यशैया 55 - नेवाः बाइबल

प्‍याय्‌चाःपिन्‍त सःतादीगु

¹ परमप्रभुं धयादी, “हे सकलें प्‍याय्‌चाःपिं, लः दुथाय् लिक्‍क वा अले लः त्‍वँ, धिबा मदुपिं नं नसा कयाः न वा! अले सित्तिकं दाखमद्य व दुरु कायेत वा!

² गुगु नयेगु नसा हे मखु, उकिया निंतिं छाय् धिबा पुलेगु? अले गुकिं प्‍वाः जाइ मखु, उकिया निंतिं छाय् ज्‍या यायेगु? न्‍यँ, जिगु खँ बांलाक न्‍यँ! गुगु नये ज्‍यू व हे जक न, अले साःगु साःगु नयाः छं थःगु प्राणयात लुधंकी।

³ हे मनूत, जिथाय् वयाः जिगु खँ बांलाक न्‍यँ! अले छिमित जीवन दइ। जिं छिपिंनापं सदांया निंतिं छगू बाचा चिने, जिं दाऊदयात सदां दइगु दयामाया बी धकाः बचं बियागु पवित्र आशिष छिमित बी।

⁴ स्‍व, जिं वयात जाति जातितय् दथुइ साक्षी बीत, व इमि नायः व कप्‍तान जुयेत ल्‍ययागु दु।

⁵ छिमिसं म्‍हमस्‍यूगु जातितय्‌त सःता हइ, अले छिमिसं म्‍हमस्‍यूपिं जातित छिमिथाय् हथाय् चाचां वइ। छाय्‌धाःसा परमप्रभु छिमि परमेश्‍वर, इस्राएलया पवित्र परमेश्‍वरं छिमित गौरवं जाय्‌कादीगु दु।”

⁶ गुबलय् तक परमप्रभुयात माले फु वय्‌कःयात मालेगु या। वय्‌कः लिक्‍क दुबलय् हे छिमिसं वय्‌कःयात सःति।

⁷ दुष्‍ट मनुखं थःगु लँपु व अधर्मी मनुखं थःगु बिचाः त्‍वःतेमा, अले इपिं परमप्रभुयाथाय् लिहां वयेमा, वय्‌कलं हे इमित दया यानादी। झी परमेश्‍वरपाखे इपिं लिहां वयेमा, अले वय्‌कलं इमित पूरा क्षमा यानादी।

⁸ “छाय्‌धाःसा छिमिगु बिचाः थें जिगु बिचाः मखु, अले छिमिगु लँपु थें जिगु लँपु मखु,” परमप्रभुं घोषणा यानादी।

⁹ “गथे आकाश पृथ्‍वी स्‍वयाः तःजाः, अथे हे जिगु लँपु छिमिगु लँपु स्‍वयाः व जिगु बिचाः छिमिगु बिचाः स्‍वयाः तःधं।

¹⁰ गथे वा व च्‍वापु आकाशं गाइ अले अथें हे उपिं नितां च्‍वय् लिहांवनी मखु, तर बँयात प्‍याकाः अन्‍न सय्‌की, अले ह्वलेत पुसा व नयेत नसा बियादी।

¹¹ जिगु म्‍हुतुं पिहां वःगु वचन अथे हे जुइ। व सितिकं जिथाय् लिहां वइ मखु, तर उकिं जिं मतिइ तयागु ज्‍या पूवंके, अले छु ज्‍याया निंतिं जिं वयात छ्वयाहयागु खः, उकी व ताःलाइ।

¹² छिपिं आनन्‍द व शान्‍तिं च्‍वने खनी। पर्वत व डाँडातय्‌सं नं छिमिगु निंतिं म्‍ये हाला हइ, अले माथंवंगु थासय् च्‍वंगु सिमातय्‌सं ल्‍हाःपा दायाहइ।

¹³ अनंलि कंमाया पलेसा सल्‍लाया सिमा, व न्‍हाय्‌कंमाया पलेसा मेहदीया सिमात बुया वइ। थथे परमप्रभुया हनाबनाया निंतिं जुइ। थ्‍व गुबलें नाश मजुइगु सदां सदांया निंतिं चिं जुइ।”