यशैया 7 - नेवाः बाइबलआहाज जुजुयात बुखँ छ्वःगु 1 योतामया काय् अले उज्जियाहया छय् आहाज यहूदाय् जुजु जूबलय् छगू लडाइँ जुल। अले अरामया जुजु रसीन व इस्राएलया जुजु रमल्याहया काय् पेकहनापं मिलय् जुयाः यरूशलेमय् हमला यात, अय्नं इमिसं त्याके मफुत। 2 “अरामं इस्राएललिसें सन्धि यात” धयागु खँ दाऊदया घरानायाम्ह जुजु आहाजं न्यन। अबलय् यहूदाया जुजु व फुक्क प्रजात तसकं ग्यात इपिं ला फसं सिमात संकू थें हे थुर्र थुर्र खात। 3 अले परमप्रभुं यशैयायात धयादिल, “छ थःकाय् शार्यासूबयात ब्वनाः धोबिया बुँया लँपुइ वनाः च्वय् पाखे च्वंगु बुँया धः लिक्क आहाजयात नापलाः हुँ, 4 वयात थथे धा, ‘होशयानाच्वँ, ग्याये मते अले शान्त जुयाच्वँ। अरामया जुजु रसीन व जुजु पेकहया तं ला च्यानाच्वंगु निका सिँ पिहां वयाच्वंगु कुँति हे मग्यं। 5 अराम, इस्राएल व रमल्याहया काय्पिं मिलय् जुयाः थथे धकाः छंगु नाश यायेत जाः ग्वःगु दु, 6 “झीसं यहूदाय् हमला यायेनु। उकियात कुचा कुचा यानाः इनाकायेनु, अले ताबेलया काय्यात यहूदायाम्ह जुजु दय्काबीनु।” 7 तर परमप्रभुं थथे धयादी, “‘थ्व ला जुइ हे मखु, थथे जुइ हे मज्यू। 8 छाय्धाःसा अराम वया राजधानी दमस्कस स्वयाः बमलाः अले दमस्कस धाःसा जुजु रसीन स्वयाः नं बमलाः। तर इस्राएल खुइ न्यादँ दुने थःगु नां हे ल्यं मदय्क कुचा कुचा दलाः नाश जुयावनी। 9 इस्राएल वया राजधानी सामरिया स्वयाः बमलाः अले सामरिया रमल्याहया काय् जुजु पेकह स्वयाः नं बमलाः। छुं जुयाः छिपिं थःगु विश्वासय् क्वातुक्क च्वना मच्वन धाःसा छिपिं नं दयाच्वनी मखु।’” इम्मानुएलया चिं 10 हाकनं परमप्रभुं आहाजयात धयादिल, 11 “छिमि परमप्रभु परमेश्वरपाखें छगू चिं फ्वँ। व चिं चाहे पातालया तःगाःगु थाय्पाखेंया जुइमा चाहे च्वय् स्वर्ग पाखेंया जुइमा।” 12 तर आहाजं धाल, “जिं फ्वने मखु। जिं परमप्रभुयात जाँचय् याये मखु।” 13 अनंलि यशैयां धाल, “हे दाऊदया घराना, न्यँ! मनूतय्गु धैर्ययात जाँचय् यानाः मगात ला? छु छं जिमि परमेश्वरया धैर्ययात नं जाँचय् यायेगु ला? 14 अथे जुयाः परमप्रभु थःम्हं हे छन्त छगू चिं बियादी। ब्याहा मयानिम्ह छम्ह मिसां काय् बुइकी, वय्कःया नां इम्मानुएल तइ। 15 मभिंयात त्वःतेगु व भिंयात ल्ययेगु सीधुंकाः वय्कलं दुरु व कस्ति नइ। 16 व मचां मभिंयात त्वःतेगु व भिंयात ल्यय्गु सी न्ह्यः हे छन्त ख्याच्वः बीपिं निम्ह जुजुया देय् झिजांमिजां जुइ। 17 “परमप्रभुं छन्त, छिमि प्रजा व फुक्क जुजुया परिवारतय्त संकष्टया दिं हयाबी। अज्याःगु दिं यहूदापाखें इस्राएल राज्य अलग जुइगु दिनंनिसें कयाः थौं तक वःगु मदुनि। वय्कलं अश्शूरया जुजुयात देशय् हमला याकेबियादी।” 18 व दिं वइबलय् परमप्रभुं सुलुपुयाः मिश्रीतय्त नील खुसिं भुजिंयात थें अश्शूरीतय्त हा थें सःतादी। 19 उपिं वयाः चिब्यागु काप्चाय्, ल्वहं कापिचाय्, कंझालय् व फुक्क लः प्वालय् च्वंवइ। 20 व दिनय् परमप्रभुं यूफ्रेटिस पारियाम्ह अश्शूरया जुजुयात छ्यलादी, व जुजुं छिमित कब्जा याइ अले बेइज्जत याइ। व जुजु ख्वःचा थें जुइ। अले वं छंगु दाह्री, छंगु छेनय् च्वंगु व म्हय् च्वंगु फुक्क सँ खानाबी। 21 उबलय् छम्ह मनुखं छम्ह साचा व छज्वः च्वलय्चा जक लही। 22 थथे इपिंपाखें यक्व दुरु व धौ दइ। उकिं देशय् त्वःताथकुपिं उपिं कम मनूतय्सं धौ व कस्ति नयेखनी। 23 उगु इलय् ११.५ किलोग्राम वहः मू तूगु द्वःछिमा दाखमा दुगु क्यबय् कंमा व झाः जक बुया वइ। 24 कंमा व झाः जक दुगुलिं मनूतय्सं अन धनुष वाण ज्वना वनी। 25 कुलिं पालीगु फुक्क डाँडाय् धाःसा कँ व झाः जक दुगुलिं ग्यानाः इपिं हाकनं अन वनी मखु। तर व थाय् सा द्वहं ज्वयेगु थाय् व फै-च्वलय् ज्वयेगु थाय् जुइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.