यशैया 38 - नेवाः बाइबलहिजकिया जुजु सी थें च्वंक म्हंमफुगु २ राज २०:१-११ ; २ इति ३२:२४-२६ 1 उबलय् हिजकिया जुजु उसाँय् मदयाः सी थें च्वन। आमोजया काय् अगमवक्ता यशैयां वयाथाय् वनाः धाल, “परमप्रभुं थथे धयादी – छेँय् फुक्क खँ मिलय् या, छाय्धाःसा छ सीत्यंगु दु। छंगु ल्वय् लनी मखुत।” 2 हिजकियां अंगःपाखे स्वयाः परमप्रभुयात थथे प्रार्थना यात, 3 “हे परमप्रभु, जिं दुनुगलंनिसें छिगु भक्त जुयाः छिगु सेवा यानागु खँ लुमंकादिसँ। जिं छितः यःगु ज्या हे यानावयाच्वनागु दु।” अले हिजकिया ह्वाँय्ह्वाँय् ख्वल। 4 अनंलि परमप्रभुया थ्व वचन यशैयाथाय् वल, 5 “वनाः हिजकियायात थथे धा, ‘छिमि तापाबाज्या दाऊदया परमप्रभु परमेश्वरं थथे धयादी – जिं छंगु प्रार्थना न्यने, जिं छंगु ख्वःबि खंगु दु। जिं छंगु आयु मेगु झिंन्यादँ अप्वय्काबी। 6 जिं अश्शूरयाम्ह जुजुया ल्हातं छन्त व थ्व शहरयात बचय् याये। जिं थ्व शहरयात रक्षा याये। 7 “‘परमप्रभुं छु बचं बियादी व पूवंकादी। परमप्रभुयापाखें उकिया चिं छन्त थ्व जुइ– 8 आहाजया त्वाथलय् निभाःया किचः गुगु क्वय्पाखे वने धुंकूगु दु, जिं झिपलाः ल्युने लित छ्वयाबी।’” अथे जुयाः निभाःया किचः क्वय् क्वहां वनाच्वंगु जूसां झिपलाः लिज्यावन। हिजकियाया प्रशंसाया म्ये 9 उसाँय् मदयाः सी थें च्वंक मफयाच्वंम्ह ल्वय् लनाः यहूदाया जुजु हिजकियां प्रशंसाया म्ये च्वल – 10 जिं बिचाः याना, “जिगु जीवनया दकलय् बांलाःगु इलय् हे जि मृत लोकय् वनेमाल अले थनिंनिसें जि म्वाइ मखुत। 11 परमप्रभुयात जिं हाकनं गुबलें खनी मखुत, म्वाःपिनिगु देशय् परमप्रभुयात जिं खंके फइ मखुत। मनूतय्त जिं थनिंनिसें खनी मखुत, न जि आः संसारय् च्वनाच्वंपिं लिसे च्वने दइ। 12 जवाःतय्गु पाल थें जिगु जीवन जिपाखें लाकायंकल। तान थाइम्हं कापः तु थें जिं जिगु जीवन तुलागु दु अले वय्कलं जितः तानं चानादीगु दु। न्हिच्छि व चच्छिं हे छिं जिगु जीवनयात अन्त यानादीगु दु। 13 सुथय् तक जि पिवाच्वना। तर सिहंनं क्वँय् त्वथू थें वय्कलं जिगु फुक्क क्वँय् त्वथुलादिल। न्हिच्छि व चच्छिं हे छिं जिगु जीवनयात अन्त यानादीगु दु। 14 इखुंचा व सलांत्याः झंगलं थें जिं चिरबिर यानाः हाला। सुकुभत्तुं थें विलाप याना, च्वय् आकाशय् स्वस्वं हे जिगु मिखा त्यानुइ धुंकल। हे परमप्रभु, जि दुःखय् लाःगु दु। छिं हे जितः ग्वाहालि यानादिसँ।” 15 तर आः जिं छु धायेफु धकाः? वय्कः जिनापं न्ववानादिल अले वय्कलं हे थथे यानादिल, जिगु प्राणया धन्दाया कारणं जि जिगु जिवंकाछि क्वमिलु जुये। 16 हे परमप्रभु, थ्व खँपाखें हे मनूत म्वाइ, अले जिगु आत्माय् नं जीवन दइ, छिं जिगु ल्वय् लाय्कादिल अले जितः म्वाके बियादिल। 17 धात्थें हे जिगु उन्नतिया निंतिं जिं थथे सास्ती नये माल। छिं जितः माया यानाः सीगालय् वनेगुपाखें बचय् यानादिल। छिं जिगु फुक्क पाप क्षमा यानादिल। 18 पातालं छिगु प्रशंसा याये फइ मखु। सीम्हं छिगु प्रशंसा याये फइ मखु। सीगालय् वने धुंकूपिन्सं छिगु विश्वास याये बहःगु खँय् आशा याइ मखु। 19 म्वाःपिं व म्वानाच्वंपिन्सं जक छिगु प्रशंसा याइ, गथे थौं जिं यानाच्वना। बौनं थः काय्पिन्त छिगु विश्वास याये बहःगु खँया बारे कनी। 20 परमप्रभुं जिगु उद्धार यानादी, अले झीपिं थःगु जिवंकाछि परमप्रभुया देगलय् तार दुगु बाजं थानाः भजन हाले। यशैयां हिजकियायात सल्लाह ब्यूगु २ राज २०:७-८ 21 यशैयां थथे धाःगु खः, “यःमरिमाया मलम दय्काः हिजकियायागु कइलय् पानाब्यु। अले वयागु ल्वय् लायावनी।” 22 हिजकियां यशैयायात न्यंगु खः, “जि परमप्रभुया देगलय् वने फइ धइगुया चिं छु जुइ?” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.