यर्मिया 25 - नेवाः बाइबलकैदीया न्हयेदँ 1 यहूदाया जुजु योशियाहया काय् यहोयाकीमं राज्य यानाच्वंगु प्यंगूगु दँय् (थ्व दँ नबूकदनेसर बाबेलया जुजु जूगु न्हापांगु दँ खः) यहूदाया फुक्क मनूतय्गु बारे परमप्रभुया वचन यर्मिया अगमवक्तायाथाय् वल. 2 व हे वचन यर्मियां यहूदायापिं फुक्क मनूत व यरूशलेमयापिं फुक्क मनूतय्त धाल। व वचन थ्व खः – 3 “यहूदाया जुजु अमोनया काय् योशियाहं राज्य यानाच्वंगु झिंस्वंगूगु दंनिसें थौं तक अर्थात निइस्वदँ तक, परमप्रभुया वचन जिथाय् वयाच्वंगु दु, अले जिं व छिमित कनावयाच्वनागु दु, तर छिमिसं उकी ध्यान ब्यूगु मदु। 4 “परमप्रभुं थः दास अगमवक्तातय्त तःकः मछि छिमिथाय् छ्वयाहयादीगु जूसां छिमिसं ध्यान नं मब्यू, न्यनेत न्हाय्पं नं मब्यू। 5 इमिसं धाल, ‘आः छिपिं सकसिनं थथःगु मभिंगु पहःचहः व मभिंगु ज्या त्वःति, अले जक छिपिं परमप्रभुं छिमि पुर्खातय्त शुरुंनिसें न्ह्याबलेंया लागि बियादीगु देशय् च्वने फइ। 6 विदेशी द्यःतय्गु ल्यू वनाः इमित सेवा नं याये मते, पुजा नं याये मते। थःगु ल्हाःया ज्यां जितः तं चाय्के मते। अले जिं छिमिगु छुं स्यंके मखु।’” 7 परमप्रभुं धयादी “अय्नं छिमिसं जिगु खँ मन्यंसे थःगु ल्हातं दय्कूगु मूर्तिं जितः तंचाय्कल गुकिं यानाः छिमिगु हे मभिं जुल।” 8 उकिं दक्व शक्ति दुम्ह परमप्रभुं थथे धयादी, “छिमिसं जिं धाःगु खँ मन्यंगुलिं, 9 स्व, जिं थःम्हं हे उत्तरयापिं फुक्क मनूतय्त व जिम्ह दास बेबिलोनयाम्ह जुजु नबूकदनेसरयात सःताहये,” परमप्रभुं धयादी। “जिं इमित थ्व देश व थनच्वंपिं मनूतय्गु विरोधय् व जःखः च्वंगु जातिया विरोधय् हये। जिं इमित भज्यंक नाश यानाबी। मनूत इमित खनाः वातां जुइ, अले इमित हेस्याइ। उलि जक मखु, थ्व फुक्क देश सदां झिजांमिजां जुयाच्वनी। 10 जिं इमिगु दथुं लसता व आनन्दया सः, भम्चा व जिलाजंया सः, घःल्वहंया सः व मतया जः चीकाछ्वये। 11 थ्व फुक्क देश झिजांमिजां दनी अले सुनसान जुइ। थ्व फुक्क जातिं न्हयेदँ तक बेबिलोनयाम्ह जुजुया सेवा याइ। 12 “तर न्हयेदँ फुइ धुंकाः जिं बेबिलोनया जुजु व वयागु जातियापिं मनूत व बेबिलोनीतय्त इमिगु दोषया निंतिं सजाँय बी अले व देशयात न्ह्याबलेंया निंतिं झिजांमिजां दंगुथाय् यानाबी,” परमप्रभुं धयादी। 13 “अले जिं व देशय् जिं व देशया बारे धयागु फुक्क खँ, अर्थात थ्व सफुलिइ च्वयातःगु फुक्क खँ पूवंके, गुगु खँ यर्मियां फुक्क जातिया विरोधय् अगमवाणी ल्हाःगु दु। 14 छाय्धाःसा यक्व जातिं व ततःधंपिं जुजुपिन्सं इमित दास दय्की। जिं इमिगु ज्या व ल्हाःया ज्याकथं इमित फल बी।” परमेश्वरया तंया ख्वला 15 परमप्रभु इस्राएलया परमेश्वरं जितः थथे धयादिल, “जिगु ल्हातं थ्व तंया दाखमद्यया ख्वला का, अले जिं छन्त गुगु गुगु जातियाथाय् छ्वये, उपिं फुक्क जातियात व त्वंकि। 16 जिं इमिथाय् छ्वयागु तरवारं यानाः थ्व त्वनाः इपिं धेधे चुइ अले वें जुइ।” 17 उकिं जिं परमप्रभुया ल्हातं व ख्वला कयाः, अले जि वय्कलं छ्वयादीगु फुक्क जातियाथाय् वना। उपिं फुक्क जातियात जिं व त्वंके बिया। 18 जि यरूशलेम व यहूदाया मेमेगु शहरय् वना अले अन च्वंपिं मनूत, जुजुपिं व हाकिमतय्त व त्वंके बिया। उबलय् निसें थौं तक उपिं शहरत झिजांमिजां दंगु मरुभूमिइ थें जुया हे च्वंगु दु, उपिं शहरत खनाः मनूत ग्याइगु अले उपिं शहरतय्त तसकं मय्कीगु। थौं तक मनूतय्सं इमिगु नां कयाः सराः बियेगु यानावयाच्वंगु दु। 19 जिं मिश्रयाम्ह जुजु फारो व वया भारदारत, व फुक्क प्रजायात, 20 अले अन दुपिं फुक्क विदेशी मनूतय्त व ऊज देशयापिं सकलें जुजुपिन्त, पलिश्तीतय् सकलें जुजुपिन्त, (अश्कलोन, गाजा व एक्रोन, अले अश्दोदया म्वानाच्वंपिन्त), 21 एदोम, मोआब व अम्मोनयात, 22 टुरोस व सीदोनया सकलें जुजुपिन्त, समुद्रया उखे सिथय् च्वंपिं सकलें जुजुपिन्त, 23 ददान, तेमा व बूज व ताताःपाःगु थाय् च्वंपिं सकसितं, 24 अरब देशयापिं सकलें जुजुपिन्त व मरुभूमिइ च्वंपिं विदेशीतय् सकलें जुजुपिन्त, 25 जिम्रीया, एलामया व मादीया सकलें जुजुपिन्त, 26 अले उत्तरपाखे सत्तीक व तापाक च्वंपिं सकलें जुजुपिन्त छकलं त्वंका, थुकथं पृथ्वीइ दुगु फुक्क राज्यया फुक्क मनूतय्त त्वंके बिया। इमिगु लिपा बेबिलोनयाम्ह जुजुं नं त्वनी। 27 “अले छं इमित धा, ‘दक्व शक्ति दुम्ह परमप्रभु, इस्राएलया परमेश्वरं थथे धयादी – त्वँ, लगे जुइकि, ल्ह्व, ग्वतु अले हाकनं गुबलें दने मते। छाय्धाःसा थ्व जिं छिमिगु दथुइ चले यायेगु तरवारया कारणं जुइ।’ 28 इमिसं छंगु ल्हातं ख्वला कयाः त्वने मखु धाल धाःसा इमित थथे धा, ‘दक्व शक्ति दुम्ह परमप्रभुं थथे धयादी – छिमिसं व त्वने हे माः। 29 स्व! मनूतय्सं जिगु धकाः धाइगु शहरय् हे ला जिं विपत्ति हयेत्यनागु दु धाःसा, छिमिसं स्वयेबलय् जिं छिमित सजाँय बी मखु धकाः च्वनागु ला? अथे मखु, जिं छिमित धात्थें सजाँय बी। छाय्धाःसा जिं पृथ्वीया फुक्क मनूतय्गु विरोधय् तरवार चले यायेत्यनागु दु, दक्व शक्ति दुम्ह परमप्रभुं धयादी!’ 30 “आः छं इमिगु विरोधय् थ्व फुक्क खँ अगमवाणी ल्हानाः इमित धा, “‘परमप्रभु स्वर्गं थ्वयेक हालादी। वय्कः थः च्वनादीगु पवित्र थासं थ्वयेक हालादी, अले थःगु देशया विरोधय् वय्कः तःसलं हालादी। पृथ्वीइ च्वंपिं सकसिगु विरोधय्, दाखमद्य न्हुइपिं थें वय्कः हालादी। 31 हल्लाया लिथ्वः पृथ्वीया ताताःपाःगु थासय् तक ताये दइ। छाय्धाःसा पृथ्वीया फुक्क जातितलिसें परमप्रभुया मुद्दा दु, वय्कलं फुक्क मनूतय्गु न्याय यानादी। दुष्टतय्त धाःसा वय्कलं तरवारं पालादी,’” परमप्रभुं धयादी। 32 दक्व शक्ति दुम्ह परमप्रभुं थथे धयादी, “स्व, विपत्ति छगू जातिं मेगु जाति तक न्यनावनी। पृथ्वीयागु कुन्चां तःधंगु ग्वःफय् वयाच्वंगु दु।” 33 उबलय् परमप्रभुं स्यानादीपिनिगु सीम्ह पृथ्वीया छगू कुन्चांनिसें मेगु कुन्चा तक लानाच्वनी। इमिगु लागि ख्वइपिं सुं नं दइ मखु। इमिगु सीम्ह सुनां मुनी नं मखु थुनी नं मखु। सीम्हत जमिनय् सौ थें लानाच्वनी। 34 “बिलाप या! अय् फैजवाःत, ख्व! छिपिं बथांया नायःत, धुलय् ग्वारा ग्वारा तु! छाय्धाःसा छिमित पालाः स्याइगु ई थ्यंकः वःगु दु। छिपिं ग्वतुली अले जिं भिंगु थलयात थें छिमित चुंचुं याये।” 35 उबलय् फैजवाःतय्त शरण कायेगु थाय् दइ मखु। बथांया नायःतय्गु निंतिं बिस्युं वनेगु थाय् दइ मखु। 36 फैजवाःत पिच्याना हाःगु सः न्यँ, अले बथांया नायःत ख्वःगु सः न्यँ। छाय्धाःसा परमप्रभुं इमिगु ख्यः नाश यानादीगु दु। 37 अले परमप्रभु तंम्वयादीगुलिं शान्त ख्यः नाश जुइ। 38 सिंहं थें वय्कलं थःगु गुफा त्वःतादी, अले क्वत्यलिपिनिगु तरवार व परमप्रभुया तच्वःगु तमं यानाः इमिगु देश झिजांमिजां दनी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.