होशे 9 - नेवाः बाइबल

इस्राएलयात सजाँय

¹ अय् इस्राएलयापिं मनूत! मेगु जात जातियापिं मनूत थें लय् लय्‌ताये मते। छाय्‌धाःसा छिपिं थः परमेश्‍वरनापं विश्‍वास यायेबहः मजूगु दु। अन्‍नया दक्‍व खलाय् वेश्‍या ज्‍या याइपिनिगु ज्‍याला कायेत छिमिसं यय्‌काच्‍वन।

² तर अन्‍नया खलां अले दाख तिसीगु थासं मनूतय्‌त नकीत्‍वंकी मखु, न्‍हूगु दाखमद्य इमिगु निंतिं गाइ मखु।

³ इपिं परमप्रभुया देशय् च्‍वनी मखु। एफ्राइम मिश्र देशय् लिहांवनी। अश्‍शूरय् अशुद्धगु नसा नइ।

⁴ इमिसं परमप्रभुयात दाखमद्य व मेमेगु बलि छाये फइ मखु, न इमिसं छाःगु बलिं वय्‌कः लय्‌ताइ। इमिसं छाःगु बलि ला सीपिं मनूतय्‌गु निंतिं दुःखं च्‍वनीपिन्‍त बीगु मरि थें जुइ, व नइपिं सकलें अशुद्ध जुइ, थ्‍व नसा इमिगु थःगु हे निंतिं जुइ, व परमप्रभुया देगलय् छायेयनी मखु।

⁵ छिमित क्‍वःछिनाबियातःगु नखःचखःया दिं परमप्रभुयात हनाबना यायेत छिमिसं छु यायेगु?

⁶ इपिं आपत बिपतपाखें बिस्‍युं वःसां मिश्र देशय् च्‍वंपिन्‍सं इमिगु सीम्‍ह मुंकी अले नोपय् इमित थुनाबी। इमिगु वहःया धुकुतिइ, अले न्‍हापा इमिगु छेँ दुगु थासय् घाँय्‌घिइ व कंया झाः बुया वइ।

⁷ सजाँयया ई न्‍ह्यःने थ्‍यंकः वःगु दु। इमिगु पापया पलेसा काइगु ई वःगु दु। इस्राएलं थ्‍व खँ सी। छिमिगु यक्‍व पाप व तःधंगु इखयागु कारणं छंगु निंतिं अगमवक्तात मूर्ख व आत्‍मां जाःपिं मनूत वँय् थें जुइ।

⁸ अगमवक्ता जिमि परमेश्‍वर नापनापं एफ्राइमयात नं स्‍वयेत तयातःम्‍ह खः, अथे जूसां वयागु दक्‍व लँय् जाः ग्‍वयाच्‍वन, अले व थःगु हे परमेश्‍वरया देगलय् शत्रु जुल।

⁹ गिबाया दिनय् थें इमिसं थःम्‍हं थःत तसकं स्‍यंकूगु दु। परमेश्‍वरं इमिगु अधर्मया ज्‍या लुमंकी, अले वय्‌कलं इमित पापया सजाँय बियादी।

¹⁰ “अय् इस्राएल, छन्‍त दकलय् न्‍हापालाक नापलाःबलय् जितः मरुभूमिइ बुयावःगु दाख लूगु थें जुल। जिं छिमि पुर्खात दकलय् न्‍हापालाक खंबलय् जितः दाखमाय् न्‍हापां सःगु यःमरि फल खंगु थें जुल। तर इपिं बाल-पोरय् थ्‍यंबलय् इमिसं थःत घच्‍चाइपुस्‍से च्‍वंगु मूर्तितय्‌त अर्पण यात, इमिसं पुजा याःपिं मूर्ति थें इपिं मछालेपुस्‍से च्‍वंपिं जुल।

¹¹ एफ्राइमया गौरव झंगः थें ब्‍वयावनी, छाय्‌धाःसा छिमि सुं मिसां न मचा बुइकी, न प्‍वाथय् दइ, न प्‍वाथय् मचा थाइ।

¹² इमिसं मचा बुइकाः तःधिकः याःसां जिं व मचायात काये। हाय! गज्‍याःगु दुःख इमित, गुबलय् जि इपिंपाखें लिहां वये।

¹³ जिं एफ्राइमयात टुरोस थें बांलाःगु थासय् पिनातःगु खना। तर एफ्राइमं थःकाय् म्‍ह्याय्‌पिन्‍त स्‍यायेत यंकेमाली।”

¹⁴ हे परमप्रभु, इमित सजाँय बियादिसँ, छिं इमित छु बियादी? इमि मिसातय्‌त मचा मदय्‌क थारि यानादिसँ, अले इमिगु दुरु सुकादिसँ।

¹⁵ “इमिसं गिलगालय् याःगु दक्‍व बांमलाःगु दुष्‍ट ज्‍याया कारणं जिं इमित घृणा याना। इमिगु मभिंगु ज्‍याया कारणं जिं इमित जिगु देगलं पितिनाछ्वये। आः जिं आवंलि इमित माया याये मखुत। इमि दक्‍व न्‍ह्यलुवाःत विरोधी जूगु खः।

¹⁶ एफ्राइमया मनूत हानापं गनावंगु व फल सइ मखुगु सिमा थें जूगु दु। इमिसं काय्‌म्‍ह्याय् बुइकुसां इमि यःपिं मस्‍तय्‌त जिं स्‍यानाबी।”

¹⁷ जिमि परमेश्‍वरं इमित मयय्‌कादी, छाय्‌धाःसा इमिसं वय्‌कःयागु आज्ञा मानय् मयाः। इपिं मेगु जातितय्‌गु दथुइ चाचाःहिलाः जुइ।