यशैया 64 - नेवाः बाइबल1 छि आकाश चीकाः क्वहां झाःगु जूसा व पर्वतत छिगु न्ह्यःने थुरथुर खाःगु जूसा ज्यूगु। 2 मिं झाःत च्या थें अले लः ग्वाराग्वारां दाय्कू थें, थः शत्रुतय्त थःगु शक्ति क्यनेत अले जाति– जातितय्त थरथर खाकेत छि क्वहां झासँ। 3 गुबलय् छिं तःधंगु ज्या यानादी, व जिमिसं मति हे तयागु मदु, अनंलि छि क्वहां झायादिल, अले पर्वतत छिगु न्ह्यःने थुरथुर खात। 4 थःगु लँ स्वइपिनिगु निंतिं ज्या यानादीम्ह छि थें ज्याःम्ह परमेश्वरयात संसारया शुरुंनिसें न न्हाय्पनं न्यंगु दु, न मिखां हे खंगु दु। 5 सु पाय्छिगु ज्या यायेत लय्ताइ अले सुनां छिगु लँयात लुमंकी, इमिगु निंतिं ग्वाहालि यायेत छि झायादी। तर जिमिसं छिगु विरोधय् पाप यानाच्वनागुलिं छि तंम्वयादिल। जिपिं गुकथं बचय् जुइ फइ धकाः? 6 जिपिं सकलें अशुद्ध मनूत थें जूगु दु, अले झीगु फुक्क धर्मया ज्या भ्वाथःगु कापः थें खः। जिपिं फुक्कं सिमाहः थें गनावनी अले जिमिगु पापं जिमित फसं थें पुइकायंकी। 7 छिगु नां काइपिं छम्ह नं मदु, छितः ज्वनेगु सुनानं कुतः याइ मखु, छाय्धाःसा छिं थःगु ख्वाः जिपिंपाखें सुपिकादीगु दु, अले जिमित जिमिगु पापया शक्तिइ त्वःतादीगु दु। 8 अय्नं हे परमप्रभु, छि जिमि अबु खः। जिपिं चा खः, अले छि धाःसा कुमाः खः। जिपिं छिगु हे ल्हाःया ज्यात खः। 9 हे परमप्रभु तसकं तंपिकयादी मते, जिमिगु पाप न्ह्याबलें लुमंकादी मते। बिन्ति याये, जिमित दया यानादिसँ, छाय्धाःसा जिपिं फुक्कं छिकपिनि हे प्रजा खः। 10 छिगु पवित्र शहरत मरुभूमि जूगु दु, सियोननापं मरुभूमि जूगु दु अले यरूशलेम नाश जूगु दु। 11 जिमि पुर्खातय्सं छितः आराधना याइगु पवित्र व झःझः धाःगु देगः मिं नये धुंकूगु दु। झीसं तसकं मू वंगु ताय्कागु सम्पत्ति नाश जुइ धंकूगु दु। 12 थुपिं फुक्क खँ जुइ धुंकाः हे परमप्रभु, छु छि लिज्यां झायादी ला? छु छि सुम्क च्वनाः जिमित दयेमाःगु स्वयाः अप्वः सजाँय बियादी ला? |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.