होशे 5 - नेवाः बाइबल

इस्राएल व यहूदाया विरोधय् न्‍याय

¹ “अय् पुजाहारीत, थ्‍व खँ न्‍यँ! अय् इस्राएलीत, ध्‍यान बियाः न्‍यँ! अय् जुजुया घराना, ध्‍यान बियाः न्‍यँ! थ्‍व न्‍यायया फैसला छिमिगु विरोधय् दु। छिपिं मिस्‍पाय् जाः व तबोरय् पानातःगु जाः जूगु दु।

² थुपिं विद्रोहीतय्‌सं यक्‍वसित स्‍याःगु दु। जिं इपिं सकसित अनुशासनय् हये।

³ जिं एफ्राइमया बारे फुक्‍कं खँ स्‍यू, इस्राएल जिपाखें सुलाच्‍वंगु मदु। अय् एफ्राइम छं वेश्‍या ज्‍या यानाच्‍वंगु दु। इस्राएलं थःत हे अशुद्ध याःगु दु।

⁴ “इमिगु ज्‍यां इमित थः परमेश्‍वरपाखे लिहां वय्‌केबी मखु। वेश्‍या ज्‍या यायेगु आत्‍मा इमिगु नुगलय् दु, इमिसं परमप्रभुयात मानय् मयाः।

⁵ इस्राएलया तःधंसुं वयागु हे विरोधय् साक्षी बी। इस्राएल व एफ्राइम नं थथःगु पापय् लुफिं हाइ। यहूदा नं इपिंनापं लुफिं हाइ।

⁶ इपिं फै-चोलय् व सा द्वहंया बलिदान ज्‍वनाः परमप्रभुयात माःवनीबलय् इमिसं वय्‌कःयात नापलाके फइ मखु। वय्‌कलं इमित त्‍वःतादिल।

⁷ इपिं परमप्रभुनापं विश्‍वास यायेबहः मजुल। इमिसं मेमेपिंपाखें काय्‌म्‍ह्याय् बुइकल। अले अमइया नखः चखतं इपिं व इमिगु बुँनापं इमित नाश याइ।

⁸ “गिबाय् तुरही व रामाय् नेकू पु। बेथ-आवनय् लडाइँया सः पिका। अय् बेन्‍यामीन, न्‍ह्यलुवाः जु।

⁹ न्‍याय जुइगु दिनय् एफ्राइम झिजांमिजां जुइ। गुगु खँ धात्‍थें जुइ, व इस्राएलया कुलया दथुइ जिं घोषणा याये।

¹⁰ यहूदाया न्‍हेलुवाःत सिमानाय् च्‍वंगु ल्‍वहं सरय् याइपिं थें जूगु दु। जिं जिगु तं इमिके लः बाः वःगु खुसि थें प्‍वंकाबी।

¹¹ एफ्राइमयात क्‍वत्‍यलातःगु दु। न्‍यायलय् वयात न्‍हूत्तुमतु न्‍हूगु दु। व मूर्तिया ल्‍यू वनेत स्‍वःगु दु।

¹² अथे जुयाः जि एफ्राइमया निंतिं नवंकी थें व यहूदाया घरानाया निंतिं ध्‍वग्‍गीगु सिँ थें जुइ।

¹³ “एफ्राइमं थःगु ल्‍वय् खंबलय् अले यहूदां थःगु घाः खंबलय् एफ्राइमं अश्‍शूरया तःधंम्‍ह जुजुयाथाय् ग्‍वाहालिया निंतिं मनूत छ्वत। अय्‌नं वं छन्‍त लंके फइ मखु, वं छंगु घाःयात लंके फइ मखु।

¹⁴ छाय्‌धाःसा जि सिंहनं थें इस्राएल व यहूदाया मनूतय्‌त हय्‌काये। इमित कुचा कुचा यानाः जि थःगु लँय् वने, जिं इमित लुया यने, इमित बचय् याइपिं सुं नं दइ मखु।

¹⁵ इमिसं थःगु पाप स्‍वीकार मयातले जि लिहां वनाः थःगु थासय् च्‍वने, इमिसं जिगु ख्‍वाः स्‍वयेत माला जुइ। इमित दुःखकष्‍ट जुइबलय् इमिसं जितः तसकं माली।”