यशैया 17 - नेवाः बाइबलदमस्कसया विरोधय् अगमवाणी 1 दमस्कसया विरोधय् अगमवाणी, “स्व, दमस्कस शहर दइ मखुत। व दुना वनाः तःजाःगु द्वँ जक जुइतिनि। 2 अरोएरया शहरत न्ह्याबलेंया निंतिं झिजांमिजां दंगु जुइतिनि। उपिं फै-च्वलय् ज्वयेगु थाय् जुइतिनि अले अन इमित ख्याइपिं सुं नं दइ मखु।” 3 दक्व शक्ति दुम्ह परमप्रभुं थथे धयादी, इस्राएलया घेरय् यानातःगु शहरत नाश जुइ अले दमस्कसया शाही शक्ति मदयावनी। अले बचय् जुयाः ल्यंदनीपिं अरामीत नं इस्राएलीतय्गु गौरव थें लाजय् लाइ। 4 “व दिं इस्राएलया गौरव तनावनी अले वयागु म्हयागु दाः कम जुयावनी। 5 बाली लयाः मुंके धुंकूगु बुँ थें इस्राएलीत जुइ, रपाईमया ब्यासिया तछ्वगुँइँ मुने धुंकूगु बुँ थें इस्राएलीत जुइ। 6 अय्नं जैतूनया फल हाय्के धुंकाः उकिया सिमाया निगः वा स्वंगः फल च्वय्यागु कचालय् व प्यंगः वा न्यागः फल क्वय्यागु कचालय् जक ल्यं थें इस्राएल नांगा जूगु जैतूनया सिमा थें जुइ, अले थनच्वंपिं छुं मनूत जक ल्यनाच्वनी,” परमप्रभु, इस्राएलया परमेश्वरं थथे धयादी। 7 व दिं वइबलय् मनूत ग्वाहालिया निंतिं थः सृष्टिकर्ता इस्राएलया पवित्र परमेश्वरपाखे लिहां वइ। 8 इमिसं थःगु हे ल्हातं दय्कूगु वेदीतय्के भलसा तइ मखु। अले थःपिन्सं हे दय्कूगु अशेरा द्यःमय्जुयागु मूर्ति व गुँगू थनीगु वेदीतय्के भलसा तइ मखु। 9 उखुन्हु इस्राएलीतय्सं यानाः इमिसं त्वःतूगु बबल्लाःगु शहरत वान्छ्वयाः तःगु सिँ व झाःया झाः दुगु थाय् थें जुइ। 10 हे इस्राएल, परमेश्वर छन्त उद्धार याइम्ह खः, वय्कः ल्वहंधी व छंगु किल्ला थें खः, तर छं परमेश्वरयात ल्वःमंकल। अथे जुयाः छं तसकं बांबांलाःगु सिमात पित अले पिने हःगु दाखमात नं पित, 11 अले छं व प्यूगु दिनय् तःमा जुयाः मुखू स्वाँ नं ह्वय्की अय्नं ल्वय्यागु दिं व मलनीगु कष्टया दिनय् वयागु बाली नाश जुइ। छुं नं बाली दइ हे मखु। खालि ल्वय्या दिं व स्याःचा जक जुइ। शत्रु जातित बूगु 12 न्यँ! यक्व जाति जातितय् दथुइ खलबल जूगु दु, समुद्र हाःगु सः थें अले समुद्रय् वइगु किसिद्वंम्बःया सः थें इमिगु सः ताये दु। 13 तर जाति जातित खुसिबाः वःगु लःया सः थें हाला हइ परमेश्वरं इमित ब्वःबियादी। इपिं तापाक बिस्युं वनी, अले फसं पुइकूगु डाँडाया छ्वसँ व वाफसं पुइकूगु झाः थें लिनाछ्वइ। 14 सन्ध्याकाः इलय् छक्वलं भय वइ। सुथय् जुइ न्ह्यः तक उपिं दयाच्वनी मखु। जिमिगु देय् लुतय् याइपिनिगु गतिपति नं अथे हे जुइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.