाच्वंगु सः ताये दयाच्वंगु दु। छाय्धाःसा इपिं मखुगु लँय् वंगु दु, अले इमिसं थः परमप्रभु परमेश्वरयात ल्वःमंकूगु दु। 22 “हे विश्वास याये बहःमजूपिं मनूत, छिपिं सकलें जिथाय् लिहां वा, जिं छिमित लाय्काबी, अले जिं छिमित विश्वास यायेबहःपिं यानाबी।” मनूतय्सं लिसः बी, “स्वयादिसँ, जिपिं छिथाय् लिहां वये, छाय्धाःसा छि परमप्रभु जिमि परमेश्वर खः, 23 डाँडाया मूर्ति पुजा व हल्लाखल्ला धोखा जक खः। परमप्रभु झी परमेश्वरपाखें जक इस्राएलयात उद्धार दइ। 24 तर झी ल्याय्म्हबलय् निसें हे उपिं मछालापुसे च्वंपिं द्यःतय्सं झी पुर्खातय्सं कमय् याःगु अर्थात इमि फै-च्वलय्, सा द्वहं व इमि काय् म्ह्याय्पिन्त क्वाप्प नयाबिल। 25 झीपिं थःगु लज्यां ग्वतुलेनु। झीगु हेलां झीत त्वपुइमा। थः परमप्रभु परमेश्वरया विरोधय् झीसं व झी पुर्खातय्सं पाप याना वयाच्वनागु दु, थःगु ल्याय्म्हबलय्निसें थौं तक झीसं थः परमप्रभु परमेश्वरयागु आज्ञा पालन यानागु मदु।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.